मरकुस 5 - Garhwali

खबेस लग्यां मनखि तैं छुटकारु देण

^1-6 गिरासेनियों का मुलक मा एक मनखि छौ, जै पर खबेस लग्यूं छौ, अर यू मनखि कबरिस्तान मा रौन्दु छौ। अर कुई भि मनखि वेतैं संगुळोन बन्धी के भि नि रखी सकदु छौ, किलैकि कई बार उ बेड़ियों अर संगुळोन बन्धे त गै, मगर वेन ऊं संगुळों तैं तोड़ि दिनी अर बेड़ियों का टुकड़ा-टुकड़ा कैरी दिनी। अर कुई भि मनखि वेतैं वश मा नि रखी सकदु छौ। उ दिन-रात कबरिस्तान मा अर पाड़ो मा लगातार चिल्‍लाणु रौन्दु छौ, अर ढुंगा मारी-मारी के अफ तैं नुकसान पौंछान्दु छौ। अर जब यीशु अर वेका चेला झील का दुसरा छाला गिरासेनियों का मुलक मा पौंछिनी, अर जन्‍नि यीशु नाव बटि उतरि, कि देखा, तुरन्त यू मनखि जैमा खबेस लग्यूं छौ, कबरिस्तान बटि निकळि अर यीशु तैं दूर से देखि के भागी के वेसे मिली अर वेतैं परणाम कैरी।

⁷ अर ऊँची आवाज मा चिल्‍लै के बोलि, “हे सबसे महान परमेस्वर का पुत्र यीशु, तुम मि बटि क्या चाणा छाँ? मि तुमतै परमेस्वर की कसम देन्दु, कि मितैं दुख नि द्‍या।”

⁸ अर वेन यू इलै बोलि किलैकि यीशु न वेकू बोलि छौ कि, “हे खबेस तू ये मनखि मा बटि भैर निकळि जा।”

⁹ तब यीशु न वे खबेस तैं पूछी, “तेरु नौ क्या च?” वेन वेकू बोलि, “मेरु नौ पलटण च किलैकि हम भौत जादा छां।”

¹⁰ अर वेन यीशु बटि भौत बिन्ती कैरी कि, “हमतै ये मुलक से भैर नि भेज।”

¹¹ अर उख पाड़ पर सुंगरों को एक बड़ु झुण्ड चरणु छौ।

¹² इलै खबेसों न यीशु बटि बिन्ती कैरी कि, “हमतै ऊं सुंगरों मा भेज दे, ताकि हम ऊंका भितर चलि जां।”

¹³ अर वेन ऊंतैं इजाजत दे दिनी। तब खबेसों की पलटण वे मनखि मा बटि निकळि के सुंगरों मा बैठि गैनी, अर सुंगरों को वु पूरु झुण्ड भौत तेजी से भ्योळ जनै भागी, अर वु सभ्या का सभि मूड़ी झील मा लमडी गैनी अर डुबी के मोरि गैनी। अर ये झुण्ड की संख्या दुई हजार का लगभग छै।

¹⁴ अर यू सब देखि के सुंगरों तैं चराण वळा उख बटि भगिनी, अर नगरों अर ग्‍वोंऽ मा जैके ऊंन या पूरि बात लोगु तैं बतै दिनी, तब जु कुछ ह्‍वे छौ वेतैं दिखण खुणि लोग ऐनी।

¹⁵ अर ऊंन यीशु का पास ऐके वे मनखि तैं जैमा खबेसों की पलटण बैठि छै कपड़ा पैरि के अर चेतन बैठयूं देखि, अर यू देखि के ऊ लोग डौऽरी गैनी।

¹⁶ अर जौं लोगु न यू सब होण देखि ऊंन नगर बटि अयां लोगु तैं बतै, कि खबेसों का द्‍वारा सतयुं यू मनखि कनकै खूब ह्‍वे, अर सुंगरों का दगड़ा मा क्या ह्‍वे।

¹⁷ तब गिरासेनियों मुलक का लोगु न यीशु बटि बिन्ती कैरी, कि हमरा मुलक बटि चलि जा।

¹⁸ अर जब यीशु नाव पर बैठण लगि गै, त वु मनखि जै पर पैलि खबेस लग्यां छा, वेन यीशु बटि बिन्ती कैरी कि, “मितैं अपणा दगड़ा मा रौण द्‍या।”

¹⁹ मगर वेन वेतैं विदा कैरिके इन आज्ञा दिनी कि, “जा, अपणा घौर चलि जा, अर परमेस्वर न त्वे पर कथगा बड़ी दया कैरी, वे काम का बारा मा सब कुछ अपणा लोगु तैं बतौ।”

²⁰ तब उ आदिम उख बटि चलि गै अर दिकापुलिस का मुलक मा ईं बात को परचार करण लगि गै, कि यीशु न मि खुणि भौत बड़ु काम कैरी। अर वे आदिम कि ऊं सब बातों तैं सुणी के लोग ताजुब मा पोड़ि गैनी।

याईर की मोरि नौनि अर एक रोगी जनानि

²¹ फिर यीशु नाव से गिरासेनियों का मुलक बटि निकळि के वापस दुसरा छाला पर चलि गै, अर जब उ छाला पर ही छौ, कि देखा, एक बड़ी भीड़ वेका पास जमा ह्‍वे गै।

