2 Tesaloniki 1 - ZE'ELEGO PAALEGA

Pu'uhegɔ

¹ Mam Pɔɔl, Silevanuse, la Timoti, en gulehɛ gɔŋɔ wa bɔ'ɔra Tɛsalonikaduma lageŋɔ la n boi doohe Yinɛ en de tu Sɔ la, la tu Daana Yezu Kiresta paŋa puan la.

² Zu'uhegɔ bɔna la ya, ti suma'ahum en ze'ele Yinɛ tu Sɔ, la tu Daana Yezu Kiresta zi'an na bɔna la ya.

Fara bu'a

³ Tu dela tu bo' Yinɛ fara saŋa woo ya zuo n suurɔ, wuu lan nari se'em. Beni zuo, ya sakerɛ la zo'ore mɛ yabera, ti ya woo en nɔŋɛ taaba se'em la malum pa'aha.

⁴ Ŋwana zuo, tumam mɛhi ŋmɛ'ɛri la nyɔ' ya zuo, Yinɛ lageŋɔ la puan, la yan sɛ ze'ele kankaŋi gee tara sakerɛ ya mɛlehegɔ a too seko puan ti ya ŋmibera wa.

Kiresta gakerɛ la kini na

⁵ Ŋwana en de daalehum bo' Yinɛ tuuntɔɔ gakerɛ la, a maahum ti a bahɛ ti ya nara mɛ la Yinɛ sɔ'ɔlum la, ti ya me namehera bu zuo la.

⁶ La dela ma'a bo' Yinɛ ti a lerege pɔgeleŋɔ bo' sɛba en pɔgelum ya la,

⁷ gee bo' sɛba ti ba pɔgelum la me fai, ta ta' la tumam me, Daana Yezu han ta ze'ele saazuo niiɛ na, la a suŋereba bumpahi la.

⁸ Kina na la bugum en diti zigi zigi, lɛregera sɛba en ka mi' Yinɛ, la sɛba en ka nam Daana Yezu faarɛ yelehum la.

⁹ Bana n wan ta nyɛ namehegɔ n ka tari ba'ahegɔ sageŋɔ la. Sɛba ti ba yelege ba Daana la nɛŋan, a suŋa, la a paŋa la puan.

¹⁰ De daarɛ la, a han ta wa'am na ti a Niiɛ a suŋa la, a suŋa la wan niiɛ a nɛresunduma la puan, ti sɛba woo en nam zɛ'a yɛli a suŋa la zuo, se'ere en sɔi la, ya nam tumam aze'nyɛ muulegɔ la mɛ.

¹¹ Lan paaɛ ŋwana beene la, tu pu'uheri saŋa woo mɛ bɔ'ɔra ya, suhera ti Yinɛ wan bahɛ ti ya nara la a yi'a la ti a yi' la. A wan doohe a paŋa la puan bahɛ ti ya putɛ'suma la ya sakerɛ tum,

¹² ti tu Daana Yezu yu'urɛ la nyɛ na'ahegɔ ya puan, ti yamam me nyɛ na'ahegɔ a puan, doohe tu Yinɛ zu'uhegɔ, la tu Daana Yezu Kiresta puan.