Hiburuduma 3 - ZE'ELEGO PAALEGA

Moose yameŋa, Kiresta dayua

¹ Bala zuo n suurɔ, n tuulum nɛre tadaanduma Yinɛ saazuo yi'a wa puan wa, bihɛ ya suŋa suŋa Yezu en de tuntuna, gee dɛna malema kiima bo' tumam sakerɛ yelehum la wa la,

² a daa tari sakerɛ mɛ la se'em en looe en la, wuu Moose en yuum “de sakerɛ daana la pu'uhegɔ yire tuuma la za'a se'em la.”

³ Gee la bala za'a, Yezu tari zuo la suŋa gana Moose mɛ, wuu yire daana en tari zuo gana yire la mɛŋa se'em la.

⁴ (Se'ere en sɔi la, yire woo, nɛra en mɛ dɛ, gee Yinɛ en de sɛla woo mɛta.)

⁵ Yi bihɛ, Moose yuum dela sakerɛ daana Lageŋɔ tuuma la za'a, dɛna de yameŋa, tɔgera yele sɛ'a ti ba wan tɔgɛ beere.

⁶ Gee Kiresta en de se'em la, yuum tari la sakerɛ la Yinɛ lageŋɔ la, dɛna dayua, ti tumam dɛna yire la, tu han gurɛ tu inkpeŋere wa la tu nyu'ɔ ŋma'a sɛka en de tu beere puti'irɛ zuo wa kankaŋi.

Bumbu'um tahega

⁷ Bala zuo, wuu Fa'a Sia la en yele se'em ti, “Zina, ya han wum Yinɛ kua,

⁸ da kãbɛ ya suya wuu ya yaabeduma pobiriga la, wuu ban yuum boi makerɛ dabeherɛ puan kpaahenɛ puan ha la,

⁹ zi'an ti ya yaabeduma la yuum makɛ mam bihɛ, la bamam en pun nyɛ mam tum se'em, yuuma pihinaahi la.

¹⁰ Bala ti mam yuum iŋɛ suure la sankaŋa buuri la, yele ba yeti, bamam saŋa woo kɔ'ɔm bɔregera mɛ ba suya puan, ba ka makɛ mina mam sore la.

¹¹ Mam sunsunyiim la puan, mam pɔ mɛ yeti, ba kan kɛ̃ mam vo'ohego la puan.”

¹² Tara ya mɛhi suŋa n suurɔ, ti ya se'em da tara be'em suure, suse'ere en ka nane, gee ŋmɛregera de mɛŋa yɛha Yinɛ vua wa zi'an.

¹³ Gee tugum kpemehe ya taaba daare woo wuu ban yi'iri se'em ti “zina” wa la, ti ya se'em da bɔna ti be'em pã'ahɛ en ti a kãbɛ a suure.

¹⁴ Se'ere en sɔi la, tumam nyaa dela taaba la Kiresta, tu han gurɛ tu yia sakerɛ la kankaŋi ta paaɛ ba'ahegɔ.

¹⁵ Wuu lan yele se'em yeti, “Zina ya han wum Yinɛ kua, da kãbɛ ya suya wuu ya yaabeduma pobiriga puan la.”

¹⁶ Nananawa, bani en bala yuum wum gee bire pɔya la? Dagi sɛba woo en yuum bahɛ Igipiti ti Moose tari ba yehe na la?

¹⁷ Gee bani ti Yinɛ iŋɛ suure la ba yuuma pihinaahi la? Dagi sɛba en yuum tum be'em la, sɛba en yuum kiiri muɔ la puan la?

¹⁸ Gee bani ti Yinɛ yuum pɔ nuurɛ ti ba kan kɛ̃ eŋa vo'ohego la puan la, han dagena sɛba en yuum ka nane la?

¹⁹ Bala, tu nyɛ ya ti ba yuum ka nyaŋɛ kɛ̃, doohe la ban ka nam la zuo.