²² अर इथगा मा याईर नौ को एक मनखि वेका पास ऐ अर यू यहूदियों का प्रार्थना भवन का मुखियों मा मदि एक छौ। अर उ यीशु का खुटों मा पोड़ि के वे बटि बिन्ती करण लगि गै।

²³ वेन इन बोलि कि, “गुरुजी, मेरी छुटी नौनि मुरण वळी च, तुम चलि के अपणु हाथ वीं पर रख द्‍या, ताकि वा ठिक ह्‍वे जौ अर ज्यून्द रौ।”

²⁴ अर तब यीशु वेका दगड़ा मा चलि गै, त बड़ी भीड़ वेका पिछनै-पिछनै जाण लगि, अर लोग जादा होण की वजै से यीशु का दगड़ा मा धक्‍का-मुक्‍की होण लगि गै।

²⁵ अर उख भीड़ मा एक जनानि छै, जींतैं बारह सालों बटि ल्वे बुगणो को रोग छौ।

²⁶ अर वींन भौत सा बैदों बटि अपणु इलाज करवै-करवै के भौत दुख उठे, अर जु कुछ भि वींका पास छौ वु सब कुछ खर्च करण का बाद भि वींतैं कुई फैदा नि ह्‍वे, बल्किन मा वीं की हालत और भि जादा खराब ह्‍वे गै छै।

²⁷ अर जब वींन यीशु का बारा मा सुणी, त वा भीड़ मा पिछनै बटि ऐ अर वींन यीशु का कपड़ा पर लग्यां झालरों तैं छ्वी दिनी।

²⁸ किलैकि मन मा सोचदी छै कि, “अगर जु मि यीशु का कपड़ा तैं ही छ्वी द्‍यूलु, त ठिक ह्‍वे जौलु।”

²⁹ अर जन्‍नि वींन छ्वी तन्‍नि वींको ल्वे बुगण रुकी गै, अर वा अपणा सरील मा जाणि गै कि मि ठिक ह्‍वे ग्यों।

³⁰ अर यीशु तुरन्त जाणि गै कि मि मा बटि ठिक करणु खुणि सामर्थ निकळि, इलै वेन पिछनै मुड़ि के भीड़ का लोगु कू बोलि, “मेरा कपड़ा तैं कैन छ्वी?”

³¹ तब वेका चेलों न यीशु बटि बोलि, “गुरुजी, तुम दिखणा नि छाँ कि भीड़ त्वेतै दबौंणि च? अर फिर भि तुम बोन्‍ना छाँ कि मितैं कैन छ्वी?”

³² मगर यीशु चौतरफि दिखण पर लग्यूं रै कि आखिर मा यू काम कैन कैरी।

³³ अर वा जनानि जाणि गै कि मेरा दगड़ा मा क्या अदभुत काम ह्‍वे, तब वा डौऽरा बानो कौंपदी-कौंपदी यीशु का पास ऐ अर वेका खुटों मा पोड़ि के वेतैं सब कुछ सच्‍च बतै दिनी।

³⁴ तब वेन वींकू बोलि, “बेटी, तिन बिस्वास कैरी इलै तू खूब ह्‍वे गै, अब तू शान्ति से चलि जा, अर अपणी ईं बिमारि से बचि रौ।”

³⁵ अर जब यीशु इन बोन्‍नु ही छौ, कि तबरि प्रार्थना भवन का वे मुखिया का घौर बटि कुछ लोगु न ऐके बोलि, “मुखिया जी, तुमरि नौनि मोरि गै, अब गुरुजी तैं परेसान नि कैरा।”

³⁶ अर जु बात ऊ बोन्‍ना छा यीशु न ऊं बातों पर ध्यान नि दिनी, अर वे मुखिया कू बोलि, “डौऽर ना, बस बिस्वास रख।”

³⁷ अर यीशु न पतरस, याकूब अर वेका भै यूहन्‍ना का अलावा और कैतैं भि अपणा दगड़ा मा औण नि दिनी।

³⁸ अर जब यीशु वे मुखिया का घौर मा पौंछी, त वेन देखि कि लोग भौत रुंणा अर बड़ु मातम मनौणा छिन।

³⁹ तब वेन घौर का भितर जैके लोगु कू बोलि, “तुम हल्‍ला किलै मचौणा? अर किलै रुंणा छाँ? वा मोरि नि च बल्किन मा सिंणी च।”

⁴⁰ ईं बात तैं सुणी के ऊ सब लोग वे पर हसण लगि गैनी, मगर यीशु न ऊं सब लोगु तैं उख बटि भैर निकाळि, अर नौनि का ब्वे-बाब अर ऊं तीन चेलों तैं अफ दगड़ि भितर लि गै जख नौनि रखी छै।

⁴¹ अर यीशु न वीं नौनि को हाथ पकड़ी के बोलि, “तलीता, कूमी” ज्यां को मतलब च कि “हे छुटी नौनि, मि त्वेकू बोन्‍नु छौं, उठ।”

⁴² अर बारा साल की वा नौनि तुरन्त उठी के चलण-फिरण लगि गै, अर यू देखि के वेका दगड़ा का लोग ताजुब मा पोड़ि गैनी।

⁴³ फिर वेन ऊंतैं चितै के आज्ञा दिनी, कि या बात कैतैं भि पता नि चलु। अर वींका ब्वे-बाब कू वेन बोलि, “वींतैं खाणु कू कुछ द्‍या।”