इफिसुस 6 - Garhwali

ब्वे-बाब अर औलाद

¹ हे मेरा प्यारा बच्‍चों, तुम प्रभु का छाँ इलै अपणा ब्वे-बाब को बुलयूं माणा, किलैकि इन करण तुम खुणि भलु च।

² अर तुम खुणि सबसे पैलि आज्ञा या च कि, “अपणा-अपणा ब्वे-बाब को आदर-सम्मान कैरा, अर वेका दगड़ा-दगड़ि इन करार भि कर्युं च कि,

³ तब तेरु भलु होलु, अर तू ईं धरती पर भौत दिनों तक ज्यून्दु रैलि।”

⁴ अर बिस्वासी समुदाय का बीच मा जथगा भि लोग ब्वे-बाब छिन, मि तुमतै भि चितै देन्दु कि अपणा-अपणा बच्‍चों तैं गुस्सा नि दिला, बल्किन मा ऊंतैं वीं शिक्षा का मुताबिक जीवन जीण सीखा जु कि पिता परमेस्वर की तरफा बटि मिलदु, अर इन कैरिके ऊंको पालन-पोसण कैरा।

मालिक अर नौकर

⁵ हे मेरा भै-बैंणो, तुम जु नौकर छाँ, अर ईं दुनियां का मुताबिक जु तुमरा मालिक छिन, ऊंका अधीन मा रा, अर ऊंकी बातों को पालन कैरा। अर यू सब कुछ तुम इन सोची के कैरा जन तुम सच्‍चा दिल से यीशु मसीह की सेवा कना हो।

⁶ अर यू सब कुछ तुम मनखियों तैं खुश करणु या दिखौणु खुणि ना, पर यीशु मसीह का सेवकों की तरौं तन-मन से परमेस्वर की मनसा का मुताबिक कैरा।

⁷ अर अच्छी मनसा का दगड़ा मा काम करण वळा नौकर बणा, इन सोचा, की तुम या सेवा प्रभु खुणि करणा छाँ, ना की कै मनखि खुणि,

⁸ किलैकि तुम जणदा छाँ, कि हरेक मनखि चै ऊ नौकर हो या आजाद, अगर उ अच्छु काम करलु त प्रभु बटि इनाम भि पालु।

⁹ अर हे मालिकों, अपणा-अपणा नौकरों को हक ऊंतैं द्‍या अर ऊंतैं डऽरै-धमकै के नि रखा, अर यू याद रखा कि स्वर्ग मा रौण वळु परमेस्वर तुम दुईयों को मालिक च, अर वु कै का दगड़ा मा भेदभाव नि करदु।

आत्मिक युद्ध का हथियार

¹⁰ इलै हे मेरा भै-बैंणो, प्रभु अर वेकी महान ताकत बटि तुम भि ताकत पैके मजबूत होन्दी जा।

¹¹ परमेस्वर का दियां सब आत्मिक हथियारों तैं बान्धि ल्या, ताकि तुम शैतान की चालाकी का खिलाप मा टिक्यां रा।

¹² किलैकि हम बिस्वासी लोगु की या लड़ै मनखियों का दगड़ा मा नि च, जौं पर केवल मांस, ल्वे अर हड़गा ही छिन, बल्किन मा हमरि लड़ै त दुष्‍ट खबेसों, अर ऊंका परधानों अर अधिकारीयों का दगड़ा मा च, जु कि ईं अन्धेरी दुनियां पर सासन करदिन अर आसमान मा रौनदिन।

¹³ इलै परमेस्वर का दियां सब आत्मिक हथियार बान्धि ल्या, ताकि जब बुरा दिन आला त तुम ऊं सब बुरी बातों से लड़ी सैका, अर सब कुछ पूरु कैरिके अटल बणयां रा।

¹⁴ इलै सच्‍चै का वचन से अपणी कमर कसी ल्या, अर परमेस्वर न तुमतै धरमी ठैरैयालि या बात एक कवच का जन च।

¹⁵ अर जन तयार ह्‍वेके जुता पैनण होन्दु, ठिक उन्‍नि तुम भि मेल-जोल का शुभ समाचार तैं सुनौणु खुणि तयार रा।

¹⁶ अर यों सभ्यों का दगड़ा-दगड़ि हाथों मा बिस्वास की ढाल तैं थामि ल्या, ज्यां से कि तुम शैतान का सब जग्यां तीरों तैं बुझै सैका।

¹⁷ अर छुटकारा तैं स्वीकार कैरा, अर यू हैलमेट पैनण का जन च, अर पवित्र आत्मा की तलवार तैं ले ल्या जु की परमेस्वर को वचन च।

¹⁸ अर हरेक बगत मा पवित्र आत्मा की ताकत से सब किसम का प्रार्थना निवेदन कना रा। अर बिज्यां रा, अर सब पवित्र लोगु खुणि लगातार प्रार्थना कना रा।

¹⁹ हे मेरा भै-बैंणो, मि पौलुस खुणि भि प्रार्थना कर्यां, ताकि मितैं वचन बोन्‍न का बगत मा इन्द्रयो वचन दिये जौ, जैतैं मि हिम्मत से बोलि सैकु अर शुभ समाचार को पवित्र राज लोगु तैं बतै सैकु,

²⁰ अर मितैं शुभ समाचार को परचार करणु खुणि ही भेजि गै, अर अब मि इख बेड़ियों मा बन्धयूं छौं। हे मेरा दगड़्यों, मि खुणि प्रार्थना कर्यां कि जब मि शुभ समाचार को परचार कैरुं, त बड़ी हिम्मत से कैरी सैकु।

आखिरी सला

^21-22 मि इन चान्दु, कि तुम लोग मेरा बारा मा जाणा, कि इख मि कै हालत मा छौं अर क्या कनु छौं। इलै मि तुमरा पास हमरा प्यारा भै तुखिकुस तैं भेजणु छौं, जु कि प्रभु की सेवा का काम मा मेरी मदद करण वळु, अर भरोसामन्द मनखि च। अर जब उ तुमरा पास आलु, त तुमतै हमरि हालत का बारा मा बतालु अर तुमरा दिलों की हिम्मत तैं भि बढालु।

²³ अर मि इन प्रार्थना करदु, कि पिता परमेस्वर अर प्रभु यीशु मसीह की तरफा बटि तुमतै शान्ति मिलु। अर तुम सब एक-दुसरा से प्यार करण मा अर बिस्वास मा हरेक दिन बढदी जा।

²⁴ अर जु लोग हमरा प्रभु यीशु मसीह से कभि नि खतम होण वळु प्यार करदिन, ऊं सभ्यों पर परमेस्वर की किरपा होणी रौ। आमीन।