2 कुरिन्थि 8 - Garhwali

दिल खोली के दान देण

¹ हे मेरा भै-बैंणो, अब मि तुमतै पिता परमेस्वर की वीं किरपा का बारा मा बतौण चाणु छौं, ज्वा वेन मकिदुनिया मुलक मा रौण वळा बिस्वासी समुदाय का लोगु का जीवनों मा कैरी।

² मकिदुनिया का दुसरा लोगु न बिस्वासी लोगु तैं भौत दुख देई। हालांकि यू बिस्वासी लोग गरीब छिन, मगर फिर भि ऊं लोगु न दुसरा बिस्वासी लोगु की मदद हमेसा दिल खोली के कैरी।

³ अर ईं बात का बारा मा मि तुमतै बतै देन्दु कि ऊंन अपणी हैसियत का मुताबिक दिनी, बल्किन मा जथगा ऊंका पास छौ ऊंन वेसे जादा ही दिनी, अर यू सब कुछ ऊंन अपणी मनसा का मुताबिक कैरी।

⁴ अर ऊंन खुद हम से इन बिन्ती कैरी कि ऊंतैं भि बिस्वासी लोगु तक राहत पौंछाणु खुणि मदद करण को मौका दिये जौ। अर या बिन्ती ऊंन हम से बार-बार कैरी, जब की हम ऊंकी हालत तैं अच्छे से जणद्‍यां।

⁵ अर हमुन इन सोची छौ कि वु लोग अपणी हैसियत का मुताबिक ही द्‍याला, मगर ऊंन हमरि सोच से भि जादा दिनी, किलैकि ऊंन पिता परमेस्वर की मरजी तैं पूरु होणु खुणि खुद तैं वेका हाथों मा सौंपी दिनी, अर वेका बाद ऊंन मितैं ईं बात का बारा मा बतै कि वु क्या करण चाणा छिन।

⁶ इलै हमुन तीतुस भै तैं जैन ये दान तैं इकट्‍ठा करण को काम तुमरा बीच मा शुरु कैरी छौ, मिन वेसे बिन्ती कैरी कि वु फिर से तुमरा बीच मा ऐके वेतैं पूरु कैरो।

⁷ अर हम जणदा छां कि तुम हरेक बात मा बढदी जाणा छाँ, जन कि यीशु मसीह पर तुमरो बिस्वास और भि जादा मजबूत होन्दी जाणु च, अर शुभ समाचार तैं बतौण मा, हरेक बात तैं जनण मा, अर हम जणदा छां कि तुम लोग दुसरा की मदद करण चाणा छाँ, अर सबसे प्यार करद्‍यां। इलै मि चान्दु, जु दान तुमुन तयार कैरिके रख्युं च वेतैं दिल खोली के द्‍या।

यीशु मसीह एक उदारण

⁸ हे मेरा दगड़्यों, इन बोलि के मि तुमतै कुई आदेस नि देणु छौं, बल्किन मा मि तुमरो ध्यान ईं बात पर लगौण चाणु कि तुमरो प्यार कथगा सच्‍चु च अर तुमतै दुसरो की कथगा चिन्ता च।

⁹ अर तुम हमरा प्रभु यीशु मसीह की महान किरपा का बारा मा जणदा ही छाँ, कि स्वर्ग मा वेका पास सब कुछ छौ मगर हम मनखियों तैं फैदा पौछाण का खातिर उ गरीब बणि गै, ताकि हम वेका द्‍वारा हर बात मा सेठ बणि जा।

¹⁰ अर मि तुमतै इन बतौण चाणु छौं अर मेरी या बात तुमरा फैदे की च, किलैकि पिछलै साल जन तुमुन यहूदिया मुलक का बिस्वासी लोगु की मदद करणु खुणि दान जमा कैरिके वेतैं देण की इच्छा कैरी,

¹¹ अब वे ही जोस का साथ वेतैं पूरु भि कैरा। अर जब तुम इन करिल्या, तब सब लोगु तैं पता चलि जालु कि तुम लोग इन दान देणु खुणि तयार छाँ। अर या बात मि इलै बुलणु छौं, किलैकि तुमुन जमा करण शुरु कैरी छौ अर तुम इथगा लैख छैई भि छाँ च कि तुम यू कैरी सकद्‍यां।

¹² अर ईं बात तैं याद रखा, कि अगर जु तुम सच्‍चि मा मदद करण चाणा छाँ, त अपणी-अपणी हैसियत का मुताबिक दे सकद्‍यां, ताकि या बात देखि के पिता परमेस्वर खुश हो। किलैकि पिता परमेस्वर इन इच्छा नि रखदु कि कु मितैं कथगा द्‍यालु, यू त तुमरि गुंजैस का मुताबिक च कि कु कथगा देण चाणु च।

