तीतुस 3 - Garhwali

बिस्वासी लोगु को चाल-चलन

¹ अर तीतुस, ऊं लोगु तैं इन भि याद दिलौ, कि ऊ राजा अर अधिकारी लोगु का अधीन मा रा, अर ऊंकी आज्ञा को पालन कैरा। अर हरेक भला काम करणु खुणि तयार रा।

² अर कैतैं बदनाम करण वळा नि बणा, अर लड़ै-झगड़ा करण वळा ना हो पर शान्त सभौ का हो, अर नमर बणि के सब मनखियों का दगड़ा मा रा।

³ अर मि त्वेतै यू सब इलै बतौणु छौं, किलैकि पैलि हम लोग भि मूरख छा अर बुलयूं नि मणदा छा, अर भक्टयां छा अर भौत सरी मन की इच्छा अर भोग-बिलास का गुलाम छा, अर एक-दुसरा से गळत बरतौ करण वळा अर जलन से भोर्यां छा, अर लोग हम बटि अर हम भि लोगु बटि नफरत करदा छा अर खार खान्दा छा।

⁴ पर जब हमतै बचौणु वळा परमेस्वर की दया अर वेकू प्यार सब लोगु पर परगट ह्‍वे,

⁵ तब वेन हमरा अच्छा कामों का खातिर ना, पर अपणी दया कैरिके हमतै बचै दिनी अर पवित्र आत्मा का द्‍वारा हमरा सब पापों तैं ध्वेके हमतै नयू जनम देई अर हमतै नयू जीवन मिली।

⁶ अर वे ही पिता परमेस्वर न हमतै बचौण वळा यीशु मसीह का द्‍वारा हम पर पवित्र आत्मा तैं भरपूरी से अखणै,

⁷ ताकि हम वेकी दया से परमेस्वर की नजर मा धरमी बणि सैका, अर सदनि को जीवन जीण की आस का मुताबिक वेका वारिस बणि जा।

⁸ अर यू सब बात सच्‍चि छिन, अर मि चान्दु छौं कि तू यों सब बातों का बारा मा जोर देके बतौ, ताकि जौं लोगु न परमेस्वर पर बिस्वास कैरी, ऊ भलै का कामों तैं करण मा लग्यां रा। अर यू बात खूब अर सब लोगु का फैदे की छिन।

⁹ मगर फालतु की बकवास, अर पितरों का वंश का बारा मा, अर नियम-कानूनों का बारा मा घपरोळ करण वळो, अर झगड़ा करण वळो से दूर रौ, किलैकि वु बेकार अर कै काम का नि छिन।

¹⁰ जु मनखि एक-दुसरा का बीच मा लड़ै-झगड़ा करौन्दिन, ऊंतैं एक-दुई बार समझै दे, अर फिर ऊं बटि कुई मतलब ही नि रख।

¹¹ किलैकि तुम लोग जणदा ही छाँ, कि इन्द्रयो मनखि सच्‍चै का बाटा बटि अलग ह्‍वे गै, अर इन पाप कैरिके ऊ खुद दोषी बणि गै।

आखिरी सला अर सलाम

¹² अर तीतुस, जब मि तेरा पास अरतिमास या तुखिकुस भै तैं भेजलु, तब तू निकुपुलिस नगर मा औण की कोसिस कैरी। किलैकि अबरि दौं मेरी ह्‍यूँद कटण की इखि सोची च।

¹³ अर अपुल्‍लोस भै अर वकील जेनास तैं तुरन्त भेजण को इंतजाम कैर, अर जु कुछ भि ऊंका सफर खुणि जरुरी च वामा कैं भि बात की कमी नि हो।

¹⁴ अर सब बिस्वासी लोग भलै का काम करण सीखा, ताकि ऊ एक-दुसरे की भौत सि जरुरतों तैं पूरु कैरी सैका, तब ऊंका जीवन का द्‍वारा दुसरा लोगु तैं फैदा मिललु।

¹⁵ हे तीतुस, मेरा सब दगड़्यों की तरफा बटि त्वेतै सलाम अर जु बिस्वासी भै हम बटि प्यार करदिन, ऊंतैं हमरु सलाम। परमेस्वर की किरपा हमेसा तुम पर हो।