Hiburuduma 12 - ZE'ELEGO PAALEGA

Yezu itegɔ

¹ Bala, aze'nyɛ wa en zo'e se'em wuu sagbanɛ wa kaaɛ tu mum wa zuo, bahɛ ya ti tu dikɛ tibehegɔ seko woo, la be'em sebo woo en ba' tabera, gee ana la tɔ kankaŋi la biŋe kinkɛleŋa, gee bahɛ ya ti tu zɔta la ŋmibega, zɔ sɛka en gã' tu nɛŋan wa.

² Tu biha suŋa suŋa Yezu en de sakerɛ nɛŋa daana, se'em daana n de sakerɛ la ba'ahegɔ daana la. Se'em ti nyɛɛma sɛ'a en dikɛ biŋe en la zuo, a daa ŋmibe mɛ ta paaɛ pumpuuredɔɔ la zuo, ka fabela dɔɔ zuo kum la nyanɛ la, nyaa wa'am na zi'a a zi'a zi'an Yinɛ na'am kuka la zuo, zuɔ nu'o.

³ Ti'ihɛ ya bihɛ Yezu en daa ŋmibe se'em namehegɔ seko taaba ti be'em duma daa dikɛ namehɛ en la, bala ti yamam me kan taregera bii ya suure sagum.

⁴ Yan zigeri la be'em la, ya nan ka zigɛ paaɛ ze'sɛka en de ya ziim ka'ɛ.

⁵ Ya me pun tamɛ kpemehego seko en gulehɛ pa'alɛ ti ya dela Yinɛ kɔma la. La yeti, “N bia, da bihɛ Daana tube-dɔlegerɛ la yoo, bii fum suure sagum, a han dɔlegɛ fum tuberɛ.

⁶ Se'ere en sɔi la, Daana la nameheri la sɛba ti a nɔŋɛ, gee dɔlegera bisɛka woo ti a to'e.”

⁷ Ya ha ŋmibera makerɛ puan tube-dɔlegerɛ zuo. Yinɛ iti ya mɛ wuu a kɔma la. Bikani en boi ti ka dɔgera ka dɔlegera ka tuberɛ?

⁸ Ya han ka to'e tube-dɔlegerɛ se'ere ti kɔma woo tɔ'ɔha la, ya dela kɔm-yooro, gee dagi Yinɛ kɔma.

⁹ Le yɛ'ɛha, tu tari tu dɔgereba mɛ, ti ba dɔlegera tu tuba, gee ti tu nana ba. La tugum dagena tu malum bɔta ti tu dikɛ tu mɛhi iŋɛ Sɔ sɛka en sɔi sɛɛhi la nu'uhen la tu vɔna?

¹⁰ Tu dɔgereba ni dɔlegɛ tu tuba la saŋa fii wa wuu bamam en bihɛ ti la nari se'em la, gee Yinɛ dɔlegeri tu tuba la tumam mɛhi sum zuo, ti la bahɛ ti tu ta lagum tara a tuulum la.

¹¹ Tube dɔlegerɛ woo tɔi mɛ, gee la nyani nyɛlum en wan bɔna saŋa fii wa. Ba'ahegɔ za'a, tube-dɔlegerɛ la ni tari la suma'ahum wala sɛ'a en de tuuntɔɔ vom bɔ'ɔra sɛba ti tube-dɔlegerɛ bi'ihɛ ba la.

¹² Bala, zɛkɛ ya nu'uhi wa en ki yula wa, kpemehe ya duma wa en tɛteni wa,

¹³ maalɛ fum sore la suŋa bo' fum nama, ti sɛla en de wobete da sugehe, gee a tugum naaɛ taaba.

Da zagehɛ ya Yinɛ zu'uhegɔ la

¹⁴ Eere ya suma'ahum ninmu'urɛ nɛra woo, la fa'a vom sebo en han ka bɔna, nɛra kan ta'am nyɛ Daana la.

