Yudit 12 - Bible en Guidar

Yudit tat a dibirgidik net meseŋgiɗta

¹ Holoferne aɗiyək wən nan nawtoŋgət a təki əzəm nan məs dit zəgeɗ nawzəm way nan na təbəz babara, yaŋ anah sit dəkrat sətəngən way səza an nani gəm dəɓaɗaŋ sətəngən mbazla səza an nani.

² Yaŋ Yudit təmna: «Nəzəm na ɓa vi adawsan tive nazbər ɓa, an nəki avaw nədawzəm kaka'ə.»

³ Holoferne aɓsət na: «An əzəm məs novok agrakka, aŋga mədawrah vas napsuk di? Vi ɗəf təttaka na mahəlfa nok tay də mənam ɓa.»

⁴ Yudit təɓsən na: «Va kəsok madaroko, daya nawa, balamək nok təgrak na əzəm zəga an dəsan avat tak Daya dəknahan an məs aɗɗum naɗɗa də vaw ɓa ɓa.»

⁵ Deyeɗe net məzəlpaŋ na Holoferne akətən a gizlirke, təleŋ hã teteŋgit sini. Ndət le' aba pumpum.

⁶ Təslən ənah sən Holoferne na: «Kəta daya naw dəpəl sət tive sət balamək nan vi təgilgin kakkama.»

⁷ Yaŋ Holoferne aɗi sit məzuganən na adawtaktən ɓa. Təsatək a dibirgidik əvoŋ hoku. Ndət əmbat də dəfəɗ a lolohõ na Betuli gəm ndət əslslay a dibirgidik aret iŋkile miyma.

⁸ An təgilke, ndət əkkaman Daya Maŋgəlva na Israyel dədawgətgən aka tive nata vi nawkõhgit ɗiy nata.

⁹ Səza təmbatə, zət mubburun, ndət ɗew a gizlirke hã gap adawki sətən way nata kəlaza moskoyo.

Waynabaya na Holoferne

¹⁰ Aka əvoŋ mapoɗo'ən na, Holoferne adək waynabaya sit gewleɗ nan kaka'ə, dəslən əya ɗəf təttaka səmmbet məɗɗaŋ wəza nan ɓa.

¹¹ Aɓsən Bagoas, mətawkoyom daya naka wəza nan pak na: «Ndok ambəɗat ɗak mə Ibriɗ na nokdakəs tədegin azamə, təzəmgəni gəm təsəgən mbazla də mənamə.

¹² Vi nam na wasan səm va dərwa əppat ɗak zəv vaskəs əmbat məza əsap dəndət ɓa. Vi an məkkənət ɓa, watəmas akamə.»

¹³ Bagoas vit səba Holoferne, atoŋ eŋgil azata yaŋ amna: «Kəta guluk vaŋkəŋ tədaɗɗa sosokko dawgilyet əmbat aza daya naw tərahgən gagdak aban ɓa, wakəsə mbazla sap dəndəmə, wakənneki gəm wakəkkpaŋ dəpaŋ va taka səret gorɗeŋge net mə Asiri məs dədassoŋ əngil ana Nabukodonozor da.»

¹⁴ Yudit təɓsən na: «Nawa nənan nəgəslgən ma də daya naw di? An dəsan lew aran pak wanəgəɗ kakara naɗɗani, ya wasan su ənnek hã gap pay namta nawa.»

¹⁵ Ndət le', zəgeɗ na gawla nat kulo'u gəm zəgeɗ na gawla net gil pakə; balamək nat toŋgu, təpak sət gabaga na zeŋze na time məs tətaf səva Bagoas afuŋ aba Holoferne, vi wəza nan an ɗayɗay na kazəm akan səka ɗuffoy.

¹⁶ Yudit toŋgu, təvoŋ aka zeŋze na time məpakən naka; makra Holoferne anneke, asanək gərəŋgə. Əŋgla nawsap dəndət asil sənən diyɗa. Aŋgələk kəta kawluɓut təŋ səza pay awləta.

¹⁷ Holoferne aɓsət na: «Asə mbazla gəm annek də mənamə.»

¹⁸ Yudit təɓsən na: «Wanəsə kana daya, vi nərahək gagdak dəpaŋ məza nərah va ndən ɓa təŋ səza məwuwa.»

¹⁹ Adan tətaf an balamək nat təzaɓani, ndət namnam əzəmən gəm ndət mbazla hərə abani.

²⁰ Holoferne anneki vita yaŋ asə mbazla diyɗa dayki an ɗayɗayə, dəsə ɗah vas ɓa va səza məwani.