Amatie 13 - ZE'ELEGO PAALEGA

Yinɛ sɔ'ɔlum makerɛ

¹ De daarɛ mɛa ti Yezu yehe yire ta zi'a ateko nuuren.

² Ti nɛrekuuŋɔ en ka tã ita lagehɛ a zi'an na, ti a zom uureŋɔ zuo zi'a bini gee ti nɛrekuuŋɔ la zɛ'a ko'om la nuuren.

³ Ti a yele ba yɛla zo'e zo'e mageha puan yeti, “Kelehe ya! Buta en yehe ti a burɛ.

⁴ Ti en buti la, ti bumbuura la basɛba zɔgɛ sore zuo, ti niihe wa'am na di ba.

⁵ Ti basɛba lu tahi zi'an, zi'an ti tintɔnɔ ka zo'e, Ti ba yehe kalam, tintɔnɔ en ka zo'e la zuo.

⁶ Gee wuntɛɛŋa en ŋmɛ na la, ba zɛkɛ mɛ, ba nyɛga en ka sige la zuo, ba ki mɛ.

⁷ Ti Bumbuura la basɛba zɔgɛ gu'uhi puan, ti gu'uhi la zo'e na kpãrɛ ba.

⁸ Ti Bumbuura la basɛba me zɔgɛ pu'uhegɔ zi'an yagum zuto, basɛba yagum zuto kɔbega kɔbega, ti basɛba yagum zuto piyoobe piyoobe, ti basɛba me yagum zuto pihitã pihitã.

⁹ Bahɛ ya ti se'em woo en tari tuba ti a wuna, a kɛleha.”

¹⁰ Pooren ti a zahereba la wa'am a zi'an na soke en yeti, “Ŋwani ti fum tara mageha tɔgera bɔ'ɔra nɛreba?”

¹¹ Ti a lerege ba yeti, “Han dɛna yamam, ba bo' yamam mɛ ti ya bɔkera saazuo sɔ'ɔlum la yele sɛ'a en sugɛ, gee ba ka bo' bamam bala.

¹² Se'ere en sɔi la, se'em en tari la, ba wan bo' en pa'ahɛ ti en malum tara gaŋɛ. Gee se'em me en ka tari sɛla la, La fii wa ti ba tara la, ba wan to'e la a zi'an.

¹³ Se'ere zuo ti mam tara mageha tɔgera bɔ'ɔra ba la dela, ‘Ba biheri, gee ba ka nyɛti, ba kɛlehi, gee ba wuni, bii ba bɔkera.’

¹⁴ Bana puan ti Azaaya yelefum la wa'am asira na. ‘Ya sirum wan kɛleha gee ya kan malum bɔkɛ, ya me sirum wan biha gee ya kan malum nyɛ.

¹⁵ Se'ere en sɔi la, nɛrebana wa puti'ira ba' ki mɛ, ti ba tuba kpa' ka wuna, ti ba kɔ'ɔm mum ba nini, ti ba da bihɛ la ba nini la, gee kɛleha la ba tuba la, gee bɔkera la ba suya, la ba ŋmɛregɛ lebena, ti en tibɛ ba.’

¹⁶ Gee sum boi yamam nini puan. Se'ere en sɔi la, i nyɛti, ti sum bɔna ya tuba puan, se'ere en sɔi la, a wuni.

¹⁷ Yelemɛŋerɛ ti en yɛta ya wa, nɔtɔgeheba, la nɛretuntɔɔ duma zo'e zo'e yuum boti ba nyɛ yamam en nyɛ sɛla wa mɛ, gee ka nyɛ la, gee bɔta ti ba wum yamam en wum sɛla wa, gee ka wum.

¹⁸ “Wum ya buta la makerɛ vuurɛ.

¹⁹ Se'em woo en ni wum sɔ'ɔlum la yɛla gee ka bɔkɛ a, Sagena la ni wa'am mɛ na zɛ sɛla ti ba burɛ a suuren la. Bana en de bumbuura sɛ'a en zɔgɛ sore zuo la.

²⁰ Han dɛna sɛba en zɔgɛ tahi zi'an la, dela se'em en ni wum yelefum la, to'e bu bilam bilam la nyɛɛma,

²¹ gee nɛre-ina daana wa nyɛga ka ba, gee a yeen ŋmibe la fii wa, gee daaŋɔ bii mɛlehegɔ han paaɛ en yelefum wa zuo, a duma ni lu mɛ bilam bilam.

