Aromduma 1 - ZE'ELEGO PAALEGA

Pu'uhegɔ

¹ Mam Pɔɔl, Yezu Kiresta da'aberɛ, ti Yinɛ ayi' mam ti n dɛna tuntuna, yehe mam ze'ele bo' Yinɛ Faarɛ yelehum la ma'a,

² yelehum sebo ti Yinɛ biŋe nuurɛ wunse'eren ha, doohe a nɔtɔgeheba puan, Fa'a gɔnɔ la puan la.

³ Faarɛ yelehum sebo en de Yinɛ dayua, se'em tuuhum en ze'ele Naba Deviti puan na la, wuu en de asaala la.

⁴ Doohe tuuntɔɔ sia puan, ba looe en mɛ ti a dɛna Yinɛ dayua, la paŋa, doohe en ihege a kum puan la, Ena daana dela Yezu Kiresta, tu Daana la.

⁵ Se'em puan ti tumam to'e zu'uhegɔ, la tuntuneba yɔ'ɔ, ti tu bahɛ ti timpaberɛ wa nɛreba za'a me nam, gee tara sakerɛ a yu'urɛ la puan.

⁶ Yamam mɛhi ti Yinɛ yi' ti ya dɛna Yezu Kiresta dinɛ wa pa'ahɛ bini mɛ.

⁷ Mam Pɔɔl n gulehɛ bɔ'ɔra la yamam sɛba woo ti Yinɛ nɔŋɛ ya, ti ya bɔna Arome tiŋa puan, ti Yinɛ yi' ya ti ya dɛna nɛresunduma la. Zu'uhegɔ dɛna ya dinɛ, ti suma'ahum en ze'eti Yinɛ en de tu Sɔ, la Daana Yezu Kiresta zi'an la dɛna ya dinɛ.

Pɛka Pu'uhegɔ

⁸ Yia, mam bo'ori Yinɛ fara Yezu puan ya za'a zuo, beni zuo, ya sakerɛ la yele to'e tiŋa wa zuo za'a mɛ.

⁹ Yinɛ wa ti mam tuna bɔ'ɔra dɛ la n sia za'a, doohe mam muuli a dayua Yezu yelehum wa, en de mam aze'nyɛdaana, ti mam ka malum tamena ya n pu'uhegɔ puan saŋa woo.

¹⁰ Sɔkera ti Yinɛ suboolum en de se'em la, n wan ba'ahum nyɛ sore ba'ahegɔ puan ta'am wa'am ya zi'an na.

¹¹ N ba' boti ni n nyɛ ni ya mɛ, la n tɔrɛ zu'uhegɔ puan bo'olum la ya, ti la kpemehe ya Sia puan.

¹² Bii tu lagum bugelɛ taaba la tu sakerɛ. Yamam sakerɛ, la mam sakerɛ.

¹³ Mam boti ya mina dina wa n suurɔ, ti saŋa zo'e zo'e ti n ni maahum ti n wa'am ya zi'an na, (gee ta paaɛ zina la gu'uri mam mɛ). N boti ni ti n wa'am ni na, la n bum sɛla ya puan bo' Yinɛ, wuu mam n bum se'em tihi sise'ehi nɛreba puan bo' Yinɛ la.

¹⁴ Mam tari la Giriki, la sɛba nini n ka yu'ɛ sanɛ, tara yɛmduma la sɛba en nan ka bɔkeri sanɛ.

¹⁵ Gee me le mu'ɛ nini ti n muulɛ faarɛ yelehum la bo' yamam sɛba me n boi Arome tiŋa wa.

Faarɛ yelehum wa Paŋa

¹⁶ Vi ka tari mam la faarɛ yelehum wa. Beni zuo, bu dela Yinɛ faarɛ paŋa, bo' se'em woo en tari sakerɛ, Yuuduma yia, gee nyaa bɔ'ɔra Girikiduma.

¹⁷ Bo puan ti Yinɛ tuntɔɔnɛ la niira, dɔla sakerɛ puan, wuu lan pun gulehɛ se'em yeti, “Se'emdaana en de tuuntɔɔ wan vɔna mɛ la sakerɛ la.”

