Aluki 23 - ZE'ELEGO PAALEGA

Yezu paaɛ Palete nɛŋan

¹ Ti tiŋa la tiiheŋɔ la naaɛ nuurɛ, tari Yezu wa'am Palete zi'an na.

² Nyaa pɔhɛ zuuha Yezu bɔ'ɔra naba la yeti, “Tu nyɛ buraa wa mɛ ti ka gbiregeri tu tiŋa wa, gu'ura tumam ti tu da yɔɔra kuba bɔ'ɔra Kaiza wa, gee yɛta yeti, Eŋa en de Kiresta la, dɛna naba.”

³ Ti Palete soke en yeti, “Fum en de Yuuduma naba la?” Ti Yezu lerege yeti, “Fum yele la bala wa.”

⁴ Ti Palete yele malema kiinduma la, la nɛrekuuŋɔ la yeti, “Mam ka nyɛ se'ere ya zuuhego la woo puan ti ya zuuhe buraa wa la.”

⁵ Gee ba malum tahera mɛ baha na yeti, “A gbiregeri la nɛreba la a pa'alegɔ la Yuda puan za'a, pɔhɛ Galilii tara tara la ka'lam na la.”

Yezu paaɛ Hɛrɔd nɛŋan

⁶ Palete en wum ŋwana la, a soke ba me nyaa buraa wa dela Galiliiŋa.

⁷ En ta baŋɛ ti Yezu yehe la Hɛrɔd sɔ'ɔlum puan na la, a bo' la sore ti ba tari en kiŋɛ Hɛrɔd zi'an, bala ma'a ti Hɛrɔd mɛŋa pun wa'am la Yerusalɛm na.

⁸ Hɛrɔd en ta nyɛ Yezu la, a puurɛ pee mɛ, se'ere en sɔi la, a gu'uhi ti a nyɛ Yezu ti la yuue mɛ. Se'ere en sɔi la, a wuni la a yele, bɔta ti a nyɛ en ti a tum daalehum ti a nyɛ.

⁹ Ti a soke Yezu sɔgeha ta paaɛ beene deyima, gee Yezu ka lebehe en sese'ere.

¹⁰ Ti malema kiinduma la, la gɔnmi'ineba la kɔ'ɔm mu'ɛ nini zuuha Yezu.

¹¹ Ti Hɛrɔd la a pɛntiireba la pun ta ita en sɛla en ka ani suŋa, gee kɛha en, dikɛ na'am fuo yɛɛlɛ en, gee bahɛ ti ba tari en lebe Palete zi'an.

¹² Daan dina daarɛ en de Palete la Hɛrɔd nyɔgɛ zɔtɔ, gee ba ni dɛna la dataahi la taaba.

Yezu kum gakerɛ

¹³ Ti Palete yi' malema kiinduma, la Yizuto kima la, la nɛreba la woo lagehɛ na,

¹⁴ yele ba yeti, “Ya tari buraa kana wa na bo' mam ti a dela nɛra en pã'ahɛ nɛreba, bihɛ ya ti mam me soke en ya nɛŋan, gee n ka nyɛ tuure, yele sɛ'a woo ti ya dikɛ zuuhe en la puan.

¹⁵ Hɛrɔd me ka nyɛ tuure se'ere a puan, gee le tulege en bo' tu na wa. Yelemɛŋerɛ, a ka iŋɛ sɛla ti la nara a ki.

¹⁶ Bala zuo, n wan bahɛ ti ba ŋmɛ' en, gee ti n bahɛ en.” [

¹⁷ Gee a wa tara la sore ti a yehe nɛra sankaŋa de'eŋo saŋa wa puan mɛa, paka deo la puan bahɛ. Diimen diimen gulehegɔ la tuseto ka tari ŋwana.]

¹⁸ Bala ti nɛreba la naaɛ nuurɛ voole bahɛ na yeti, “Tari ya burakana wa kiŋɛ ha. Gee yehe ya Barabase bahɛ bo' tu!”

¹⁹ (Bura kana wa dela buraa ti ba pagɛ ka, doohe la en gbiregeri tiŋa, la nɛrekua zuo.)

