1 Zã 1 - ZE'ELEGO PAALEGA

Vom yelehum

¹ Tumam muuli la se'em en daa pun bɔna pi'ileŋen ha yele, se'em yele ti tumam wum, se'em ti tumam nyɛ la tu nini, se'em ti tu bihɛ, gee gurɛ en la tu nu'uhi. Yelemɛŋerɛ, eŋa en de vom yelehum la.

² Vom buna wa, Yinɛ daa niiɛ bu mɛ na, ti tumam nyɛ bɔ, dɛna bu aze'nyɛduma, muula bu bɔ'ɔra ya, Yinɛ vom sumɔ en kan ba'ahɛ wa en daa boi la Yinɛ en de Sɔ la nyaa niiɛ bɔ bo' tu.

³ Le yɛ'ɛha tumam muuli la sɛla ti tu nyɛ gee wum bɔ'ɔra ya, ti yamam me bɔna la tɔ kankaŋi, gee yelemɛŋerɛ, tu boi mɛ la Yinɛ en de Sɔ la, la a Dayua Yezu Kiresta la kankaŋi.

⁴ Tu gulehɛ yele ana wa, ti la bahɛ ti tu nyɛɛma en pirɛ.

Yinɛ dela niihum

⁵ Sɔɔleŋa sɛka ti tumam wum a zi'an n ŋwana ti tu muula bɔ'ɔra ya wa ti, Yinɛ dela niihum, ti a puan, lika ka boi la fii wa me.

⁶ Tu han yeti tumam boi mɛ la en kankaŋi, gee bɔna lika puan, tu pareni mɛ, gee ka tuna yelemɛŋerɛ.

⁷ Gee tu han vɔna niihum la kankaŋi, wuu eŋa mɛŋa en boi niihum puan se'em la, tu wan bɔna taaba kankaŋi, ti a Dayua Yezu ziim la pɛɛra tɔ, tuure woo puan bahera.

⁸ Tu han yeti tu ka tari tuure, tu pã'ahɛ la tu mɛhi, ti yelemɛŋerɛ ka bɔna tu puan.

⁹ Gee tu han purɛ tu tuure la, eŋa se'em daana en de yelemɛŋerɛ la tuuntɔɔ daana la, wan di sugeri bo' tu tuure la gee pee tu yehe sɛla woo en dagi ma'a puan.

¹⁰ Tu han yeti tumam ka tari tuure, tu iŋɛ en la pumparuma, ti a yelehum la ka bɔna tu puan.