Efɛɛzɩ 3 - ZE'ELEGO PAALEGA

Pɔɔl tuuma

¹ Ŋwana wa zuo ti mam Pɔɔl bɔna paka deen bo' Kiresta Yezu, yamam sɛba n dagi Yuuduma wa zuo.

² Yelemɛŋerɛ, ya pun wum Yinɛ en doohe a zu'uhegɔ puan dikɛ tuunɛ iŋɛ mam nu'uhi yamam zuo,

³ la sugelum yele la ti a daa bahɛ ti mam baŋɛ dɛ doohe lilegere puan, mam gulehɛ yelesɛ'a fii wa zuo ha la.

⁴ Ku wan dɛna gɔŋɔ ti ya han kãalɛ, ya wan baŋɛ mam n bɔkɛ Kiresta sugelum yele la se'em.

⁵ Buuri sahi se'ehi n tole la, sugelum yele dina wa ka lilege de bo' saaleba wuu dinɛ n nyaa lilege se'em bo' a tuulum tuntuneba, la a nɔtɔgeheba doohe Fa'a Sia puan wa la.

⁶ De vuurɛ dela, sɛba n dagi Yuuduma wa nyaa lagum dɛna la sɛba en tari tɔtɛ, lagum dɛna iŋa kayima la nɛresɛba n wan lagum to'e nɔbiŋere lɔkɔ la Kiresta Yezu puan, faarɛ yelehum la zuo.

⁷ Faarɛ yelehum buna zuo, ti mam lebege yameŋa, Yinɛ zu'uhegɔ bo'olum la ti a dikɛ bo' mam doohe a paŋa tuuma la puan.

⁸ Gee la mam n pun pɔ'ɛ nɛresunduma la za'a puan la, Yinɛ dikɛ la zu'uhegɔ kuna bo' mam, ti n tari Kiresta tarega la n ka tari makerɛ la faarɛ yelesuma la na bo' sɛba n dagi Yuuduma la,

⁹ ti nɛra woo baŋɛ putɛ'se'ere n boi sugelum yele wa en sugɛ yuuma yuuma ha, Yinɛ se'ere n naam sɛla woo puan la,

¹⁰ ti la doohe lageŋɔ la puan, ti Yinɛ yɛm la n ka tari ba'ahegɔ la wan nyaa niiɛ bo' timbihereba, la kpɛ'ɛnduma n boi saazuo ha.

¹¹ Ŋwana wa iŋɛ doohe la a putɛ'se'ere n ka tari ba'ahegɔ, ti a tum dɛ tu Daana Kiresta Yezu puan la,

¹² se'em puan ti tu wan paaɛ Yinɛ nɛŋan la sukpe'ene ti dabeem ka bɔna, doohe tumam n sakɛ bo' en se'em.

¹³ Bala zuo, mam pu'uhɛ bɔ'ɔra ya mɛ, ti ya puti'irɛ da kɔ'ɔhɛ mam nameheri se'em ya zuo wa. Ba dela ya sum.

Pɔɔl pu'uhɛ bo' kãaleba

¹⁴ Ŋwana zuo, mam kpa' la duma Sɔ la nɛŋan,

¹⁵ se'em puan ti nɛra woo n boi saazuo ha la timpaberɛ wa zuo tara ba yu'urɛ.

¹⁶ Mam pu'uhegɔ dela, a wan ze'ele a tarega suŋa la puan, bo' ya sore ti ya tara paŋa ya puan, doohe Sia la puan,

¹⁷ ti Kiresta bɔna ya suya puan, sakerɛ zuo, wuu yan ba' nyɛga gee tara nɔŋerɛ puan se'em la.

¹⁸ Mam pu'uhegɔ dela, ya tara paŋa n wan ta'am bɔkera la nɛresunduma la za'a, ya faarɛ la yaleŋa, de girega, de woko la de kɔ'ɔlum,

¹⁹ gee me mina Kiresta nɔŋerɛ la n gani mi'ilum woo la, la ya ta'am pirɛ la Yinɛ naanɛ paaɛ paaɛ.

²⁰ Nananawa, eŋa se'em paŋa en tuni tu puan wa, wan ta'am tum zo'e zo'e bo' tu gana tumam n soke en bii ti'iha sɛla yele la.

²¹ Eŋa ti lageŋɔ la pɛgera, doohe Kiresta Yezu, la buuri woo, wuuha wuuha. Taari.