खास चेलों 2 - Garhwali

चेलों तैं पवित्र आत्मा मिलण

¹ अर जब पिन्तेकुस्त का त्योवार को दिन ऐ, त वु सब बिस्वासी लोग एक जगा इकट्‍ठा होयां छा।

² अर अचानक आसमान बटि हवा की बड़ी सुंस्याट जन आवाज ऐ, अर जख ऊ बैठयां छा उ पूरु घौर वीं आवाजळ भरी गै।

³ तब ऊंतैं आग की तरौं भौत सरी जीब दिखैनि, जु की अलग-अलग ह्‍वेके हरेक मनखि मा ऐके बैठि गैनी।

⁴ अर ऊ सभ्या का सभि पवित्र आत्मा से भरपूर ह्‍वे गैनी। अर पवित्र आत्मा न अपणा मुताबिक ऊंतैं बोन्‍न की ताकत दिनी, अर वु बन्‍नि-बन्‍नि किसम की भाषा बोन्‍न लगि गैनी।

⁵ अर वे बगत पर पूरि दुनियां का हरेक देस बटि यहूदी भक्‍त लोग यरूशलेम नगर मा रौणा छा।

⁶ अर जब लोगु न हल्‍ला सुणी, त भीड़ की भीड़ इकट्‍ठा ह्‍वे गै। अर सब लोग हैरान ह्‍वे गैनी, किलैकि जब यू लोग बात करणा छा, त भीड़ का लोगु तैं अपणी-अपणी भाषा सुन्यौणी छै।

^7-8 अर लोग बड़ा हकदक अर ताजुब मा पोड़ि के बोन्‍न लगि गैनी, “अरे जरा यों लोगु तैं त देखा, यू लोग हमरि भाषा मा कनकै बोलि सकदिन? यू कनकै ह्‍वे सकदु? किलैकि यू सब लोग त गलील मुलक का छिन। जब की हम सब लोग अलग-अलग जगा का छां, फिर भि हमतै हमरि मात्रभाषा सुन्यौणी च।

⁹ जब की हम मा बटि कुछ लोग त पारथी अर मादी मुलक का छिन, अर कुछ त मेसोपोटामिया मुलक बटि अयां छिन, अर कुछ लोग एलामी निवासी छिन। इख तक की हमरा बीच मा यहूदिया, कप्पदूकिया, पुन्तुस, अर आसिया मुलकों का रौण वळा लोग भि इख अयां छिन।

¹⁰ अर कुछ लोग त फ्रूगिया अर पंफूलिया मुलक का छिन, अर कुछ त मिस्र मुलक बटि अयां। अर कुरेने नगर का आस-पास का लीबिया मुलक बटि भि, इख तक कि रोम नगर बटि भि अयां मुसाफिरों तैं भि अपणी-अपणी भाषा सुन्यौणी च, अर जु लोग पैलि बटि यहूदी छिन अर वु जौन यहूदी धरम तैं स्वीकार कैरियाली हम सभ्यों तैं भि अपणी-अपणी भाषा सुन्यौणी च।

¹¹ अर क्रेते टापू अर अरब देस बटि अयां निवासीयों तैं भि, हम सभ्यों तैं अपणी-अपणी भाषा सुन्यौणी च, कि यू सब लोग परमेस्वर का बड़ा-बड़ा कामों की बडै कना छिन। यू सब कनकै ह्‍वे सकदु?”

¹² अर यू देखि के सब लोग हकदक छा अर बड़ी उळझण मा पोड़यां छा तब ऊ एक-दुसरा बटि पूछण लगि गैनी, “आखिर मा यू सब होणु क्या च?”

¹³ पर दुसरा लोगु न बिस्वासी लोगु को मजाक बणै के बोलि, “अरे यू त नयी दारु पी के टूंन होयां छिन।”

भीड़ खुणि पतरस को उपदेस

¹⁴ तब पतरस ऊं ग्यारा चेलों का दगड़ा मा खड़ु ह्‍वे अर ऊँची आवाज मा ऊं लोगु कू बोन्‍न लगि गै कि, “हे यहूदियों अर यरूशलेम मा रौण वळा सब लोगु, कन्दूड़ खोली के मेरी बात तैं सुणा अर तुम यू जाणि ल्या कि,

¹⁵ यों लोगु न दारु नि पेई, जन तुम लोग समझणा छाँ, किलैकि अभि त सुबेरे नौ ही बजणी च।

