2 Zã 1 - ZE'ELEGO PAALEGA

Pu'uhegɔ

¹ Kiima la en gulehɛ bɔ'ɔra pɔgesɛka ti Yinɛ looe la, la ka kɔma, ti mam nɔŋɛ ba yelemɛŋerɛ la puan. Dagi mam ma'a, la sɛba woo en me mi' yelemɛŋerɛ la.

² Yelemɛŋerɛ la en boi tu puan la zuo, gee wan bɔna la tu wuuha la zuo.

³ Zu'uhegɔ, nimbɔ'zɔrɛ la suma'ahum en ze'ele Yinɛ en de Sɔ la, la Yezu Kiresta en de Sɔ la dayua la zi'an na wan bɔna la tɔ, yelemɛŋerɛ la nɔŋerɛ puan.

Yelemɛŋerɛ la nɔŋerɛ

⁴ Mam puurɛ ba' pee mɛ la mam en nyɛ fum kɔma la basɛba en kinɛ yelemɛŋerɛ la puan, wuu Sɔ la en bo' tu nuurɛ se'em la.

⁵ Gee nananawa, pɔge mɛnka wa, mam yeen suhera fum mɛ gee dagi la n gulehɛ la nɔze'elego paalega bɔ'ɔra hɔ, gee se'ere ti tu tara pi'ileŋo na la yeti, bahɛ ya ti tu nɔŋɛ taaba.

⁶ Nɔŋerɛ n ŋwana, ti tu vɔna dɔla a nɔze'elego la, nɔze'elego la dela, wuu fum wum de se'em pi'ileŋo na la, dɔla a.

⁷ Pumpã'ahum duma zo'e zo'e en wa'am tiŋa wa zuo na, sɛba en ka sakɛ ti Yezu Kiresta wa'am inganɛ puan na. Nɛre-ina daana dela pumpã'aha, la Kiresta dindaana la.

⁸ Biheri ya mɛhi suŋa, la ya da bɔregɛ sɛla ti tumam tum bo' ya ti ya tara la, gee ya wan to'e yɔɔrɛ la za'a.

⁹ Se'em woo en ka dole Kiresta pa'alegɔ la gee zɔɛ ku, ka tari Yinɛ a puan. Se'em woo en dole pa'alegɔ la, gee bɔna ku puan, tari Sɔ la mɛ, la Dayua la mɛ a puan.

¹⁰ Da to'e se'em en wa'am fum yire na, bii fum kã sum bo' se'em en wa'am fum zi'an na gee ka tara pa'alegɔ kuna.

¹¹ Se'ere en sɔi la, fum han kan' sum bo' nɛre-ina daana, fum lagum tuna la a daana be'em la mɛ.

Ba'ahegɔ pu'uhegɔ

¹² La mam en pun tara yɛla zo'e zo'e ti n gulehɛ bo' ya la, n kan gulehɛ a gɔŋɔ puan, gee n iŋɛ puti'irɛ ti n wa'am ya zi'an na tɔgɛ bo' ya, ya nini, ti tu pupeelum la pirɛ.

¹³ Fum suuɔ kɔma sɛba ti Yinɛ looe la pu'uhi fum na.