Hiburuduma 10 - ZE'ELEGO PAALEGA

Kiresta kaabɛ la buyina za'a za'a

¹ Bala, ze'elego la en yeen dɛna yinyiligo bo' yelesuma la en kini na la, gee dagi yelesuma la yelemɛŋerɛ naanɛ n bala la, kaabegɔ yiŋɔ la en kaaberi yuunɛ woo kan ta'am bahɛ ti sɛba en dole ku la dɛna nɛreba en bi'ɛ kahegɛ.

² Han dagi ni bala, ba kan bahɛ ni ba kaabegɔ, sɛba en na'aheri ku la, han duuhe ba mɛhi buyina za'a za'a, ka le tari ni be'em puti'ira?

³ Gee, kaabegɔ kuna puan, la tiiheri la be'em yele, yuunɛ en kaara yuunɛ.

⁴ Se'ere en sɔi la, la kan ta'am iŋɛ ti lɔlehi la buuhi ziim ta'am saalum be'em.

⁵ Lan vuti fifihe ti Kiresta ta wa'am timpaberɛ wa zuo na la, a yeti, “Kaabegɔ, la bo'olum fum ka boti, gee iŋa ti fum maahum bo' mam.

⁶ Nyɔ'a bo'olum, la be'em kaabegɔ bo'olum, fum suure ka boti ba.

⁷ Bala ti mam yeti, Yinɛ bihɛ, mam wa'am na ti n tum la fum sumboolum Oo Yinɛ, (wuu gɔŋɔ la puan, n gulehɛ mam yele se'em la).”

⁸ En yele se'em zuin wa yeti, “Fum suure bii fum nini tika ka boi kaabegɔ, la bo'olum bii nyɔ'a bo'olum la be'em duuhego bo'olum puan la” (ba bo'ori bana woo dɔla la nɔze'elego la),

⁹ gee nyaa pa'ahɛ yeti, “Bihɛ, mam wa'am na ti n tum la fum sumboolum.” Bala, a saalum yia nɔpu'ulegɔ la bahɛ mɛ, ti a ta'am sɛ yi'i nɔpu'ulegɔ la.

¹⁰ Ti la dɛna la Yinɛ mɛŋa sumboolum zuo, ti ba pee tumam doohe Yezu Kiresta inganɛ la en dikɛ kaabɛ buyina za'a za'a bo' nɛra woo la.

¹¹ Gee malema daana woo ze' mɛ beere en yilegeri beere a tumam la puan, kaabera kaabegɔ yiŋɔ mɛa tulena, kaabegɔ yiŋɔ mɛa en kan malum pee be'em bahɛ la.

¹² Gee Kiresta kaabɛ la buyina bo' saŋa woo, kaabegɔ kuyina ma'a la bo' be'em ba'ahɛ la, a nyaa zi'ire la Yinɛ zuɔ nu'o,

¹³ pɔhɛ bala ma'a ha, “a guri mɛ sansɛka ti a dinduma wan lebege a nama dafeere.”

¹⁴ Se'ere en sɔi la, kaabegɔ kuyina ma'a puan, ti a bahɛ ti ba bi'ɛ kahegɛ saŋa woo, bamam sɛba en kɔ'ɔm dɛna filam la.

¹⁵ Fa'a Sia la dela aze'nyɛdaana bo' dina wa, en yele tu yeti,

¹⁶ “Nɔpu'ulegɔ kuna ti n wan pu'ulɛ la ba, dabeha aŋa la han ta tole. Daana la n yele. N wan dikɛ n nɔze'elego iŋɛ ba suyan, gee gulehɛ a iŋɛ ba puti'ira puan,”

¹⁷ a me pa'ahɛ yeti, “N kan tɛra ba be'em, la ba ka fabele se'ere tuuma la le yɛ'ɛha.”

¹⁸ Zi'an ti sugeri dia bɔna bo' yele ana, be'em duuhego kaabegɔ ka le bɔna.