¹⁶ पर या त वा बात च जैका बारा मा परमेस्वर का रैबर्या योएल न बोलि छौ। अर वा बात इन च कि,

¹⁷ परमेस्वर इन बुल्दु कि, ‘आखिरी का दिनों मा इन होलु कि, मि अपणी पवित्र आत्मा सब मनखियों तैं भरपूरी से दूयुलु, अर तुमरा नौना अर नौनि भविष्यबाणी करला। अर तुमरा ज्वान लोग दरसन दिखला, अर तुमरा दाना-स्यांणा सुपन्या दिखला।

¹⁸ अर ऊं दिनों मा मि अपणा सेवकों अर सेविकाओं तैं भि पवित्र आत्मा भरपूरी से देण, अर ऊ भविष्यबाणी करला।

¹⁹ अर मिन मूड़ी धरती पर ल्वे, अर आसमान मा आग अर धुंवा का बादळों का चमत्कारिक चिन्‍न दिखौणिन।

²⁰ अर प्रभु का वे महान अर अदभुत दिन का औण से पैलि, सूरज काळु अर चाँद ल्वे जन लाल ह्‍वे जालु,

²¹ पर जु कुई प्रभु को नौ ल्यालु, वेतैं बचयै जालु।’

²² “हे इस्राएल का लोगु, इथगा ही ना बल्किन मा मेरी यों बातों तैं भि सुणा, परमेस्वर न नासरत गौं का यीशु का द्‍वारा तुमरा बीच मा बड़ा-बड़ा चमत्कार का चिन्‍न अर भौत सरा अदभुत काम कैरिके दिखैनि। अर यों कामों से इन परमाण दिनी कि उ परमेस्वर को भेज्यूं एक मनखि च, अर वेका बारा मा तुम सब जणदा ही छाँ।

²³ अर पिता परमेस्वर न पैलि बटि बणईं योजना का मुताबिक वे यीशु तैं तुमरा हाथों मा सौंप दिनी, अर वेका बारा मा उ पैलि बटि जणदु छौ, अर ये ही यीशु तैं तुम लोगु न अधरमी लोगु का हवाला कैरिके वेतैं क्रूस पर चड़वै दिनी।

²⁴ पर यीशु तैं परमेस्वर न मौत का बन्धनों मा बटि छुड़ै के ज्यून्दु कैरी, किलैकि या बात ह्‍वे ही नि सकदी छै कि मौत वेतैं अपणा वश मा रखो।

²⁵ अर राजा दाऊद न भि वेका बारा मा इन बोलि कि, “‘मि प्रभु तैं हमेसा अपणा समणि दिखदु, किलैकि उ मेरी दैंणी तरफा च ताकि मि नि डगमगौ।

²⁶ इलै मेरु मन खुश च अर मि परमेस्वर का गीत गान्दु, अर मितैं आस च की तुम मेरा सरील तैं बचै के रखिल्या।

²⁷ किलैकि तुम मेरा पराण तैं अधलोक मा नि छुड़ील्या, अर ना ही अपणा पवित्र मनखि तैं कबरुन्द सड़ण दिल्या।

²⁸ अर तुमुन ही मितैं जीवन को बाटु दिखै, अर तुमरो मेरा दगड़ा मा होण से मितैं बड़ी खुशी होलि।’”

²⁹ तब पतरस न ऊंकू इन भि बोलि कि, “हे मेरा भै-बैंणो, मि तुमतै पितर राजा दाऊद का बारा मा हिम्मत से बतै सकदु, कि पितर दाऊद त मोरि गैनी अर ऊंतैं दफनये भि गै अर ऊंकी कबर आज भि हमरा इख च।

³⁰ अर उ एक रैबर्या छौ, अर उ जणदु छौ कि परमेस्वर की एक कसम खईं च कि उ वेका वंश मदि कै एक तैं वेकी राजगद्‍दी पर बैठालु।

³¹ अर यीशु मसीह को मुरदो मा बटि ज्यून्द होण का बारा मा, होण वळी यों बातों तैं राजा दाऊद न पैलि ही देखि के बतैयालि छौ, कि पिता परमेस्वर न नऽ त वेका पराण तैं अधलोक मा छोड़ि, अर ना ही वेतैं कबरुन्द सड़ण देई।

³² अर ये ही यीशु तैं परमेस्वर न मौत मा बटि ज्यून्दु कैरी, अर ईं बात का गवा हम सभि छां।

