दिब्य दरस 15 - Garhwali

सात स्वर्गदूतों द्‍वारा आखिरी सात विपदा

¹ फिर मिन स्वर्ग मा एक और बड़ु अदभुत चिन्‍न देखि की सात स्वर्गदूत छा, जौं का पास सात विपदा छै। अर यू आखिरी विपदा छै, अर येका दगड़ा-दगड़ि परमेस्वर को परकोप पूरु ह्‍वे जान्दु।

² तब मितैं काँच का जन एक समुन्दर दिखै, अर वु इन लगणु छौ जन कि वेमा आग मिली हो। अर जौं लोगु न वे दैंत, वेकी मूरत, अर वेका नौ की संख्या पर जीत हासिल कैरी छै, मिन ऊं सब लोगु तैं वे काँच का समुन्दर का मथि खड़ु देखि। अर पिता परमेस्वर न हरेक तैं एक-एक बीणा दिनी।

^3-4 अर वु परमेस्वर का सेवक मूसा को गीत अर मेम्‍ना जु की यीशु च वेको यू गीत गाणा छा, “सर्वसक्‍तिमान प्रभु पिता, हे हमरा प्यार प्रभु यीशु, छाँ महान पवित्र तुम ही, एकमात्र बाटु तुमरो सच्‍चु, भरोसा का लैख केवल तुम ही, काम अदभुत महान सब ही। सदनि को राजा केवल तुम ही, आदर-सम्मान लोग करला सब ही आला तुमरा समणि, देस-देस का सभि झुकला तुमरा समणि, करला भक्‍ति अर बडै भि जाहीर ह्‍वे गै ऊं सभ्यों पर, करदा छाँ तुम सब कुछ सच्‍चै पर।”

⁵ अर यों सब बातों का बाद मिन स्वर्ग मा परमेस्वर का मन्दिर तैं याने कि पवित्र तम्बू तैं खुलद देखि।

⁶ अर सात स्वर्गदूत जौं का पास सात विपदा छै मन्दिर बटि भैर ऐनी। अर ऊंन मखमल का साफ अर चमकिला कपड़ा पैरयां छा, अर ऊंकी छति पर सोना का पठुगा बन्धयां छा।

⁷ तब चार ज्यून्दा पराणों मदि एक न यों सात स्वर्गदूतों तैं सोना का सात कटोरा दिनी, जौं मा हमेसा-हमेसा तक ज्यून्द रौण वळा परमेस्वर को परकोप भोर्यां छौ।

⁸ अर परमेस्वर का तेज अर ताकत की वजै से पूरु मन्दिर धुंवळ भोरी गै, अर जबरि तक सात स्वर्गदूतों की सात विपदा खतम नि ह्‍वे गैनी, तबरि तक कुई भि मन्दिर मा नि जै सैकी।