इब्रानी 9 - Garhwaliभक्ति करण का पुरणा रीति-रिवाज 1 हे मेरा दगड़्यों, पिता परमेस्वर न पैला करार मा भक्ति करण का नियम-कानून दिनी, अर एक पवित्र तम्बू बणौणु कू बोलि। 2 इलै ईं बात का मुताबिक एक तम्बू बणयै गै जैका पैला हिस्सा मा एक दीपदान, एक मेज अर अरपण मा चड़ईं भेंट की रुट्टी छै, ईं जगा कू पवित्र बुले जान्दु छौ। 3-4 अर वेका बाद तम्बू का दुसरा हिस्सा मा एक परदा लग्यूं छौ, अर जैकी वजै से उ एक कमरा लगदु छौ। वीं जगा मा धुप जगौणु खुणि सोना की एक वेदी बणि छै, अर उख सोनो को एक बक्सा छौ जैकू करार को बक्सा बुले जान्दु, अर वेमा सोनो को एक कटोरा छौ जैमा “मन्ना” नौ को खाणुक रखै गै छौ। वे बक्सा मा पितर हारुन को वु जांठु भि छौ जै पर मौळयार ऐ गै छै। अर जौं पठौलो पर परमेस्वर की आज्ञा लिखीं छै, वु दुई पठाळ भि उखि छै अर वीं जगा कू महा पवित्र जगा बुले जान्दु। 5 अर वे बक्सा का मथि दिब्य चमक वळा दुई स्वर्गदूत बणयां छा, जौं का दुई फाँकुड़ बक्सा से लेके पस्ताप करण वळी जगा तक फैल्यां छा। मगर अभि इथगा बगत नि च कि यों सब चीजों को बखान एक-एक कैरिके किये जौ। 6 अर जब पुरोहित हरेक दिन पवित्र तम्बू का पैला वळा हिस्सा मा अपणा काम तैं पूरु करणु खुणि जान्दा छा त वे बगत मा सब कुछ इन्नि छौ। 7 मगर दुसरा हिस्सा मा केवल महा पुरोहित ही जान्दु छौ, अर हरेक बार उ अपणा पापों खुणि अर दुसरा लोगु का द्वारा किये जाण वळा हरेक किसम का पापों खुणि पिता परमेस्वर का समणि बलिदान मा चड़यां ल्वे तैं लेके जान्दु छौ, अर उ भि सालभर मा सिरफ एक बार। 8 मगर पवित्र आत्मा हमतै इन बतौन्दु कि जब तक तम्बू अर वेका मुताबिक चलौण वळा रीति-रिवाज बणयां छा, तब तक ऊं रिवाजों का द्वारा सब लोग महा पवित्र वळी जगा मा दाखिल नि ह्वे सकदु छा। 9 इलै आज का दिन पर ईं बात को मतलब इन च कि हम लोग अपणा दान-बलिदान चड़ै के परमेस्वर की नजर मा अपणा जमीर तैं शुद्ध नि कैरी सकद्यां। 10 अर यू रीति-रिवाज केवल मनखि तैं बन्नि-बन्नि कार्यक्रमों खुणि खुद तैं धुण अर खाण-पीण का बारा मा ही बतौन्दिन। अर ईं दुनियां मा रीति-रिवाज तब तक ही रौन्दिन जब तक कि ऊंतैं और भि जादा सुधार करण को बगत नि ऐ जौ। यीशु मसीह का ल्वे की ताकत 11 हे मेरा भै-बैंणो, अब जब यीशु मसीह ईं दुनियां मा एक महा पुरोहित बणि के ऐ, त उ हम खुणि भली से भली आसीस लेके ऐ, जु कि आज हमतै मिलणी छिन। अर जख यीशु मसीह न सेवा कैरी उ बड़ु भलु च किलैकि उ पवित्र तम्बू मनखियों का हाथोंळ नि बणि अर ना ही उ ईं दुनियां को च। 12-13 अर ईं दुनियां वळा तम्बू मा जब महा पुरोहित सालभर मा एक बार भितर जान्दु छौ, त उ बलिदान मा चड़यां बखरों अर बोड़ो का ल्वे तैं दगड़ा मा लि जान्दु छौ, ताकि लोगु तैं ऊं पर लग्यां पापों का इळजाम से माफी मिली जौ। अर मूसा का दियां नियम-कानूनों का मुताबिक जब लोग परमेस्वर की नजर मा अशुद्ध ह्वे जान्दा छा, त वु वेकी भक्ति का काबिल नि रौन्दा छा। अर जब तक ऊं लोगु पर बलिदान मा चड़यां बखरों अर सांड़ो को ल्वे, अर बछरों की राख छिड़के नि जौ तब तक ऊ लोग शुद्ध नि मणै जान्दा छा। मगर हमरा यीशु मसीह न इन नि कैरी, बल्किन मा वु खुद अपणु ल्वे देके वीं पवित्र जगा मा एक ही बार गै, अर इन कैरिके वेन सदनि खुणि हमतै पापों से छुटकारु दे दिनी। 