Yosuwa 18 - Bible en Guidar

Vẽpəlu a Silo viyit mahəlfaɗe dəmmbraŋ buhulu

¹ Səza abayən ma əzəm dələv na, sap net mə Israyelɗe beymet akkalaŋgək a Silo, ampanən gizlirke nalma də Maŋgəlva adaka.

² Mahəlfaɗe net mə Israyelɗe tahəŋ buhul dəmmbraŋ məs dərəhaŋ dələv haran net tagay ɓa.

³ Yosuwa aɓsit mə Israyelɗe kan na: «Hã dəwɗe kədassoŋ də dədək nawmbat əssa aka dələv məs Yawe Maŋgəlva net efiŋgiɗkum apsukuməŋ di?

⁴ Məwel zel hoku aza mahəlfa pakə, nəslingini, dəsilyoŋgən əbbalan dəlva, dəvernəŋgən va asani va adawɗak aza haran neti, asna kəmndoŋgən azawa.

⁵ Duɗakanəngən dələv van təɓələn buhul a weleŋti: Yuda dəsangən aka dələv nan kəla dohoŋ, gəla na Yosef tam akan nan də disiŋ.

⁶ Nokum Kəvernəngən va dələv muɗakan təɓələn buhul van asani, kəki suwəngən aŋka, nəɗɗa sukumgən vẽpəlwa aŋ aba Yawe Maŋgəlva namə.

⁷ Məsən na, hara dələv net mə Leviɗe asan na awalaŋkum ɓa, vi hara dələv net na, ndəni wəza na məsdəlva na Yawe. Dəwəl sit may Gad, Ruben gəm wəɗak na mahəlfa na Manase na, arəhaŋgək hara dələv net məs Moyis gawla na Yawe apsit dəmmba pay nampum, dəgar ki Yurden.»

⁸ Ɗiy vetis asilyoŋ addoŋgu. Yaŋ Yosuwa aɗi wən sit ɗiy nawvernən dələv van də ənah na: «Məddoŋgu, məbbalan dələv vani, məver va asani, kəmndoŋgən azawa, nəɗɗa sukumgən vẽpəluw aŋ a Silo aba Yawe.»

⁹ Ɗiy nek addoŋgu, abbalanən dəlva, avernən addəv ɗerewel va asan azet walaŋgəleɗe gugriɗe nan təɓələn buhul. Siske addoŋ aza Yosuwa a dibirgidik a Silo.

¹⁰ Yaŋ Yosuwa aɗɗa sit vẽpəlwa aba Yawe a Silo, awɗak dələv van sit mə Israyelɗe naway pak də haran nani.

Dələv haran na Benyamin

¹¹ Hara dələv na mahəlfa na Benyamin vẽpəlwa arbə daabəŋ aza məlma ziti. Hara Dələv an məpsit van ndəni a walaŋ an net kirtin Yuda də an net kirtin Yosef.

¹² Məŋge net sə kəla disiŋ asilyoŋguk təŋ sə Yurden, apeŋgeŋ də təkzləm Yeriko kəla disiŋ nani, apeŋgeŋ aka mossorgo dəmmba pay na moskoyo, abayən met a kapta-muyã na Bet-Awen.

¹³ Siske na, meŋge aziyənək heret a Luz, dəka təkzləm Luz kəla dohoŋ nani, məs adawyaŋ na Betel, ndəɗaŋ kan prik a Atro-Addar dəka mossorgo məs dəsan dohoŋ na Bet-Horon nafuŋ.

¹⁴ Meŋge adoɗoŋguk səmmba pay na moskoy kəla dohoŋ təŋ sə mossorgo məs dəsan ama hara Bet-Horon də dohoŋ, abayən met a Kiriyat-Ba'al, məs adawyaŋ na Kiryat-Ye'arim, walaŋgəla-metiŋ na mahəlfa na Yuda. Eskiŋ meŋge nammba pay na moskoyo.

¹⁵ Meŋge na dohoŋ atəŋgaŋgək sə Kiryat-Ye'arim, abayən met a met iŋkile na Nefto'a.

¹⁶ Apurkoŋ də ba mossorgo dəsan ama hara miktik na Ben-Hinnom, disiŋ ki miktik net mə Rafayɗe. Apurkoŋ sə miktik na Hinnom, də dohoŋ na təkzləmət mossorguk net mə Yebusɗe, asereheŋ hã a En-Rogel.

¹⁷ Yaŋ adoɗoŋ kəla dohoŋ, heret sek aka En-Semes gəm Gelilot dəsan ama hara təki ɗagra'a na Adumim. Siske apurkoŋ aka gərəm adawyaŋ na Bohan wətən Ruben.

¹⁸ Siske meŋge adawaŋgək dəka təkzləm mossorgo na Araba, təkzləmən nadda də disiŋ, apurkoŋ a Araba.

¹⁹ Siske meŋge adawaŋ də təkzləm Bet-Hogla də disiŋ nani, asliweŋ a Bet-Hogla, əmbat əbaymet aka məslere na Yurden a pehe na bətuwa, a metteɓ ma Yurden də disiŋ. Eskiŋ meŋge na dohoŋ.

²⁰ Meŋge nammba pay nampum na, ndəni Yurden. Aski hara dələv na zev Benyamin, aza məlma na ziti, dit meŋge nan dahãdahã pakə.

²¹ Walaŋgəleɗe na zev Benyamin, aza məlma na zit na ndəɗaŋgə: Yeriko, Bet-Hogla, Emek-kessis,

²² Bet-Araba, Semarayim, Betel,

²³ Abim, Para, Ofra,

²⁴ Kefar-Ammona, Ofni gəm Geba, sap walaŋgəleɗe gugriɗ kəlaw kiyit sula dit walaŋgəleɗe memeɗeŋɗe neti.

²⁵ Gəm Gabawən, Rama, Berot,

²⁶ Mispe, Kefira, Mosa,

²⁷ Rekem, Irpe'el, Tarala,

²⁸ Sela, Elef, walaŋgəla-metiŋ net mə Yebusɗe, va ənah na Yerusalem, Gibeya gəm Kiriyat, sap walaŋgəleɗe kəlaw kiyit poɗo dit walaŋgəleɗe memeɗeŋɗe neti. Aski hara dələv na zev Benyamin aza məlma na ziti.