Yudit 14 - Bible en Guidar

Akiyor azbanək ətaf net mə Israyelɗe

¹ Yudit təɓsit kan na: «milmiŋgiɗwa məprəma. Məgəm kinəŋka məlaw aka zlava namə.

² Asna də mompumo pum, pay əɗi kiyən ləŋgə, nawaydi pak dəgəm gulom nani, zel də mbel zit pakə, kəgilyoŋgən sə walaŋgəla metiŋgini. Kəɗiyaŋgən daya abokum kəɗaŋgən va kəɓəs na wakəpurkoŋ də təki məpəlayya horum sek də təki nawga net ɗiy na Asiri an maddaabəŋ, ya kədawpurkoŋ ɓa.

³ Net wagimin zəgeɗ nawgay neti, waddoŋ a dibirgidik neti; wafɗehetin deyeɗe net məzəlpaŋ na Asiri; net tamə wanzoŋ a gizlirke na Holoferne ya arəhnən na ɓa. Geslne warme, wanzoŋ səbokum.

⁴ Də ərɓehet na, mənokum dit ɗiy naka dələv na Israyel pak wakəbeyin aket tiveɗ neti.

⁵ Ya tak kədaɗɗanən askəska, məya su Akiyor mə Ammoni ka dulagəni gəm dəsəngən ɗəf məs dəzelen gəla na Israyel gəm dəslən kəlazam va ama əmta.»

⁶ Ayanənək Akiyor səna Oziyas da. Səza agapə gəm awla ki Holoferne ambra va ɗəf taka naret ɗiy məkkelti, ndən kupu, əmpəs nan ɗe'i.

⁷ Səza məsilgini, al əskot ammba tələt Yudit, appu' abata yaŋ amna: «Kəta ɗiy na Yuda pak dəɗiyən kiyko, ɗiy naka dələv pak dəgeslne'eŋ daprəm iya noko.

⁸ Kakaŋ na, aboton su an kəgəɗ addivit əvoŋɗes pakə.» Yudit təboton sən an təgəɗ pak təŋ səza təgili hã gap pay məs təsat əpel sitis a walaŋgit ɗiyi.

⁹ Səza təgrak əpele, ɗiy arganənək vet də ənzla vaŋvəl dayadaya, walaŋgəla-metiŋ aknahək də vaŋvəl na ənneke.

¹⁰ Də ula an Maŋgəlva na Israyel agəɗ pakə, Akiyor atafək Maŋgəlva də əziw ɓəlɓələ, atafək əskəl awra addəv gəɓa zəni, arahək ki nenek a Israyel hã va pay dəpaŋka.

Kigəbay na Holoferne

¹¹ Də bapummo məlawni ki Holoferne nak aka zlava. Zel pak agəmənək gulomɗe neti, agilyoŋ pak də ngaɗekti aka surohho na mossogo metiŋ.

¹² Səza ɗiy na Asiri awlenini, aslənaŋ əssak sit deyeɗe net məzəlpaŋ neti; net tam addoŋ ənah sit deyeɗe neti, deyeɗe net naket ɗiy gabalɗe gəm sit deyeɗe net pakə.

¹³ Addoŋ a gizlirke na Holoferne anah sənən daya məɗiyən aka zəga an nawtoŋ pak na: «Afɗahan daya nam kana vi belemɗe tay ədanən kiyit nawpirke əlpa də mənamə ka kawzaŋ hã gap aza ɗəf an na dirɓe faɗə.»

¹⁴ Bagoas toŋgu, arga məslslara naddəv gizlirke, vi əɗɗum nan na Holoferne tay əleŋ dət Yudit.

¹⁵ Ya adan ɗəf tay dəprəm ɓa, ndən məslslara nak kosu, ndən toŋ a giziŋ arəh ɓulohho məmtən aka mazaŋga nan kiyin mərslani.

¹⁶ Bagoas aŋgəslək vaŋvəl dayadaya də əska morkoyo, əŋɗəsa gəm vaŋvəl gədakə, yaŋ aŋger lukutɗe nani.

¹⁷ Ndən toŋ a gizlirke a təki Yudit təsata, ya dərəhət ɓa. Ambat kakara azet ɗiy də əŋzla vaŋvəl na:

¹⁸ «Belemɗe atemeŋke; guluk təttaka net mə Ibriɗe təkiyək ərba wil aka gəla na məlĩ Nabukodonozor, vi Holoferne yaŋ afuŋ ɓulohho kiyən mərslani.»

¹⁹ Səza aprəmən əpeləska, deyeɗe net məzəlpaŋ na Asiri aŋgəretinik lukutɗe mə silipɗe neti; assoŋguk gərəŋ sawɓa, əhəm gəm vaŋvəl aslək hã a disiŋ a dibirgidiki.