¹⁵ Bihɛ ya suŋa, ti ya se'em da koŋe Yinɛ zu'uhegɔ la. Da bahɛ ya ti too nyɛgerɛ yehe ya puan na, tari daaŋɔ wa'am na, ti ya doohe de puan galum nɛreba zo'e zo'e.

¹⁶ Bihɛ ya mɛhi suŋa suŋa ti ya se'em da ana wuu Esɔ, se'em en ka ta' a mɛŋa, ka zɔta Yinɛ la, se'em en yuum koohe a kinɔ dia buyina ma'a zuo la.

¹⁷ Ya mi' ti pooren, en yuum ta bɔta ti a sooevaaɛ ka'am a sɔ zi'an la, a sɔ la yuum zagehɛ en mɛ se'ere en sɔi la, sore yuum ka boi pika pika bo' en ti a wan ta'am tee yele la, la en yuum pun ɛɛra a ka'am la la nintam la.

¹⁸ Ya nan ka paaɛ zi'an ti ya wan ta'am kalum la na, bugum peelum la puan, la lika gbareti la zi'an na, la ze'sɛka en gbiregeri la,

¹⁹ la tintanɛ peebego la, la kua sɛka tugum ti ka kɛleheba bɛlena ti ka pun da le tɔgɛ yele yinɛ pa'ahɛ la.

²⁰ (Se'ere en sɔi la ba kan nyaŋɛ tara en bo' a nuurɛ la se'em la, ti “Duŋa han pun kalum zoore la, ka dela ba lobe ka ku” la.

²¹ Yelemɛŋerɛ, zi'an la yuum ba' tara la dabeem gaŋɛ ti Moose yeti, “Mam gbi'iri mɛ la dabeem.”)

²² Gee yamam paaɛ la zoore se'ere yu'urɛ en yi'iri Zaayɔn la puan na, tinsɛka en de Yinɛ vua wa tiŋa la puan, tinsɛka en de Yerusalɛm sɛka en boi saazuo ha la, ya paaɛ la suŋereba en zo'e kan ta'am kãalɛ la lageŋɔ kãtɛ en boi kuyima,

²³ ya wa'am la lageŋɔ seko en de kɔmdiina sɛba yu'ura en gulehɛ bɔna tinsuŋan puan la na, ya wa'am la Yinɛ se'ere en de sɛla woo gakera la zi'an na, Ya wa'am la tuuntɔɔ duma sɛɛhi la n bi'ɛ kahegɛ la zi'an na.

²⁴ Ya wa'am la Yezu en de nupu'ŋmɛ'ɛra nɔpu'ule paalega la puan la zi'an na, la ziim sebo en dikɛ miihi, gee tɔgera yelesuma gana Abɛl ziim la zi'an na.

²⁵ Bihɛ ya suŋa la ya da zagehɛ se'em en kageri ya wa. Nɛreba daa han ka piiɛ ban da zagehɛ se'em en daa kagɛ ba tiŋa wa zuo la, tumam yeti tu iŋɛ la ŋwani piiɛ la fii me, tu ha zagehɛ se'em en kageri tɔ saazuo na wa.

²⁶ Sankaŋa ha la, a kua ma'a en yuum miim timpaberɛ wa, gee nananawa, a biŋe la nuurɛ ti “Le yɛ'ɛha, n wan le miim, gee dagi timpaberɛ wa ma'a, gee la saazuo za'a.”

²⁷ Yetɔge buna wa “Le yɛ'ɛha wa,” pa'ali ti, a yeti a vuɛ la sɛla en miini la bahɛ bana dela naaŋɔ lɔgerɔ n bala, ti sɛla woo n ka miini la yee.

²⁸ Bala zuo, tumam en yeti tu to'e sɔ'ɔlum sebo en ka miini la zuo, bahɛ ya ti tu bo' ya Yinɛ fara, doohe la na'ahegɔ kaabegɔ seko taaba en tigɛ nini, ti duma kpa'a, la dabeem bɔna bini.

²⁹ Yelemɛŋerɛ, tu Yinɛ la dela bugum sebo en diti kãbera.