Hiburuduma 1 - ZE'ELEGO PAALEGA

Yinɛ tɔgɛ doohe la a dayua puan

¹ Diimen diimen ha la, Yinɛ da tɔgɛ bo' tu yaabeduma mɛ saŋa zo'e zo'e, la sadɔtɔ zo'e zo'e, dɔla nɔtɔgeheba puan,

² gee ba'ahegɔ dabeha wa puan, a tɔgɛ bo' tu doohe la a dayua puan, sɛka ti a looe ti ka sooe sɔna sɛla woo, se'em puan ti Yinɛ doohe naam sɛla woo en boi wa.

³ A dela Yinɛ suŋa niihum paaɛ paaɛ, dɛna Yinɛ vore vore, bahɛ ti sɛla woo bɔna, doohe a yelehum paŋa puan. Eŋa en duuhe saaleba be'em ba'ahɛ la, a zi'ire la Gani za'a Daana la zuɔ nu'o saazuin ha,

⁴ A gani suŋereba mɛ, wuu a yu'urɛ se'ere ti a to'e la en de yu'kãtɛ gana suŋereba yu'ura se'em la.

⁵ Suŋera kani ti Yinɛ tabelɛ yele en yeti, “Fum dela mam Dayua, zina, mam dɔgɛ hɔ”? Bii a tabelɛ yeti, “N wan dɛna a sɔ, ti a dɛna n Dayua”?

⁶ Le yɛ'ɛha, Yinɛ en yeti a ta bahɛ ti a dayɔkiima wa wa'am tiŋa wa zuo na la, a tɔgɛ bala yeti, “ Bahɛ ti Yinɛ suŋereba la za'a na'aha dayua wa.”

⁷ Yinɛ tɔgɛ a suŋereba yele yeti, “A iŋɛ a suŋereba ti ba dɛna la sabeeo, gee iŋɛ a yamehi ti ba dɛna bugum zɛlehi.”

⁸ Gee a dayua la, Yinɛ tɔgɛ eŋa yele yeti, “Fum na'am ka tari ba'ahegɔ, Oo Yinɛ wa, ti fum na'am doore la dɛna tuuntɔɔ doore.

⁹ Fum nɔŋɛ la tuntɔɔnɛ, gee yaaɛ be'em. Bala zuo, Yinɛ wa, fum Yinɛ la so fum zuo mɛ la nyɛɛma kaam gana fum taaba.”

¹⁰ Gee le yeti, “Pi'ileŋo puan na la, Daana, fum n biŋe timpaberɛ wa ɛ̃berɛ, ti saazuo wa dɛna fum nu'uhi tuuma;

¹¹ gee ba woo wan mɛlum gee fum boi mɛ. Ba woo wan ki ŋwana nuga wuu tanɛ la;

¹² wuu fuo ti ba ni kilum se'em la, fum wan kilum ba la bala, wuu futo en pelegere se'em la, bala mɛa ti ba wan tee. Gee fum kɔ'ɔm ana la fum ani se'em la, ti fum yuuma ka tara ba'ahegɔ.”

¹³ Gee suŋera kani ti Yinɛ tabelɛ yele en yeti, “Zi'ire n zuɔ nu'o na, gura ti n ta bahɛ ti fum dinduma lebege fum nama dafeere?”

¹⁴ Suŋereba la za'a dagi la sabeeo Sia tuuma la puan, ti Yinɛ tuna ba ti ba tuna bɔ'ɔra sɛba en wan ta sooe vaaɛ faarɛ la?