²⁰ Ti Palete en boti a yehe Yezu bahɛ la zuo, ti a tɔgɛ la nɛreba wa le yɛ'ɛha,

²¹ gee ba kɔ'ɔm taha baha me na yeti, “Kpa' ya en, Kpa' ya en.”

²² Ti Palete le tɔgɛ bo' ba sugum nuuren butã yeti, “Ŋwani, Beni be'em ti a tum? Mam ka nyɛ en tuue se'ere ti tu wan ta'am ze'ele de zuo ku en. Bala n wan bahɛ ti ba ŋmɛ' en gee bahɛ en.”

²³ Gee nɛreba la mu'ɛ la nini gaŋɛ bala, tahera baha na yeti, “A dela ba kpa' en,” ba voole la bala ta nyaŋɛ.

²⁴ Ti Palete ta ku yeti, bamam en boti se'em la tum.

²⁵ Gee yehe buraa sɛka ti ba bɔta ti a yehe bahɛ la bahɛ. Buraa sɛka ti ba pagɛ ka doohe gbiregeri, la nɛrekua yɛla la, gee dikɛ Yezu bo' ba wuu bamam en boti se'em la.

Yezu kpa'a

²⁶ Ban tari en yɛ'a la, ba gurɛ la buraa kayima yu'urɛ en yi'iri Simɔn, yehe Saarin tiŋa, kɔ'ɔm ze'ele bo' en kina na, ti ba gurɛ en. To'e pumpuuredɔɔ la ziile en, ti a ziira ku dɔla Yezu poore.

²⁷ Ti nɛrekuuŋɔ en ka ta'am kãalɛ dɔla poore, ti pɔgehi bɔna bini kaaha gee nyɔna zɔ'ɔra.

²⁸ Gee Yezu ŋmɛregɛ mɛ bihɛ ba gee yeti, “Yerusalɛm poyɔɔhi wa, da kele ya bɔ'ɔra mam, gee tugum kele ya bɔ'ɔra ya mɛhi la ya kɔma.

²⁹ Bihɛ ya, se'ere en sɔi la, dabeha sirum kini na, ti ba wan ta yeti, ‘Sum boi mɛ la kundɔgereba puya sɛ'a en ka tabelɛ dɔgɛ, sɛba en ka makɛ dɔgɛ, la sɛba en ka tabelɛ mɔgehɛ bia.’

³⁰ Nɛreba wan ta pɔhɛ yɛta zɔya wa yeti, ‘Lu ya tu zuo na’; gee yɛta zɔbibehi me yeti, ‘Pi' ya tu na.’

³¹ Ba han ita dɔma'aherɛ ŋwana, la nyaa yeti la ana la ŋwani bo' dɔkɛ'ɛŋa?”

³² Nɛreba bayi me en de tuunfi'iha duma, ti ba tari ba yɛ'a ti ba ku ba la en.

³³ Ti ba wa'am na paaɛ zi'an ti ba yi'ira zuwama zi'an la, ti ba kpa' Yezu bilam, la tuunfi'iha duma la, ti ayima bɔna Yezu zuɔ, ti ayima bɔna a gɔbega. [

³⁴ Ti Yezu nyaa yeti, “N Sɔ, di sugeri bo' ba gee ba ka mi' ban iti sɛla.”] Ti pɛntiireba la ŋmɛ' gbaŋa ti ba tɔrɛ Yezu en yɛ lɔge seto la.

³⁵ Ti nɛreba zɛ'a zaaɛ zaarɛ gee biha na. Gee ti nɛheduma la tuura yeti, “A ka tã faara la sɛba baha, bahɛ ya ti a faaɛ a mɛŋa bahɛ, a han sirum dɛna Yinɛ Kiresta la, se'em ti a looe la.”

³⁶ Ti pɛntiireba la me kɛha en, tari daam mi'ihego zom ta bɔ'ɔra en,

³⁷ gee yɛta en yeti, “Fum han sirum dɛna la Yuuduma naba, faaɛ fum mɛŋa.”

