Yudit 10 - Bible en Guidar

Yudit tələk a dibirgidik net məzuzelɗe

¹ Adan təgrak əkkaman Maŋgəlva na Israyel gəm təgrak əpel nata,

² ndət le' sə təki uppu' nata, təyət məgəɗ wəza nata ndət eŋgil piriki addəv gəla məs tədawsat pay naffete gəm na əzləra.

³ Ndət lukut na gəlabay tugul nak gbuk səzata, ndət mbegit lukutɗe narbat na gagəbaytə naka, təslslayə gəm təppay mẽl məslahən də tursan moggoni; təkot muhur kiyta, tiynan də gabaga gəm tugul lukutɗe lelewɗe en tədawgul aka Manase zələt asan madarani.

⁴ Ndət hensek kpa'kpa' aka təlta, heverzleɗ deŋ awlata, menzerɗe kpa'ə, ndemeɗ nat kulo'u, metendeŋɗe kulo' aza sləmata gəm zəgeɗ na gawla nat pakə, təkkpaŋgək lalawək nawsim aret zel nawlətən pakə.

⁵ Təpsət mbazla də kwenekwene gəm bəbər na mẽl avat məgəɗ wəza nata; təknahək megemsele nat də gəpa na haykəmari dadabya, gəm gəpa məpəpla na uwa net wəleŋɗe məkleketi, meptekeɗi gəm moŋvo; tətir zəgeɗiski, təpsit balamək nata.

⁶ Agilyoŋ də maddamba na Betuli yaŋ arəhnən Oziyas gəm ɗiy məsɓet na walaŋgəla-metiŋ, mãy Kabris də Karmis tahəŋ ziwziw adaka.

⁷ Adan awlətən na təddəɗka gəm lukut nat addəɗka, asimtinke sən lelew nata, yaŋ aɓsətən na:

⁸ «Kəta Maŋgəlva net efiŋgiɗim dəɗɗa kərahgən mbəlembəle kəknahangən əɗɗum nok ka əkaɓ net ɗiy na Israyel gəm ka gagdak na Yerusalem!»

⁹ Təgagdakanək Maŋgəlva, yaŋ tənah sit na: «Məɗi wən nan ka dəkol suwəngən mative na walaŋgəla-metiŋ ka nəgilgin əknahan an məs kəpeleŋ akawəs kana»; aɗiyənək wən nan sit gewleɗ dəkol sətəngən metive va tənahə.

¹⁰ Gewleɗ nak aɗɗanənək va mənah siti, yaŋ Yudit təgil dət balamək nata. Zel naddəv walaŋgəla-metiŋ tay ulətəni hã ndət pirik səka mossorgo metiŋ ndət toŋ ki walaŋ, səɓɓan na dulətən əmpa ɓa.

¹¹ Ambataŋgək heret abet sek addəv walaŋ yaŋ məga maddaabəŋ net mə Asiriɗe azzoŋ ələm səta.

¹² Armətəni gəm attokotən na: «Səkəlaŋ kəde di? Səŋga kəde di, Aŋga kədaddok di?» Təzlan na: «Waŋ mə Ibrik nani, ənza nədanzaw sənetda vi wabətaŋ ammba vokum.

¹³ Naw na, Holoferne nəde ula, daya an day net məzəlpaŋ nokum, vi kawki sən əpel an gegesiŋ gəm karban tive an adazban vi dəmõhgən kivadələv net mossorgoɗe baymani məza ɗəf təttaka nan əza ɓa.»

¹⁴ Səza aprəm əpeləska gəm asəŋgləkanən harata, arəhənək na lelewəktə sawɓa, ɗiy nek aɓsətən na:

¹⁵ Kəkõhgənək zeŋgilok dawgəm zuk əpirkok əzzok aba daya namə. Kakaŋ na, atoŋ addəv gizlirke nani; ɗiy səram wakukun kappokun ammba vani.

¹⁶ An kəgapək abani, mokrok adawzlah ɓa, ya kəmndagangən əpel noko, wagəɗ suk moggoni.

¹⁷ Aweleŋgik zel səkat səreti asapaŋ azat dət balamək nata, aketin hã a gizlirke na Holoferne;

¹⁸ ɗiy akkalaŋgək ngboŋ a dibirgidiki vi mətəli ma aka əzza nat Yudit addivit gizlirkeɗe, ɗiy azzo əssoŋ kiyət tərwəslə, nat tamə tat appaka na gizlirke na Holoferne də iya əga naprəman sən əzza nata.

¹⁹ Tay əsimin lelew nata, tay əsimin mə Israyelɗe aka wən nata, yaŋ adawnahaŋ a walaŋ zit na: «Naway nawzel ɗiy məs dit gil van aret di? Dədah məppəlgən ɗəf mizilin təttaka madaran ɓa: Ɗiy en dəppaŋ mederet waɓap əmbəɗetin ɗiy səka dələv pakə.»

²⁰ Ɗiy en dədawvoŋgoŋ amaŋgava Holoferne viteŋ dit deyeɗe net məzəlpaŋ nan pakə, atoŋgətən Yudit a gizlirke.

²¹ Holoferne tay əffet aka zəga nawvoŋ nani, ammba zəga nawtek birteŋgeɗe məɗɗan pepreŋge, na meleŋge, dit girmeŋge na sləma mazakalyãkalyã gəm girmeŋge na sləma meɓɓet mitipti.

²² Məprəman səni wən nata, yaŋ ambat ama gizlirge nan offo mətalən aban zəlorro.

²³ Səza Yudit təgap aban dit deyeɗe net məzəlpaŋ nani, pakgit aggətaŋgək aka lelew nata. Ndət guduku, tuppu' abani, gewleɗ nan asilgitəni.