¹³ अर मेरु बोन्‍नु को मतलब यू नि च कि तुम इथगा जादा द्‍या कि तुमरा पास ही नि रौ, पर जथगा तुम चा दे सकद्‍यां। मि त बस इथगा चान्दु, कि सब कुछ हो अर सभ्यों मा बराबर हो।

¹⁴ अर अभि तुमरा पास यहूदिया मुलक का बिस्वासी लोग की मदद करणु खुणि भौत कुछ च, इलै जौं चीजों की जरुरत ऊंतैं च तुम वींतैं पूरु कैरा। अर अगर जु औणु वळा बगत मा तुमतै भि कै चीज की जरुरत होलि त वु भि तुमरि जरुर मदद करला, अर इनकै सभ्यों का पास सब कुछ होलु।

¹⁵ अर जन कि पवित्रशास्‍त्र मा भि लिख्यूं च कि, “जैन जादा बटोळि वेका पास कुछ जादा नि निकळि, अर जैन कम बटोळि वेका पास कुछ कम नि निकळि।”

तीतुस तैं कुरिन्थि नगर मा भेजण

¹⁶ हे मेरा भै-बैंणो, इलै मि तीतुस तैं तुमरा पास फिर से भेजणु छौं। अर मि पिता परमेस्वर को धन्यवाद देन्दु किलैकि वेका बदौलत ही तीतुस भि दिल से तुमरि उथगा ही चिन्ता-फिकर करदु जथगा मि करदु।

¹⁷ अर तीतुस भै खुद अपणी इच्छा से तुमरा पास औण चाणु छौ, अर जब हमुन वेतैं या बात बतै त वेन तुरन्त “हाँ” बोलि दिनी।

¹⁸ अर मि तीतुस भै का दगड़ा मा एक और बिस्वासी भै तैं भेजणु छौं। अर यू उ च जैन शुभ समाचार तैं फैलाण मा जै तरीके से काम कैरी, वां खुणि बिस्वासी समुदाय का लोग वेकी बड़ी तारीफ करदिन।

¹⁹ अर इथगा ही ना, बल्किन मा समुदाय का सब लोगु न येतैं हमरा दगड़ा मा जाण खुणि ठैर्युं च। अर यू भै हमरा दगड़ा मा यरूशलेम नगर तब जालु, जब बिस्वासी भै-बैंणा दान तैं जमा कैरी द्‍याला। अर यू सब हम प्रभु तैं आदर-सम्मान देणु खुणि करणा छां, अर बिस्वासी लोगु का दगड़ा मा इन कैरिके हम ऊंकी मदद करण चाणा छां।

²⁰ अर बिस्वासी लोगु न ये दान तैं दिल खोली के दियूं च, इलै हमुन इन सोची कि तीतुस भै का दगड़ा मा वे भै तैं भि भेजि द्‍या। अर इन कैरिके हम इन कोसिस कन चाणा छां कि कुई भि मनखि हम पर दान लेण को दोष नि लगै सैको।

²¹ इलै हम सिरफ ऊं बातों की ही चिन्ता नि करद्‍यां जु प्रभु का समणि भली छिन, पर ऊं बातों की भि चिन्ता करद्‍यां जु कि मनखियों का समणि भली छिन।

²² अर येका दगड़ा-दगड़ि हम एक और बिस्वासी भै तैं ऊंका दगड़ा मा भेजणा छां। अर मिन कई बार प्रभु खुणि ये मनखि का काम तैं देखि, अर मितैं वेका बारा मा पता च कि उ प्रभु कि सेवा मा मदद करणु खुणि हमेसा तयार रौन्दु। अर उ भि ईं बात तैं जणदु च कि तुम लोग ये दान तैं दुसरा बिस्वासी लोगु का समणि देण चाणा छाँ, अर यू आदिम यों दुई भैयों का दगड़ा मा औणु खुणि भौत खुश च।

²³ अर अगर तीतुस भै का बारा मा कुई भि सवाल च, त मि तुमतै बतै देन्दु कि वु मेरु मददगार च अर सेवा का काम मा इमानदार मनखि। अर वेका दगड़ा मा जु दुई भै औणा छिन ऊ बिस्वासी समुदाय का लोगु का द्‍वारा भिजे जाण छिन। अर यू दुईया का दुई यीशु मसीह की सेवा का द्‍वारा वेतैं आदर-सम्मान देन्दिन।

²⁴ इलै ऊंतैं अपणु प्यार को सबूत द्‍या, ताकि समुदाय का सब लोगु पर तुमरो प्यार परगट ह्‍वे जौ। अर ऊ इन भि जाणि जा कि आखिर हम लोग तुमरि खातिर किलै बड़ु मोन करद्‍यां।