Amatie 11 - ZE'ELEGO PAALEGA

¹ Yezu en ta pa'alɛ a zahereba pia la ba yi' la ba'ahɛ la, a ze'ele bilam kiŋɛ ta pa'ala mɛ gee muula a yelefum la ba tinkãra puan.

Yɔn Ko'sɔɔra tum a bitunehi na

² Nananawa, Yɔn en boi pakadeen la gee wum sɛla ti Kiresta la, ita la, a bo' la a zahereba la nuurɛ,

³ yeti, “Fum n bala wan wa'am na la bii tu gura ayima?”

⁴ Ti Yezu lebehe ba yeti, “Kiŋɛ ya ta yele Yɔn ya wum gee nyɛ sɛla,

⁵ fɔɔhi nini pigehɛ mɛ, ti kɔɔrenɔ kina, ti kunkɔma nyɛ tibegɔ, ti wahi wuna, ti kum ihege, ti naheduma wum faarɛ yelefum la.

⁶ Sum boi la se'em en ka piti luta mam zuo.”

Yezu pɛgɛ Yɔn Ko'sɔɔra

⁷ Ban ye' lɛbera la, ti Yezu pɔhɛ tɔgera Yɔn yele bɔ'ɔra nɛrekuuŋɔ la yeti, “Beni ti yamam yuum kɛ̃ muuen la ha ti ya ta bihɛ? Muɔ ti sabeeo tara vɛgelena bii?

⁸ Gee ya yuum kɛ̃ muuen la ha ti ya ta bihɛ la beni? Nɛra en bagɛ ka mɛŋa la banaahi? Bihɛ ya, sɛba en bagerɛ banaahi zi' la na'am yiya.

⁹ Gee ya yuum tugum yehe ti ya bihɛ la beni? Nɔtɔgeha? Ɛ̃ɛ, en yeti ya me wa, a gani nɔtɔgeha.

¹⁰ Nɛre kana en bala ti ba gulehɛ a yele yeti, ‘Bihɛ ya, en tuni la n bituneŋa ti ka diŋɛ fum nɛŋa, Se'em en wan maalɛ fum sore biŋe fum.’

¹¹ En yeti ya la yelemɛŋerɛ wa, ti asaala woo ti pɔka dɔgɛ, se'em ka boi ihege na tabelɛ tara zuo gana Yɔn Ko'sɔɔra wa. Gee la bala za'a, se'em en pɔ'ɛ saazuo sɔ'ɔlum puan la gani en.

¹² Kɔ'ɔm ze'ele Yɔn Ko'sɔɔra saŋa la wa'am na paaɛ zina, saazuo sɔ'ɔlum la kɔ'ɔm bɔna la gbiregeri puan. Ti sɛba en pɛregɛ la en nyaŋɛ bɔ.

¹³ Se'ere en sɔi la, Nɔtɔgeheba la nɔze'elego la za'a purɛ la bala ti Yɔn ta wa'am na.

¹⁴ Ya han wan sakɛ, eŋa en bala en de Eliya ti ba yuum purɛ ti a wan lebe na la.

¹⁵ Se'em woo en tari tuba, a kɛleha!

¹⁶ “Gee beni ti en wan dikɛ yamam zina beere nɛreba wa makɛ? Ya ani woo kɔma en zi' da'a yi'ira taaba yeti,

¹⁷ ‘Tumam peebe la yia bahɛ ya, gee ya ka wa; ti tu kaahɛ, gee ya ka kele kuunɔ.’

¹⁸ Se'ere en sɔi la, Yɔn yuum wa'am na ka dita ka nyuura ti ba yeti ‘Kulekpa'bɛ'a en dole en.’

¹⁹ Ti Asaala Dayua wa'am na dita gee nyuura, ti ba yeti, ‘Bihɛ ya, a dela puya'an daana la danyuura. A dela kubetɔ'ɔhereba la be'emduma zɔ.’ Gee la bala za'a, Yɛm daana tuuma en bo'ori en buurɔ.”

Yele boi tihi zuto

²⁰ Ti Yezu pɔhɛ zɛregera tinse'ehi ti a paŋa tuuma tum si puan zo'e, beni zuo ti nɛreba la zagehɛ teere la.

²¹ “Yele boi yamam Korazinduma zuo! Yele boi yamam Bɛtesaadaduma zuo! Se'ere en sɔi la, paŋa tuuma ana taaba wa han tum ni la Taai la Sidɔn tihi puan, ŋwana ma'a ba tee ni tole tole, gee yɛ susageŋɔ futo, vaaɛ tampɛgɛlum yeele ba mɛhi, pa'ali ti ba tee ya.

²² Gee en yeti ya mɛ wa ti, gakerɛ daarɛ, la wan ana ma'ma' bo' Taai la Sidɔn tihi gana yamam.

²³ Yamam Kapɛnumduma wa, Yamam ti'ihɛ ti ya wan kɔ'ɔm zɛkɛ ya mɛhi mɛ zom saazuo? Aayi, ba wan tari ya na bahɛ la ki'intiŋa. Se'ere en sɔi la, paŋa tuunsɛ'a en tum bo' ya la han tum ni la Sodom tiŋa puan, ka wan boni na paaɛ zina.

²⁴ Gee en yeti ya mɛ wa, ti gakerɛ daarɛ, la wan ta ana ma'ma' bo' Sodom tiŋa gana yamam.”

Yezu bo' a Sɔ fara fara

²⁵ Sankana puan, ti Yezu tɔgɛ yeti, “Mam bo' n Sɔ saazuo la tiŋa za'a Daana, fara fara se'ere zuo, fum dikɛ yele ana sugɛ yɛm la mi'ilum duma mɛ, gee tugum lilege a bo' kɔmbilɛɛhi.

²⁶ Ɛ̃ɛ n Sɔ, fum zu'uhegɔ suboolum en pun daa dɛna se'em n bala.

²⁷ Mam Sɔ dikɛ sɛla woo iŋɛ la mam nu'uhen. Nɛra ka mi' dayua la, han dagena Sɔ la. Nɛra me ka mi' Sɔ la, han dagena dayua la, la se'em ti dayua la bɔta ti a lilege Sɔ la pa'alɛ en.

²⁸ “Wa'am ya en zi'an na, yamam sɛba woo n taregɛ gee zɛ zeero, n wan bo' ya vo'ohego.

²⁹ Dikɛ ya mam yɔka la yɔgɛ ya mɛhi, gee zamehɛ mam zi'an, Se'ere en sɔi la, mam dela nɛre ma'ma', gee sigehe n mɛŋa n suure puan. Ya wan nyɛ vo'ohego bo' ya sɛɛhi.

³⁰ Se'ere en sɔi la, Mam yɔka la dela naana, ti n zeero la fakɛ.”