²² Han dɛna sɛba en zɔgɛ gu'uhi puan la, eŋa dela se'em en wum yelefum la, gee ti tiŋa wa zuo yɛla nyɛlum la tarega pa'ahɛ la ni gu' yelefum la ti bu ka ta'am wam sɛla.

²³ Gee bumbuura sɛ'a ti ba burɛ pu'uhegɔ zi'an la, bamam en de sɛba en wum yelefum la gee bɔkɛ bɔ, bana en de sɛba en wam biili zo'e zo'e, ti sɛba yagum kɔbega kɔbega, ti sɛba me yagum piyoobe piyoobe, ti basɛba me yagum pihitã pihitã.”

²⁴ Yezu le dikɛ la makerɛ deyima biŋe ba yeti, “Saazuo sɔ'ɔlum la wan dikɛ makɛ mɛ la nɛra en burɛ a bumbuura suma a va'am puan.

²⁵ Gee yu'uŋɔ ti nɛrawoo ta giha la, ti dindaana kiŋɛ ta lobege mɔyileŋo pa'ahɛ ki la puan gee kiŋɛ.

²⁶ Bumbuura la en ta zo'e ita nini la, ti mɔyileŋo la me ihege na, lagum zɛ'a la ba.

²⁷ Ti yidaana la yamehi wa'am na yele en yeti, ‘Daana, fum ka burɛ la bumbuura suma va'am la puan? Gee mɔyileŋo la ze'ele la bɛ na?’

²⁸ Ti a lerege ba yeti, ‘Dima en tum de bala.’ Ti yamehi la yele en yeti, ‘Fum boti tu kiŋɛ ta vɔ mɔyileŋo la bahɛ?’

²⁹ Ti a lerege ba yeti, ‘Aayi,’ ya han ta vuura mɔyileŋo la, ki la wan lagum doohe.

³⁰ Bahɛ ya ti ba za'a lagum zɔ'ɔra gura buŋa saŋa. Buŋa saŋa la, en wan ta yele buneba la yeti, ‘Kɛ̃ ya mɔyileŋo la yia bobe ba bobene bobene ba nyɔ', gee nyaa bum dia la iŋɛ en bããren.’ ”

³¹ Ti a le dikɛ makerɛ deyima biŋe ba yeti, “Yinɛ sɔ'ɔlum la ani wuu nangembiileho ti nɛra burɛ a va'am puan,

³² Biiliho buna wa pɔ'ɛ mɛ biila wuu puan, gee bu han yehe na, bu ni dɛna la tuntuo kãtɛ, nyaa ta lebege tia, ti niihe nyaa ni wa'am na tɛ' ba tugerɔ ka zuo.”

³³ Ti Yezu le yele ba makerɛ deyima yeti, “Yinɛ sɔ'ɔlum la ani me wuu dabelɛ fii ti pɔka dikɛ gɛregɛ wama atã zom, ti bu bahɛ ti zom la za'a ihege se'em la.”

³⁴ Yezu yele nɛrekuuŋɔ la yele ana za'a la mageha puan, a ka tɔgɛ se'ere bo' ba ka dikɛ doohe mageha puan.

³⁵ Dina iŋɛ ti nɔtɔgeha la purega la wa'am asira na. A yuum purɛ yeti, “Mam wan ya'ɛ en nuurɛ tɔgɛ la mageha, N wan muulɛ sɛla en sugɛ tiŋa wa pi'ileŋo na.”

³⁶ Ti Yezu bahɛ nɛrekuuŋɔ la gee kiŋɛ ta kɛ̃ yise'ere ti a kɛ̃'ɛ̃ra la. Ti a zahereba la paaɛ soke en yeti, “Garehɛ bu tɔ va'am puan mɔyileŋo makerɛ la vuurɛ.”

³⁷ Ti a lerege ba yeti, “Se'em en burɛ bumbuulesuma la dela Asaala Dayua la.

³⁸ Va'am la dela timpaberɛ wa, ti bumbuulesuma la dɛna sɔ'ɔlum la kɔma, ti mɔyileŋo la dɛna Sagena la kɔma,

³⁹ dima la en burɛ mɔyileŋo la dela Sagena la, ti buŋa la me dɛna timpaberɛ wa ba'ahegɔ saŋa, ti buneba la dɛna Yinɛ suŋereba.

