Yosuwa 20 - Bible en Guidar

Walaŋgəleɗe nawɗam net piɗe ( 20:1-9 ) Walaŋgəleɗe gugriɗ nawɗam net piɗe

¹ Yawe apel sənək Yosuwa amna:

² «Apel sit mə Israyelɗe, anah sit na: Məwel walaŋgəleɗe gugriɗ nawɗam net piɗe, məs nəslən Moyis ənah səkum wən net neki.

³ Vi məbaygəbay də mandara, məza nzeɗ ɓa na, dənzangən adaka, dəssoŋ sukuməngən ka təki nawɗam sən məmpəlki piɗe.

⁴ Dənzangən a walaŋgəla-metiŋ taka səretiski, dəziwgən a maddamba na walaŋgəla-metiŋ vani, dəbotongən an dəgəɗ van sit ɗiy gugriɗ nadaka; ɗiy gugriɗ vet dətafnəngən a walaŋgəla vani, dəpsənəngən təki nassa nan də gəla adak aweleŋti.

⁵ An məmpəlki piɗe azbanək na, ɗiy na walaŋgəla vet adawgilgin sənən məbaygəbay van ɓa. Vi dəvan abay məlmən van ɓa, vi azelik lahəŋkay ɓa.

⁶ Wasan də gəla a walaŋgəla-metiŋgis hã pay nawziw nan aba ətawwən van aba sap net ɗiy pakə, hã gap əmta na daya net məsdəlveŋge məs dəsan aka wəza pay daska, asna, məbaygəbay van wamndan ananda addəv walaŋgəla-metiŋ nan məs anzan sədak naka.»

⁷ Yaŋ kan awelnin, walaŋgəla-metiŋ na Kedes səka dələv na Galile, səggərəm na Neftali, gəm Sikem səggərəm na Efrayim, gəm Kiryat-Arba, məs adawyaŋ na Hebron, səggərəm na Yuda.

⁸ Dəgar ki Yurden, dəmmba pay nampum na Yeriko na, awelinik Beser, a ɗagra'a na kapta-muyã, aka va na mahəlfa na Ruben, gəm Ramot sə Galad, aka va na mahəlfa na Gad, gəm Golan na Basan aka va na mahəlfa na Manase.

⁹ Eskiŋ dəssoŋ walaŋgəleɗe gugriɗ məsler aket sit mə Israyelɗe beymeti, sən molhõyõ məs dəsan aweleŋgit də gəla, vi ɗəf məs dəbay ɗəf də mandara pak dənzangən adaka, məmpəlki piɗe adawbayən ɓa, hã gap ndən ziw aba sap net ɗiy pakə.