³³ अर इन कैरिके यीशु न पिता परमेस्वर की दैंणी तरफा सबसे ऊँचो पद पै, अर पिता का कियां करार का मुताबिक पिता बटि पवित्र आत्मा तैं पैके वे करार तैं पूरु कैरी। अर आज वे ही करार का मुताबिक पवित्र आत्मा तैं वेन हम पर भि भरपूरी से दियाली। अर जु कुछ भि तुम दिखणा अर सुनणा छाँ, यू सब कुछ पवित्र आत्मा को काम च।

³⁴ अर राजा दाऊद त स्वर्ग मा नि गै, पर फिर भि उ यीशु का बारा मा इन बुल्दु कि, “परमेस्वर न मेरा प्रभु बटि बोलि, ‘मेरी दैंणी तरफा बैठ,

³⁵ जबरि तक कि मि तेरा दुसमनों तैं हरै के तेरा अधीन नि कैरी द्‍यूं।’”

भीड़ का लोगु को यीशु तैं स्वीकार करण

³⁶ “इलै हे इस्राएल का सब लोगु, तुम हर हाल मा ईं बात तैं जाणि ल्या, कि जै यीशु तैं तुमुन क्रूस पर चड़ै, परमेस्वर न वेतैं ही प्रभु अर मसीह ठैरै।”

³⁷ अर जब ऊं लोगु न यों बातों तैं सुणी, त या बात ऊंका दिलों मा लगि गै। तब ऊंन पतरस अर दुसरा खास चेलों से पूछी, “हे भैयों अब हमतै इन बता कि हम क्या जि कैरा?”

³⁸ तब पतरस न ऊंकू बोलि, “अपणा-अपणा पापों बटि पस्ताप कैरा अर पापों बटि माफी पौणु खुणि तुम मा बटि हरेक मनखि यीशु मसीह का नौ से बपतिस्मा ल्यो, अर तब तुमतै पवित्र आत्मा को दान मिललु।

³⁹ किलैकि पवित्र आत्मा देण को यू करार तुम खुणि, अर तुमरि औलादों खुणि अर ऊं सभ्यों खुणि च जु दूर-दूर रौणा छिन। अर यू करार ऊं लोगु खुणि भि च, जौं तैं हमरु प्रभु परमेस्वर अपणा पास बुलान्दु।”

⁴⁰ अर पतरस न भौत सरी बातों की गवै देके लोगु तैं समझै, अर ऊंतैं चितै के बोलि, “ईं दुष्‍ट पीढ़ी का लोगु बटि बचि के रा।”

⁴¹ इलै जौं लोगु न वेका ये उपदेस तैं स्वीकार कैरी, ऊंन बपतिस्मा लिनी, अर वे ही दिन करीब तीन हजार लोग बिस्वासी समुदाय का दगड़ा मा मिली गैनी।

बिस्वासी लोगु की संगत

⁴² अर सब बिस्वासी लोग यीशु का खास चेलों बटि लगातार वचन की शिक्षा पौणा रैनी। अर एक साथ संगत करण मा, प्रभु-भोज करण मा, अर प्रार्थना करण मा भि एक मन ह्‍वेके रौण लगि गैनी।

⁴³ अर लोगु का दिलों मा प्रभु खुणि और भि जादा आदर-सम्मान औण लगि गै, अर प्रभु खास चेलों का द्‍वारा भौत सरा अदभुत काम अर चमत्कारिक कामों तैं कनु छौ।

⁴⁴ अर सब बिस्वासी लोग मिली-जुली के रौन्दा छा, अर जु कुछ भि ऊंमा छौ वेतैं ऊ आपस मा बांटि देन्दा छा।

⁴⁵ अर ऊ अपणी जैजाद अर चीजों तैं बेचि के मिलण वळा रुपयों तैं ऊं लोगु मा बांटि देन्दा छा, जौं लोगु तैं जरुरत होन्दी छै।

⁴⁶ अर ऊ एक मन ह्‍वेके हरेक दिन मन्दिर मा इकट्‍ठा होन्दा छा, अर प्रभु-भोज खुणि एक-दुसरा का घौर मा मिलदा छा, अर सब दिल खोली के खुशी से एक-दुसरा का दगड़ा मा खाणु खान्दा छा।

⁴⁷ अर ऊ परमेस्वर की बडै करदा छा अर सब लोग ऊं बटि खुश छा। अर जु लोग बचण चान्दा छा, प्रभु ऊंतैं हरेक दिन बिस्वासी लोगु का दगड़ा मा मिलै देन्दु छौ।