Yudit 13 - Bible en Guidar

Yudit tat ərsla ki Holoferne

¹ Səza ɗəfəɗ atir diyɗa, gewleɗ nan agəmənək zit əmbata. Bagoas amsanək ma gizlirke nappaka; agilgitik ɗiy səza daya nani, addoŋ əvoŋgoŋgu. Vi baymet pak ayaŋka, sən asaŋgək mbazla diyɗa.

² Yudit tə kaka' məppa addəv gizlirke də Holoferne ɓulohho aka zəga nawvoŋ nani, vi mbazla abayək palala.

³ Yudit təɓsət balamək nat na təziwgin appaka na giziŋ tətaɗgən əgilye nat va ɗayɗayə, vi tənahək na watigil vi kakkama. Təpelək vaska'e sən Bagoas.

⁴ Ɗiy pak azaraŋgə səzani, muzliya ɓa, ɗəf metiŋgin ɓa, ɗəf tay dəpəl a giziŋ ɓa. Yudit, le' go'o də zəga nawvoŋ na Holoferne, tənah a makrat na: «Daya, Maŋgəlva na əɓap pakə, azi horok aka payəŋ aka wəza na vaw vi kawgagdakan Yerusalem.

⁵ Vi kakaŋki naslga sləma aket ɗiy na vawrayko gəm naknahan an nərəm nawzet məzuzelɗe məs dəsilyoŋ akamə.»

⁶ Ndəni tədder dəza ki zəga nawvoŋgo, go'o də ki Holoferne, təkdah masalam nani

⁷ tədder aza zəga nawvoŋgo, tərma muhur kiyni tənah na: «Asɓaw pay dəpaŋka Daya Maŋgəlva na Israyel.»

⁸ Təbəl təl sula də gbogboŋ nat ama wəlani, tərsla kiyni.

⁹ Yaŋ təkəɗeŋgək wəlaŋ zən səka zəga nawvoŋgo gəm təttor zəga nawtek birteŋge naket dədəkeɗi; ənziya siɗikke na, ndət vit təpsət ki Holoferne sət balamək nata,

¹⁰ təɗi addəv gabal na zəga nawzəm nata. Agilyoŋ sulegit pak matak va asərəkaŋ ədda əkkama. Agilyoŋ balsən dibirgidiki, azbanən lolohõ, apeŋgeŋ aka mossorgo metiŋ na Betuli agapaŋ a metiveɗ nani.

Ətoŋ nat Yudit a Betuli

¹¹ Yudit təɓsit məgaɗe na metiveɗ hã sə faraɗa na: «Mukolo, mukol metive. Maŋgəlva, Maŋgəlva nam tay də mənamə vi karban gbogboŋ na Israyel gəm əɓap nan aket məzuzelɗe va aɗɗa dəpaŋka.»

¹² Səza ɗiy na walaŋgəla-metiŋ nat aprəmən wəlata, agəmənək zit əpirke a maddamba na walaŋgəla-metiŋ; ayenin ɗiy məsɓet na walaŋgəla-metiŋ.

¹³ Baymet pak anzoŋko, təŋ səket kirni hã gap azet ɗiy gugriɗe, vi əgap nat tay azet va naggət akani, akolunək maddamba, atefiŋke, asɗanənək offo vi təki dəsangən suwaysuwayə, akaraŋgək kiyti.

¹⁴ Təɓsit də wəlat dayadaya na: Məɗi ki Maŋgəlva. Məɗi kiyni. Məɗi ki Maŋgəlva vi dəzargən ulasahã nan səka Israyel ɓa, ya aŋkinik məzuzelɗe nam də vaw na dəfɗəŋka.

¹⁵ Yaŋ təkdah kiyən səddəv gabalə, tərban siti təmna: «Ki Holoferne daya an gərak net məzəlpaŋ na Asiri yaŋka mula, zəga nawtek birteŋge məs avoŋ addəvən aka mbazla abay yaŋka. Daya abayək də vat gulku.

¹⁶ Də iya na Daya məs dəgu aka tive məs nəzbə, lelew na məɗa haraw ambəɗanək ka əza nan adaɗɗa mambray akaw ɓa vi karnokowa gəm karbəsu wili.

¹⁷ Ɗiy pak assoŋguk gərəŋgə; ndəɗaŋ ɓe', agagadakanə Maŋgəlva yaŋ anahaŋ aka ma taka na: Soko noko, aw Maŋgəlva namə, is məs kəzet məzuzelɗe net ɗiy nok dəpaŋka.

¹⁸ Oziyas aɓsət na: Kəta əzaɓ na Maŋgəlva Məsəɗəɗə dəsan akok dayki aket gil naka dələv pakə wətuwa, gəm soko sən Daya Maŋgəlva ndən məs dəzəməɗ disiŋ gəm dəlvafuŋ, ndən məs dədaw də is karzla ki məlĩ net məzuzelɗe namə.

¹⁹ Vi əɗɗum na zəga an kədawga azar na sə məkret ɗiy naɗɗumonən gbogboŋ na Maŋgəlva ɓa faɗə.

²⁰ Kəta Maŋgəlva dəɗɗa kərahgən gagdak hã faɗə, əzaɓ nan dəsan akoko, vi kəzək sləma aka zeŋgilok ɓa ammba ərba wil na mahəlfa namə, ya kəziwik təluk saŋ taka aka əskot namə kədaw sarra hã ŋgbusl aba Maŋgəlva namə.» Ɗiy pak anahaŋ na: «Kəta dəsan vaska, kəta dəsan vaska.»