³⁸ Ba me daa gulehɛ la gulehegɔ kpa' dɔɔ la zuo Yezu zuin yeti, “Yuuduma naba la en ŋwana.”

³⁹ Ti tuunfi'iha duma bayi la ayima ti ba lagum kpa' la kɔ'ɔm tuura Yezu gee yɛta yeti, “Fum dagi la se'em ti Yinɛ looe la, Faaɛ fum mɛŋa, gee faaɛ tumam me.”

⁴⁰ Ti tuunfi'iha duma la ayima la tahɛ ena la yeti, “Fum ka zoti Yinɛ, fum la eŋa en lagum to'e sageŋɔ namehegɔ kuyina wa?

⁴¹ Tumam namehegɔ wa dela de sore, se'ere en sɔi la, tumam to'ore la tu tuuma yɔɔrɛ en bala, gee buraa kana wa ka tuue se'ere.”

⁴² Gee nyaa yeti, “Yezu, ta tɛra n yele, fum han ta bɔna fum sɔ'ɔlum la puan.”

⁴³ Ti Yezu lerege en yeti, “Yelemɛŋerɛ ti n yɛta fum wa, ti zina, fum wan bɔna la mam ze'suŋa puan.”

Yezu kum

⁴⁴ Wuntɛɛŋa en wa bɔna wuu zuo tiŋasuka la, ti lika wa'am na pi' tiŋa la za'a gbareti, tara tara la gogo kaareŋa atã wuntɛɛŋa.

⁴⁵ Ti wuntɛɛŋa iŋɛ lim, ti tanɛ se'ere en yule beŋe pu'uhegɔ yire puan la ahegɛ buyi'.

⁴⁶ Ti Yezu kaahɛ la kɔkɛ'ɛŋa yeti, “N Sɔ, fum nu'uhen ti n bahera n sia.” En yele ŋwana ba'ahɛ la, a vo'ohe la a ba'ahegɔ vo'ohego.

⁴⁷ Ti pɛntiira wa en biheri pɛntiireba kɔbega wa la en ze' bini gee nyɛ sɛla woo en iŋɛ se'em la, ti a dikɛ pɛka bo' Yinɛ yeti, “Yelemɛŋerɛ, nɛra wa ka tari tuure.”

⁴⁸ Ti nɛrekuuŋɔ la en lagehɛ bilam na gee nyɛ sɛla woo en iŋɛ se'em la, lɛbera kula gee ɔbera nyɛna.

⁴⁹ Gee sɛba en lɛm la Yezu la, la pɔgehi la en doohe la en ze'ele Galilii na la woo ze' la kinkɛleŋa ha gee biha yele ana woo.

Yezu pi'a

⁵⁰ Buraa kayima en me boi, dɛna nɛretuntɔɔ la nɛresuŋɔ ti ka yu'urɛ yi'ira Yosefe. La en pun lagum dɛna tiŋa la kima ayima la,

⁵¹ a ka lagum sakɛ bo' ba puti'irɛ la, la ba itegɔ la. Buraa wa yehe la Yuda tiŋa kayima en yi'iri Arimatiya, daa gura la ninmu'urɛ ti Yinɛ sɔ'ɔlum la wa'am na.

⁵² Buraa kana wa en kiŋɛ Palete zi'an ta yele en Yezu iŋa la yele.

⁵³ Gee nyaa yakɛ Yezu iŋa la, pɔbɛ ka la tansaalega en de pɛɛlega, tari ta biŋe yɔɔ ti ba kibegɛ taŋa puan, ti ba nan ka tabelɛ biŋe kum ku puan.

⁵⁴ Didaarɛ dela maaheŋɔ saŋa, ti vo'ohego la me pɔhera.

⁵⁵ Ti pɔgese'ehi en doohe Yezu ze'ele Galilii na la, doohe ta nyɛ yɔɔ la, la ban biŋe Yezu iŋa la se'em.

⁵⁶ Gee nyaa lebe kule, ta maalɛ kaam en tari nyuuŋo suŋɔ. Vo'ohego daarɛ la, ba vo'ohe mɛ wuu nɔze'elego la en pa'alɛ se'em la.