Yudit 16 - Bible en Guidar

Gəlya nat Yudit

¹ Yudit təmna: «Məɓap wəla gəlya sən Maŋgəlva naw dit digileɗi, məɗi ki Daya dit gəzləŋtəndəŋɗe, məyə sən gəlyanalva də əgagdakani, mətibireni məya iya nani.

² Vi Daya iyi Maŋgəlva məzəziwgin əgaya, ndən məs dədawɗi dibirgidik nan a walaŋgit ɗiyi, amõhwək səvet məzərɓahawəni.

³ Asiri adek səket mossorgoɗe na kəla disiŋ, adek də vanday net məzelpaŋ nan məza aŋɗaŋ ɓa; gidigidi net ɗiy nan asukuk məlpeŋge, məpeŋgeŋ pilseŋge asəritinik kiyit mossorgoɗe.

⁴ Tay əpel nawɗi sən offo sən dələv nawa, kawzet gewleɗ naw də masalam, kawzlambreket kirtu məzuwaɗaŋgə, kakkpaŋget kirtu ka zəga nawzəma, karme gorɗeŋge nawa.

⁵ Daya məlĩ atekik də vat gulku.

⁶ Badaway net dəskot ammba vet gewleɗ ɓa, ɗiy gbogboŋɗe dəbaynən ɓa, ɗiy məɓeyit dəwak sənən ɓa, Yudit wətən Merari tərbəsənək wil də lelew na məɗa harata.

⁷ Təggbuku lukut nat gagəbay nata vi kasɓet məzuzəmaŋ sãhã na Israyel. Təppay mẽl məslahan də tursan aza harata,

⁸ tiynan muhur kiyət də gabaga, təgul lukut na ngərayã vi kawluɓun.

⁹ Hensek nat agəmək harani, lelew nat agəmək kiyni. Masalam arsak wəlani.

¹⁰ Mə Persəɗe akkereŋgək sən makra nata, mə Mediɗ attapaŋgək sən ɓəɓəl nata.

¹¹ Ya ɗiy naw en ɗar aŋzlaŋgək vaŋvəl nawgaya yaŋ net ageslne'eŋgi, ɗiy naw məddekit aŋzlaŋgək vaŋvəla, yaŋ ageslne'eŋ diyɗa; aslanənək wəleti, yaŋ attapaŋgə.

¹² Ɗiy mə tektekən ɓa etiliketinke, məɗi siti vaŋvi namta səka ənza va ɗiy ɗarə, azaŋgək addəv əlpa na Daya nawa.

¹³ Wanəyə gəlya sən Maŋgəlva, gəlyanalva meleketeni, Daya metiŋguk kənani gəm də gagdaka, naggət aka gbogboŋ nok məs nawɓapi ɓa.

¹⁴ Kəta məs kəzəməɗ pak dəɗɗaŋ sukun wəza vi kənahka yaŋ aɗɗaŋgə, kəslənək əmpəs noko azimiɗike; ɗəf tay nawziwsən əpel nok ɓa.

¹⁵ Mossorgoɗe gugriɗ waskotoŋ ɓa' səka gebbeti gəm waslahaŋ dit iŋkile, milɓeɗ walyuɓoŋ va timbe aboko. Ya məzugeslne sukun na, is tat ulasahã aketi.

¹⁶ Vi əzaɓ-Maŋgəlva dədannek suk zuk ɓa, səlhã ka əvəl nawzla kurmbuɗuk dədannek suk zuk ɓa. Ya məzugeslne sən Daya na pay pak metiŋgin aboko.

¹⁷ Əray aket ɗiy-ɗar məzərmaŋ makra də mahəlfa nawa. Daya məlĩ wampəlkiya də pay nawtawwəna, də əɗi offo gəm tentiwilgeɗ addəv gəɓa ziti, wahəmaŋ sən əssa məs agrak na ɓa.»

¹⁸ Adan agapaŋ a Yerusalem, agagdakanənək Maŋgəlva gəm səza ɗiy abburun ziti, aɗɗaŋgək əvəl nawzla kurmɗuku, əvəl net də makra paparə gəm əvəl temtem meɓɓeti.

¹⁹ Yudit təɗiyik zəgeɗ na Holoferne məs ɗiy apsətən nak ka zəgeɗ naɗɗa wəza addəv əɗi ki Maŋgəlva. Na zəga nawtek birteŋge məs təgəm səddəv giziŋ nan ka nata, təɗiyək ta' kana Maŋgəlva.

²⁰ Ɗiy pak annekeŋgi a Yerusalem aba gəla salala zəga na təla hoku, Yudit tat dəndəɗaŋgə.

Əgrak ənziya nat Yudit

²¹ Sə dərɓaget əvoŋɗeski, nawaydi pak amilik aka dələv nani. Yudit təmbatək a Betuli təsatək aka dələv nata. Sləmat tay nduhnduh aka pay nat aka dələv pakə.

²² Ɗiy diyɗa aŋglutənka, ya ɗəf tay dəsənət ɓa ənziya nat gərak təŋ səza Manase zələt amtə, azbet migilni.

²³ Təndək əzva diyɗa də ərəh gagdaka, təgalək addəv gəla na zələt hã gap əzva səkat də sle'i, təppatək balamək nat na kiyta. Təmtək a Betuli. Məndəkti addəv magamas na zəlta.

²⁴ Ɗiy na Israyel ahəmənək kigəbayət zəga na əvoŋ buhulu. Tak əmta nata, tuɗakək arya nat pak sit milmiŋgiɗin zələt Manase gəm sit ɗiy nata.

²⁵ Ɗəf tay nawgeslnegit mə Israyelɗe əmpa aka pay na Yudit ɓa gəm əvoŋɗe diyɗa sə dərɓaga əmta nata.