Asaala tuure

¹⁸ Yinɛ sunsunyiim ze'ele la saazuo ha niiɛ bahɛ nɛre sɛba be'em la ba tuunfi'iha en gu'uri yelemɛŋerɛ la.

¹⁹ Se'ere en sɔi la, ban suni ti ba mina Yinɛ yele sɛ'a la, niiɛ bo' ba mɛ kpaii. Beni zuo, Yinɛ mɛŋa en niiɛ a bo' ba.

²⁰ Pɔhɛ Yinɛ n naam tiŋa wa se'em, a paŋa la en ka tari ba'ahegɔ, la a naanɛ la, la ban pun sugɛ la, gee asaala bɔkɛ a mɛ, gee nyɛ ba kpaii, doohe sɛla woo ti Yinɛ naam la puan. Ŋwana zuo, asaala ka tari a yeti eŋa ka baŋɛ mɛ.

²¹ Se'ere en sɔi la, la ban pun mina Yinɛ wa la, ba ka na'aheri en wuu a dela Yinɛ, bii ba bɔ'ɔra en fara fara, gee ba tugum lebege la nɛrefɔgerɔ ba ti'ihegɔ puan. Ti ba putɛ'vɔya la en ti'ihɛ yele yaalehi la pirɛ la lika.

²² Ba yeti bamam dela yɛm duma, gee ba tugum lebege la geto,

²³ nyaa tugum tee dikɛ na'ahegɔ seko en de Yinɛ vua wa na'ahegɔ la bo' naanɛ sɛ'a en ŋwani la asaala en kiiri, bii niihe, bii duhi en tari nama anaahi, bii bunvuula.

²⁴ Ŋwana zuo, ti Yinɛ dikɛ ba bo' ba kunkoma'ahum sebo ti ba suya bɔta la, dɛgerɔ tuuma la, ti ba tuna zufagehum tuuma la taaba.

²⁵ Se'ere en sɔi la, Ba tee Yinɛ yelemɛŋerɛ la en de se'em la mɛ bo' pumpɔreŋɔ, nyaa tugum na'aha gee malena malema bɔ'ɔra naanɛ, gee bahɛ naana la mɛŋa, se'em en nari pɛka saŋa woo la. Taari.

²⁶ Ŋwana zuo, ti Yinɛ dikɛ ba bo' zufagehum kunkoma'ahum, ti ba pɔgehi tee pɔka la buraa en naari taaba se'em la, bo' sadɔɔ seko en ka nari.

²⁷ Bala mɛa ti buraahi me tugum bahɛ ba naara la ba pɔgeba, gee tugum tara kunkoma'ahum la taaba, ti buraahi tuna zufagehum tuuma la ba burataaba, lageha namehegɔ kãtɛ biŋera ba mɛhi zuto ba tuure wa puan.

²⁸ Ban pun kelum ka bihɛ nyɛ ti la nari ba baŋɛ Yinɛ la, ti Yinɛ dikɛ ba bo' putɛ'ŋmɛlema dikɛ ba bo' yele yaalehi se'ehi en dagi ba tuna ma'a.

²⁹ Ba kɔ'ɔm pirɛ mɛ la tuunfi'iha yima yima, be'em, fãa, ti'iha be'em bɔ'ɔra nɛreba. Pirɛ la nintɛrega, kua, zaba, pã'ahegɔ, sɔtuuma, ba dela yelebibehi duma,

³⁰ Sagena nɛreba yu'ura, yaaɛ Yinɛ, tuura, ukerɛ, pa'ali mɛŋa, be'em maaheŋɔ, ka nana dɔgereba,

³¹ geto, nɔkɔ'ɔreba sukãberɛ, ka tara nɛreba giile

³² Ba mi' ti Yinɛ yeti, sɛba woo en iti yele ana wa dela ba ki, gee ba pun ka ita a ba ma'a, gee ba pɛgeri la sɛba me en ita a la.