Yudit 11 - Bible en Guidar

Yudit aba Holoferne

¹ Holoferne aɓsət na: Asok zuko gulku, mokrok adawzlah ɓa, vi mbərayən tay nəgəɗ sən ɗəf təttaka dətaf əgəɗ sən wəza sən Nabukodonozor məlĩ na dəlvafuŋ pak ɓa.

² Ya kakaŋ na, an ɗiy nok dəssoŋ aket mossorgoɗe dəzelewən ɓa, nəslan na tulhõ naw aket ɓa. Ya ndəɗaŋ dəŋglaŋ aŋ van aka ki ziti.

³ Kakaŋ na, anah suwa, vimi kənzok sənet da kəde anamda di. Vi, kəde na vi əkõh noki. Asok ɓatɓatə, dəfɗəŋka wakəsok madoroko vaska'a addəv pay an dədazzani.

⁴ Ɗəf tay nawgəɗ suk mbərayən ɓa; moggon adagəɗ sukun dərəŋgə, va aslə sit gewleɗ na daya naw məlĩ Nabukodonozor.

⁵ Yudit təɓsən na: «Ataf əpel nat balamək noko, balamək nok təpel aboko, nəwəna wən sən daya naw dəfɗəŋ ɓa.

⁶ An kətafək əpel nat balamək noko, Maŋgəlva waknahan wəza nan də isi, daya naw addak na səddəv an adarma naɗɗa ɓa.

⁷ Də zeŋgile Nabukodonozor məlĩ na dəlvafuŋ pakə, gəm də əɓap nani, ndən məs dəslənuk nakkelet ɗiy mederet pakə, mbəlembəle isi ɗiy adawgəɗ senən wəza gəm əmpa zəgeɗ nawra, zəgeɗ memeyẽɗi dit biŋgeɗi na disiŋ wassoŋ mederet sən gbogboŋ na Nabukodonozor də gəla nan pakə.

⁸ Vi məprəmək əpel aka maɗɗula noko gəm pepet noko, tay əbbalanən aka dələv pak na istə kaka moggok aka kiva na məlĩ noko, məs əɓap addəv əsəna gəm naggət akan addəv əsən gabba əgaya.

⁹ Dəwəl sən əpel məs Akiyor apel addəv əkkal napsa əsəɓa, məprəmək əpele vi ɗiy na Betuli akõhgənənka gəm aboton sitik an anah pak aboko.

¹⁰ Vini, daya mərbəzəga, kədawzelen əpel nan ɓa, aɗi a mokroko, vi gesiŋgi. Vi mahəlfa nam məzga səni ɓa, masalam atər na azet an dəɗɗaŋ mambray aza Maŋgəlva ɓa ɓa.

¹¹ Ya kakaŋ na, daya naw amndan na eŋgil məza əska wəlet ɓa ɓa, əmta waderzeh aketi, mambray məs adawdan sənən gədəv Maŋgəlva net dəndən warme pay amzlahaŋ səmmban pakə.

¹² Adan əzəm tay əkkpap siti, iŋkile akkpaŋgaŋgək tuwãhə, tay əɗɗumoŋ narme zəgeɗ memeyẽɗ neti, gəm zəgeɗ en Maŋgəlva aɗi sit wən nan addəv mahenziŋ nan adawzimnin ɓa, aynanənək nawzimti.

¹³ Dadabya na haykəmari, taka səddəv kəlaw na mbazla gəm na mẽl məs aɗiyaŋ zaɓ ammbet məsdəlveŋge dəssoŋ a Yerusalem aba Maŋgəlva namə, armanənək a mekret nawzəmnə dəka tive tay aba ɗəf maɓɓan səret ɗiy dərəŋgəngən də van ɓa.

¹⁴ Aslənaŋgək a Yerusalem vi ɗiy dəssoŋ adak dayday aɗɗaŋgək vaska, ɗiy məs kəta dədawpel sitin aka an əsap net ɗiy məsɓet apəl tive.

¹⁵ Pay adawrəhnən na məpəl siti tive gəm adawzəmaŋ zəga vaŋka, dəpas na Maŋgəlva wappet ammba vok kəzetgini.

¹⁶ Vini, in balamək nok na, adan nəsən as pakə, nənzaw sənetda, Maŋgəlva aslənwək aŋ kawsap də is nəknahangən zəga an məs ɗiy naka dələv dəprəmən wən nan pak dəggətaŋgəni.

¹⁷ Vi balamək nok məgeslne sən Maŋgəlva tə, tat əgəɗ sən wəza sən Maŋgəlva na disiŋ dəfəɗ də kapay pakə. Təŋ kakaŋka, asən na wanəsaw azoko, daya nawa, balamək nok watəgil də dəfəɗ a lolohõ, wanəkkaman Maŋgəlva məs nanah su pay aɗɗaŋ mambray vani.

¹⁸ Wanəde ənah suko, kəgilgin dit məzəlpaŋ nok pakə, ɗəf tay səret nawziw abok ɓa.

¹⁹ Wanəkuk balsən Yuda hã kəgapgən aba Yerusalem; wanəɗi mazaŋga na məlĩ nok addakən, wakəke va timeŋgiɗ məza məzutaɗa net ɓa, məza kəra əhorok ɓa, Vi mənah suwi gəm mərban suwi as van va aza əsən na hənhən nawa, məslənwi vi nənah sukgəni.»

²⁰ Əpel nat annekik zə Holoferne dit deyeɗe net məzəlpaŋ nan pakə; aggətaŋgək aka maɗɗula nata yaŋ aɓɗaŋ na:

²¹ «Guluk tat va ndət ammba dələv ɓa dəwəl sən lelew na məɗaharata gəm na əsən əpele.»

²² Holoferne aɓsət na: «Maŋgəlva aɗɗak moggon nawslənuk abet ɗiy vi kasɓan vawa gəm kawzet ɗiy en məzuzelenin daya nawa.

²³ Nok na, lelew kənan aza ziw noko gəm məs pepet addəv əpele. An kəɗɗak va kənahə, Maŋgəlva nok wasan Maŋgəlva nawa; is zək nok wakəsok eŋgil ana məlĩ Nabukodonozor da gəm sləmok wabbal aka dələv pakə.»