1 यूहन्ना 2 - Garhwali

यीशु मसीह हमरु मददगार

¹ हे मेरा बच्‍चों, मि तुम खुणि यू सब इलै लिखणु छौं, ताकि तुम पाप नि कैरा। अर अगर कुई पाप करदु त पिता परमेस्वर का पास हम खुणि एक बिन्ती करणु वळु च जु कि वेकी नजर मा धरमी च, याने कि हमरु यीशु मसीह।

² अर याद रखा की यीशु मसीह न अपणी इच्छा से हम खुणि अपणु बलिदान देई, ताकि वेका द्‍वारा पिता परमेस्वर हमरा पापों तैं माफ कैर द्‍यो, अर बस हमरा ही पापों तैं ना, बल्किन मा सरी दुनियां का लोगु का पापों तैं भि माफ कैरो।

³ अर अगर जु हम वेकी आज्ञाओं को पालन करद्‍यां, त यां से इन पता चलदु कि हमुन पिता परमेस्वर तैं जाण्यालि।

⁴ अर जु मनखि बुल्दु कि, “मि परमेस्वर तैं जाणि ग्यों,” अर फिर भि वेकी आज्ञाओं को पालन नि करदु, त समझि जा कि उ मनखि झूठ्‍ठु च अर वेमा कुई सच्‍चै नि च।

⁵ मगर कुई मनखि पिता परमेस्वर की आज्ञा को पालन करदु, त उ अपणा पूरा दिल से वेसे प्यार करदु। अर यां से इन पता चलदु कि हमरु पिता परमेस्वर का दगड़ा मा कथगा सच्‍चु रिश्ता च।

⁶ अर अगर कुई मनखि इन बुल्दु, कि मेरु पिता परमेस्वर का दगड़ा मा एक अच्छु रिश्ता च, त वेको इन फरज बणदु की वेको चाल-चलन भि ठिक उन्‍नि हो जन यीशु मसीह को छौ।

नई आज्ञा

⁷ हे मेरा प्यारा दगड़्यों, मि तुमतै कुई नई आज्ञा नि देणु छौं, बल्किन मा वा ही आज्ञा देणु छौं ज्वा कि तुमतै पैलि बटि मिली छै, अर या आज्ञा पुरणि ही च, जिं का बारा मा तुमुन बिस्वास करण का बगत मा सुणी छौ।

⁸ मगर फिर भि मि तुम खुणि एक नई आज्ञा लिखणु छौं, ज्वा कि यीशु मसीह मा अर ठिक उन्‍नि तुम भि मा भि सच्‍चि साबित ह्‍वे, किलैकि अब अन्धेरु खतम होण लगि गै, अर सच्‍चै को उज्याळु चमकण लगि गै।

⁹ अर जु कुई इन दावा करदु कि मि उज्याळा मा छौ, मगर दुसरा लोगु बटि खार खान्दु हो, त इन्द्रयो मनखि इन समझि ल्यो कि अभि भि वेका जीवन मा अन्धेरु ही च।

¹⁰ मगर जु मनखि सब लोगु से प्यार करदु हो, वेका जीवन मा उज्याळु च अर इन्द्रयो मनखि दुसरा लोगु खुणि पाप करण की वजा नि बणदु।

¹¹ मगर जु मनखि दुसरा लोगु से नफरत करदु, उ ईं बात तैं जाणि ल्यो कि वेका जीवन मा बुरै च, अर वु अन्धेरा मा चलणु च। अर वे मनखि तैं इन पता नि च कि उ जाणु कख च, किलैकि वे अन्धेर न वेका आंख्यों तैं बन्द कैरियाली।

दुनियां की बातों से प्यार नि कैरा

¹² हे मेरा प्यारा बच्‍चों, या चिठ्‍ठी मि तुम खुणि इलै लिखणु छौं, किलैकि यीशु मसीह का द्‍वारा तुमरा पाप माफ किये गैनी।

¹³ अर तुम जु ब्वे-बुबा छाँ मि तुम खुणि इलै लिखणु छौं, किलैकि तुम यीशु मसीह तैं जणद्‍यां, जु कि शुरुवात बटि च। अर तुम जु ज्वान छाँ, मि तुम खुणि इलै लिखणु छौं, किलैकि हम जणदा छाँ कि तुमुन शैतान पर जीत हासिल कैरियाली। अर मेरा प्यारा बच्‍चों, मि तुम खुणि इलै लिखणु छौं, किलैकि हम जणदा छां कि तुम पिता परमेस्वर तैं जणदा छाँ।

¹⁴ अर ब्वे-बबों तैं लिखण को मकसद यू च कि तुम लोग यीशु मसीह तैं जणद्‍यां, जु कि शुरुवात बटि च। अर ज्वानों तैं लिखण को मकसद यू च कि तुम लोग बिस्वास मा ताकतबर छाँ, अर वेका वचन को पालन करद्‍यां, इलै तुम लोगु न शैतान पर जीत हासिल कैरियाली।