Ŋmibega yi'a

¹⁹ Bala zuo n suurɔ, tumam n diŋɛ tari puti'irɛ ti tu wan kɛ̃ Fa'a saraa la puan Yezu ziim la zuo la,

²⁰ doohe la sadɔɔ paalega vua la ti a yu'ɛ bo' tu, doohe la en ahegɛ tanɛ se'ere n beŋe la bahɛ la, (a iŋa en bala),

²¹ la tumam en tari malema kiima kãtɛ Yinɛ yire la puan la,

²² bahɛ ya ti tu vurege du' la yelemɛŋerɛ suure, tari puti'irɛ n pirɛ la sakerɛ, ti tu suya miihi ti ba duuhe a be'em puti'irɛ, ti tu ihe pee la tuulum ko'om.

²³ Bahɛ ya ti tu gurɛ suŋa suŋa tu beere puti'irɛ sakerɛ yelehum la gee da miina, se'ere en sɔi la se'em daana en biŋe nuurɛ la dela yelemɛŋerɛ daana.

²⁴ Gee bahɛ ya ti tu biha tumam n wan iŋɛ se'em pagera taaba la nɔŋerɛ la itesuŋɔ,

²⁵ da zagehera ya lagena taaba, wuu basɛba itegɔ en de se'em la, gee ya kpɛmeha taaba, malum ita de gana bala, wuu yan nyɛ ti dabeherɛ la pɔri la.

²⁶ Gee tu han kɔ'ɔm mina gee bɔna be'em puan tumam en to'e yelemɛŋerɛ mi'ilum la ba'ahɛ la, kaabegɔ ka le yee wan kaabɛ bo' tu be'em,

²⁷ gee sɛla en wan wa'am na dela dabeem gakerɛ, la sunsunyiim bugum la en wan di dinduma la.

²⁸ Se'em woo en tuue Moose pa'alegɔ la, kiiri mɛ ti nimbu'ɔ ka bɔna, “Aze'nyɛ duma bayi' batã han diŋɛ tɔgɛ.”

²⁹ Bala, namehɛ kãtɛ deni taaba ti yamam ti'iha ti ba en wan dikɛ bo' sɛba en ka dikɛ Yinɛ Dayua la yi' sɛla, tuura nɔpu'ulegɔ ziim la n dikɛ pee ba la, gee nyiiha zu'uhegɔ Sia la?

³⁰ Se'ere en sɔi la, tu mi se'em Daana en yeti, “Leregere dela mam dinɛ, N wan lebehe yɔ la.” Gee le yeti,“Daana la wan gakɛ a nɛreba” la.

³¹ La dela dabeem yele ti fum lu Yinɛ vua wa nu'uhen.

³² Gee tiihɛ dabeha aŋa ha la, yan daa nyɛ niihum la, ya daa ŋmiberi mɛ la zika kãtɛ namehegɔ puan,

³³ saŋa se'ehi ba ni ba' diihe ya la vi nɛreba nɛŋan, la mɛlehegɔ, ti sahi se'ehi, ya naaɛ la sɛba ti ba ba' mɛleha.

³⁴ Se'ere en sɔi la, ya tari nimbu'ɔ mɛ bɔ'ɔra sɛba en boi paka deto puan, gee sakɛ la nyɛɛma ba han fãara ya lɔgerɔ, gee mina ti yamam mɛhi tari la sɛla en ani suŋa gee bɔna wuuha gana bala.

³⁵ Bala zuo, da bahɛ ya puti'irɛ dinɛ taaba, de tari la yɔɔrɛ kãtɛ kina na.

³⁶ Bala zuo, ya boti la ŋmibega, ti ya han ta tum Yinɛ sumboolum la ba'ahɛ, ya wan to'e nɔbiŋere la.

³⁷ Gee la kelum wan, “iŋɛ fii wa, ti se'em daana en ye' na la wan sirum wa'am na, gee kan gu'um;

³⁸ Gee mam tuuntɔɔ daana wa wan vɔna mɛ la sakerɛ. Mam sia ka nyɛɛni la se'em en lebere pooren.”

³⁹ Gee tumam ka pa'ahɛ sɛba en lebere pooren, ni ta bɔregɛ la, gee sɛba en tari sakerɛ, bala zuo nyɛ faarɛ la puan.