⁴⁰ Wuu mɔyileŋo la ti ba lagehɛ nyɔ' se'em la bugum la, la wan ta ana la bala tiŋa wa ba'ahegɔ saŋa.

⁴¹ Asaala dayua la wan ta tum a suŋereba na, ti ba doohe a sɔ'ɔlum la puan lagehɛ sɛla woo en baheri ti nɛreba tuna be'em, la tuumbe'ero duma la za'a yehe a sɔ'ɔlum la puan,

⁴² nyaa tari ba ta lobe bahɛ bugum peelum la puan. Bilam ti ba wan kaaha gee ɔbera nyɛna.

⁴³ Gee tuntɔɔduma la wan ta nyakera mɛ wuu wuntɛɛŋa ba Sɔ sɔ'ɔlum la puan. Bahɛ ti se'em woo en tari tuba ti a wuna, kɛleha.

⁴⁴ “Saazuo sɔ'ɔlum la ani mɛ wuu tuulum lɔkɔ en sugɛ va'am puan, ti nɛra ayima ta nyɛ kɔ malum sugɛ kɔ, gee nyaa nyɛɛna lɛbera, ta paaɛ vaaɛ sɛla woo ti a tara ta koohe ta da' zi'an la.

⁴⁵ “Le yɛ'ɛha, saazuo sɔ'ɔlum la ani wuu lɛɛba en eeri tuulum nunɔm lɔgesunɔ.

⁴⁶ En ta nyɛ tuulum lɔkɔ kuyima en ba' ana suŋa la, a kiŋɛ mɛ ta koohe sɛla woo ti a tara, wa'am na da' kɔ.

⁴⁷ “Le yɛ'ɛha, saazuo sɔ'ɔlum la ani mɛ wuu yuka ti ba dikɛ lobe mɔgerɛ puan nyɔgɛ zim buuri buuri la.

⁴⁸ Yuka la en ta pirɛ la, ba ve'e ka mɛ dooe doone na, nyaa zi'ire gahɛ zim suma la iŋɛ ba pitɔ puan, gee lobe bumbe'ero la bahɛ.

⁴⁹ Lan wan ta ana se'em ba'ahegɔ saŋa la en bala. Yinɛ suŋereba la wan ta wa'am na, yelehe be'emduma la tuntɔɔduma la puan,

⁵⁰ lobe ba bahɛ bugum peelum la puan, zi'an ti ba wan ta kaaha gee ɔbera nyɛna.

Lɔgepaala la lɔgekɛgehi

⁵¹ “Yamam bɔkɛ yele ana wa za'a?” Ti ba lerege yeti, “Ɛ̃ɛ.”

⁵² Ti a yele ba yeti, “Bala zuo, gɔnmina se'em woo en zamehɛ mina saazuo sɔ'ɔlum wa yɛla ani wuu Yidaana en gbɛ'ɛri lɔgepaala la lɔgekɛgehi a lɔgerɔ puan yɛhera na la.”

⁵³ Yezu en ba'ahɛ mageha ana wa la, a bahɛ bilam mɛ.

Ba zagehɛ Yezu Nazareti

⁵⁴ Ti Yezu wa'am a mɛŋa tiŋa na, pɔhɛ pa'ala nɛreba zamehegɔ yiya la puan ti la iŋɛ nɛreba la pakerɛ zo'e zo'e. Ti ba yɛta yeti, “Burakana nyɛ yɛm buna wa la paŋa tuun-ana wa la bɛ?

⁵⁵ Dagi ena en de kpa'ara la dayua la? Dagi a ma yu'urɛ n yi'iri Mɛɛri la? Dagi a suurɔ en de Yemesi, Yosefe, Simɔn la Yudasi?

⁵⁶ Dagi a suurɔ za'a en naaɛ la tɔ kɛ̃'ɛ̃ra wa? Bɛha, ti buraa kana wa nyɛ yele ana za'a?”

⁵⁷ Ti ba zeem en, ti Yezu lerege ba yeti, “Nɔtɔgeha tari na'ahegɔ mɛ zi'an woo, han dagena a mɛŋa tiŋa bii a mɛŋa yiya puan ma'a.”

⁵⁸ Ŋwana zuo, Yezu ka tum daalehum tuuma zo'e bilam, ban ka nam bo' en la zuo.