14 किलैकि यीशु मसीह मा पाप ही नि छौ, अर वेन खुद तैं एक बलिदान का रुप मा पिता परमेस्वर का समणि दे दिनी, अर यू बलिदान आत्मिक अर सदनि तक रौण वळु च। इलै वेको ल्वे भौत जादा महान च, जु कि हमरा जमीर तैं शुद्ध करदु, ताकि हम ज्यून्दा परमेस्वर की पवित्र सेवा कैरी सैका। अर हम इन्द्रयो कुई भि काम नि कैरा, जु की हमतै सदनि की मौत की तरफा लेके जौ। 15 अर लोगु तैं पाप से छुड़ौण का खातिर यीशु मसीह मरे गै। अर ईं मौत का द्वारा वेन पुरणा करार तैं रद्द कैरी दिनी, ताकि उ अपणा चुण्यां लोगु तैं पिता परमेस्वर का द्वारा मिलण वळी सदनि की आसिसों तैं द्यो, अर वेका दगड़ा-दगड़ि एक नयू करार भि द्यो जु की सदनि को जीवन च। 16 असल मा जख वसीयत लिखे रौन्दी उख वींतैं साबित करणु खुणि इन बतये जान्दु कि वींतैं बनबौंण वळे की मौत ह्वे गै। 17 किलैकि बनबौंण वळे की मौत का बाद ही वा वसीयत पक्की होन्दी, अर जब तक बनबौंण वळु ज्यून्दु च तब तक वा वसीयत कै काम की नि च। 18 इलै ही पैला करार तैं पूरु करणु खुणि ल्वे तैं बुगये गै। 19 अर जु कुछ भि परमेस्वर न मूसा रैबर्या तैं बतै वेन वु नियम-कानून लोगु तैं ठिक उन्नि बतैनि, कि ऊंतैं माफी पौणु खुणि इन्नि ही करण चयेणु। तब वेन बोड़ो अर बखरों का ल्वे का दगड़ा मा पाणि मिलै अर लाल ऊंन अर जुफा की पौद से करार का दस्तावेजों अर सब लोगु पर छिड़की। 20 अर वेन बोलि, “यू करार को वु ल्वे च जैको पालन करण की आज्ञा परमेस्वर न हमतै देई।” 21 अर इनकै वेन पवित्र तम्बू अर सेवा मा काम औण वळा सब समान पर ल्वे छिड़की। 22 अर सच्चि बात त या च कि मूसा का दियां नियम-कानून का मुताबिक अकसर सभि चीज ल्वे का द्वारा ही शुद्ध किये जनदिन, अर माफी पौणु खुणि ल्वे बुगण जरुरी च। यीशु मसीह का बलिदान से पाप की माफी 23 हे मेरा दगड़्यों, इख जु चीज छिन वु स्वर्ग की चीजों को एक नमूना च। अर यों चीजों तैं जानबरों का ल्वे से शुद्ध करण पोड़ि, मगर यू ल्वे स्वर्ग की चीजों तैं पवित्र नि बणै सकदु किलैकि यां खुणि और भि अच्छा बलिदान की जरुरत छै। 24 इलै यीशु मसीह मनखियों का द्वारा बणयां मन्दिर की पवित्र जगा मा नि गै, जु कि असली चीजों को एक नमूना च, मगर उ वेका बदला स्वर्ग मा गै जख उ हमरि खातिर पिता परमेस्वर का समणि हाजिर रौन्दु। 25 अर महा पुरोहित साल मा एक बार लोगु का पापों का खातिर जानबर का ल्वे तैं अफ दगड़ा मा लेके पवित्र जगा मा जान्दु। मगर यीशु मसीह तैं इन करण की कुई जरुरत नि पोड़ि कि वु हरेक साल मा इन कैरो। 26 अर अगर ज्वा इन बात ही रौन्दी, त यीशु तैं दुनियां की शुरुवात से अभि तक बार-बार दुख उठौण पोड़दु, मगर वेन खुद तैं आखिरी का दिनों मा एक ही बार सदनि खुणि परगट कैरियाली, ताकि अपणा बलिदान का द्वारा उ पाप तैं मिटै सैको। 27 अर जन एक बार मुरण अर वेका बाद न्याय को परगट होण मनखियों खुणि जरुरी च। 28 ठिक उन्नि यीशु मसीह भि भौत सा लोगु का पापों तैं उठौणु खुणि एक ही बार बलिदान ह्वे। पर जब उ फिर से वापस आलु त उ मनखि का पापों तैं माफ करणु खुणि ना, बल्किन मा ऊंतैं छुटकारा देणु खुणि आलु जु कि वेको इंतजार कना छिन। |
© (Active) Wycliffe Bible Translators, Inc. All rights reserved.
Wycliffe Bible Translators, Inc.