Hiburuduma 7 - ZE'ELEGO PAALEGA

Malema Daana wuu Mɛlekizɛdɛki

¹ “Naba Mɛlekizɛdɛki wa n yehe Salem na wa, dɛna Gani za'a Yinɛ malema daana la, wa tu'uhɛ Aberaham ti a ze'ele la en kiŋɛ ta zabɛ nyaŋɛ naduma gee lɛbera na la, ti a purɛ sum bahɛ a zuo.”

² Ti Aberaham yehe lɔgeseto woo ti a nyɛ la puan, “Seko woo en pa'aheri pia la bo' en.” Yia, a yu'urɛ la vuurɛ dela, “Tuntɔɔ naba” Buyi', a dela Salem tiŋa naba, ti de vuurɛ dɛna la, “Suma'ahum naba.”

³ A ka tari sɔ, a ka tari ma, a ka tari buuri tuuhum. A ka tari pi'ileŋo dabeha, bii vom ba'ahegɔ dabeha. Gee a ani wuu Yinɛ Dayua la, dɛna malema daana yɛ'a ha.

⁴ Bihɛ ya en de nɛre kãtɛ se'em. Ti Aberaham n pun dɛna yaaba la, ta bo' en pia pia bo'olum a lɔgerɔ la woo puan.

⁵ Sɛba en de Levi buuri, tuna malema tuuma la, Yinɛ bo' ba la nɔze'elego, ti ba tɔ'ɔha pia pia bo'olum nɛreba la zi'an, ba suurɔ la zi'an, la bamam en pun dɛna Aberaham yaahi la.

⁶ Gee buraa kana wa en dagi yaaŋa wa, to'e pia pia bo'olum mɛ Aberaham zi'an, gee purɛ sum bahɛ Aberaham, se'em en pun to'e nɔbiŋere.

⁷ Nɔkpe'ene ka boi bini, tarema en to'ore sum kpɛ'ɛma zi'an.

⁸ Yele wa zi'an kayima dela, saaleba en kiiri to'ohe pia pia bo'olum, gee zi'an kayima me, se'em ti ba mina ti a pun bɔna mɛ na la me to'ohe pia pia bo'olum la mɛ.

⁹ Se'em wan ta'am pun yeti, Levi mɛŋa la en yuum to'ohe pia bo'olum la, me yuum bo'ori pia bo'olum mɛ a yaaba Aberaham puan na.

¹⁰ Se'ere en sɔi la, a yuum boi a yaaba Aberaham iŋa puan mɛ, gee ti Mɛlekizɛdɛki tu'uhɛ en la.

Malema daana ayima en doohe Mɛlekizɛdɛki.

¹¹ Han dɛna ti vom sebo en bi'ɛ kahegɛ han daa bɔna nɛreba la puan doohe la Levi buuri malema duma tuuma la, (se'ere en sɔi la, nɛreba la yuum to'e Yinɛ ze'elego la la Levi buuri malema duma wa zi'an,) beni ti la le nari ni ti ba le tɔgera malema daana ayima yele, se'em en doohe Mɛlekizɛdɛki la, gee ka tɔgera ti a doohe la Aron?

¹² Teere han wa'am malema duma la puan na, teere me wan ba'ahum wa'am nɔze'elego la me puan na.

¹³ Se'em daana zuo ti ba tɔgera yele ana wa la yehe la buuri deyima me puan na, buuri se'ere nɛra en ka tabelɛ tum kaabegɔ bimbine la zuo.

¹⁴ La niiɛ mɛ gã'a ti tu Daana la yehe la Yuda buuri puan na, buuri dina wa puan, Moose ka tɔgɛ malema duma yele de puan.

¹⁵ La pun kɔ'ɔm ba' niiɛ mɛ gã'a, ti malema daana ayima han ihege na doohe Mɛlekizɛdɛki la,

¹⁶ eŋa daana la en lebege malema daana la dagi ze'elego en bu en sore bii saala buuri tuuhum, gee a la doohe la vom sebo n ka sageni la paŋa puan.

¹⁷ Se'ere en sɔi la, ba purɛ a yele mɛ na yeti, “Fum dela malema daana ka tara ba'ahegɔ, doohe Mɛlekizɛdɛki.”

¹⁸ Zi'an kayima me yeti, teere wan bɔna yia nɔze'elego la puan, se'ere en sɔi la, ku daa ka tari paŋa, gee me ka tuna.

¹⁹ (Se'ere en sɔi la, nɔze'elego la daa ka bahɛ ti sɛla bi'ɛ kahegɛ). Zi'an kayima me pa'ali ti, beere putɛ'sunɛ se'ere boi gana ŋwana, ti tu wan dɔla pu'uha Yinɛ.

²⁰ Pɔrɛ en daa pɔ pa'alɛ ti dina wa wan tum, se'ere en sɔi la, sɛba woo en de malema duma, ni ka pɔ gee tuna,

²¹ gee malema daana ena wa la, pɔ mɛ gee lebege malema daana, doohe se'em daana en yele en yeti, “ Daana la pɔ mɛ, gee kan tee a puti'irɛ, ti ‘Fum dela malema daana ka tara ba'ahegɔ;’ ”

²² lan de se'em la, Yezu ze'ele bo' la nɔpu'ulegɔ n gani bala.

²³ Se'ere en le pa'ahɛ dela, diimen diimen malema duma la yuum zo'e mɛ ba kãlɛ puan beni zuo, kum en yuum gu'uri ba ti ba ka ta'am bɔna tuunɛ la puan wuuha.

²⁴ Gee malema daana ena kɔ'ɔm bɔna a malema tuuma la puan mɛ wuuha wuuha, se'ere en sɔi la a boi la wuuha.

²⁵ Dina zuo la a nyaŋeri mɛ faara, nananawa la saŋa woo sɛba en dole a puan paara Yinɛ la baha, eŋa en vɔi wuuha la zuo, a ŋmɛ'ɛra nupu'ɔ ba zuo la.

²⁶ La dela ma'a ti tu tara malema kiima kana taaba, en de fa'a, ka tara gbelegere, ka galum, ti ba yehe en ze'ele a ma'a ti a ka pa'ahɛ be'em duma puan, ti ba zɛkɛ en zom zuin zuin ha gaŋɛ saazuo wa.

²⁷ Eŋa ka ani wuu malema duma bana la, a ka de a ni kaabera daare woo, ni kaabɛ a mɛŋa be'em zuo yia, gee nyaa kaabɛ bo' nɛreba la be'em. A kaabɛ la kaabegɔ buyina za'a, en daa dikɛ a mɛŋa kaabɛ la.

²⁸ Nɔze'elego la daa loohe la sɛba en de tɔregɔ duma la ti ba dɛna malema kiinduma, gee nɔpɔrɛ la en wa'am ze'elego la pooren na la, looe la Dayua sɛka en bi'ɛ kahegɛ, saŋa woo la.