¹⁵ अर तुम लोग ईं दुनियां का बुरा चाल-चलन से अर वेकी बुरै से प्यार नि कैरा, किलैकि अगर कुई मनखि दुनियां की बातों से प्यार करदु, त उ ईं बात तैं जाणि ल्यो कि वेमा पिता परमेस्वर को प्यार छैई नि च।

¹⁶ किलैकि दुनियां की तरफा बटि सरील कि बुरी इच्छा, आंख्यों की बुरी इच्छा, अपणा जीवन पर बड़ु मोन करण वळी बात ही औन्दिन, अर यू सब बात ईं दुनियां मा छिन। अरे, इन्दरि बात पिता परमेस्वर की तरफा बटि नि ऐ सकदिन, बल्किन मा यू त दुनियां तरफा बटि औन्दिन।

¹⁷ दुनियां अर वेकी बुरी इच्छा को नास ह्‍वे जाण, पर जु कुई परमेस्वर की इच्छा का मुताबिक चलदु वेको नास कभि नि होण।

मसीह को दुसमन कु?

¹⁸ हे मेरा बच्‍चों, यू त आखिरी को बगत च अर जन कि तुमुन सुण्यालि कि यीशु मसीह को विरोध करण वळु औण वळु च, अर अगर ईं बात का मुताबिक दिखै जौ त भौत सा लोग इन ऐ गैनी, जु कि यीशु मसीह को विरोध करदिन। अर यां से हमतै इन पता चलदु कि यू आखिरी को बगत च।

¹⁹ असल मा यू लोग हमरा बीच मा बटि ही निकळि के ही ऐनी, मगर वु हमरा अपणा लोग नि छिन किलैकि अगर जु वु हमरा अपणा लोग होन्दा त वु हम दगड़ा मा रौन्दा। मगर ऊंन त हमतै छोड़याली, अर ऊंको इन करण से यू साबित ह्‍वे गै, कि ऊ हमरा अपणा लोग नि छिन।

²⁰ मगर तुमरो अभिषेक त पवित्र परमेस्वर का द्‍वारा होयुं च, इलै ही तुम पूरि सच्‍चै तैं जणद्‍यां।

²¹ अर मेरा लिखण को मकसद यू नि च, कि तुम सच्‍चै तैं नि जणद्‍यां। अरे, तुम त सच्‍चै तैं जणदा छाँ अर कुई भि झूठ्‍ठी बात सच्‍च बटि पैदा नि होन्दी।

²² अर झूठ्‍ठु कु च? उई मनखि झूठ्‍ठु च जु ईं बात तैं स्वीकार नि करदु कि यीशु ही मसीह च। अर यू त उई च जु कि यीशु मसीह को दुसमन च, अर पिता परमेस्वर अर वेका पुत्र यीशु तैं स्वीकार नि करदु।

²³ अर जु पुत्र तैं स्वीकार नि करदु, वेका पास पिता परमेस्वर भि नि च। पर जु मनखि पुत्र तैं स्वीकार करदु, वेका पास पिता परमेस्वर भि च।

²⁴ अर जब बटि तुमुन बिस्वास कैरी, तब बटि तुमुन जु कुछ भि सुणी तुम वेमा बणयां रा। अर जु कुछ भि तुमुन सुणी अगर जु तुम वेमा बणयां रैल्या, त पुत्र अर वेका पिता मा बणयां रैल्या।

²⁵ अर जु करार वेन हमरा दगड़ा मा कर्युं च, उ करार सदनि को जीवन च।

²⁶ अर यू सब बात मि तुम खुणि इलै लिखणु छौं, ताकि तुम जाणि जा कि भौत सा लोग छिन, जु तुमतै सच्‍चै का बाटा बटि भरमौण चनदिन।

²⁷ हे मेरा भै-बैंणो, यीशु मसीह न तुमरो अभिषेक पवित्र आत्मा का द्‍वारा कर्युं च। अर जब तक वेको पवित्र आत्मा तुम मा बणु रौन्दु, तब तक तुमतै सिखौणु खुणि कै की जरुरत नि च, किलैकि पवित्र आत्मा को अभिषेक तुमतै हरेक चीज का बारा मा सिखौन्दु, कि कु जि बात सच्‍चि छिन अर कु झूठ्‍ठी। इलै पवित्र आत्मा की शिक्षा तैं स्वीकार कैरिके वेको पालन कैरा, अर यीशु मसीह की संगत मा बणयां रा।

परमेस्वर की औलाद

²⁸ हे मेरा प्यारा बच्‍चों, यीशु मसीह की संगत मा एक ह्‍वेके बणयां रा। अर अगर जु तुम इन करिल्या, त जब यीशु मसीह परगट होलु त तुमतै खुद पर सरम नि आली, बल्किन मा तुमतै बड़ी हिम्मत मिलली।

²⁹ किलैकि हम सभ्या का सभि जणदा छां, कि यीशु मसीह उई करदु जु पिता परमेस्वर की नजर मा सही च। अर हम यू भि जणद्‍यां, कि जथगा भि लोग वेकी नजर मा धरमी छिन ऊ सब पिता परमेस्वर की औलाद छिन।