Yosuwa 17 - Bible en Guidar

¹ Mahəlfa na Manase tizi na Yosef arahək hara dələv nani. Makir tizi na Manase, afən Galad arəhək Galad vani gəm Basan, vi nan van alpa sawɓa.

² Hara dələv net mambirgit kirtin Manase aza məlma na ziti; anet kirtit may Abiyezer, Helek, Asriyel, Sekem, Hefer, Semida, ndəɗaŋgə kirtin Manase wətən Yosef en mezeŋgleket aza məlma na ziti.

³ Selofehad wətən Hefer, Hefer wətən Galad, Galad wətən Makir, Makir wətən Manase na, nan dərah uwa mizilin ɓa, muguluŋgit awə kaka'ə, iya net na: Mahla, Nowa, Hogla, Milka gəm Tirsa.

⁴ Yaŋ kirin vet azzoŋ azet may məsdələv Ele'azar, Yosuwa wətən Nun gəm ɗiy gugriɗe də ənəh na: «Yawe anah sənək Moyis dəpsəmgən hara dələv nam aweleŋgit milmiŋgiɗmə.» Yaŋ apsit hara dələv net kirin vet aweleŋgit mediyeŋgiɗit va Yawe aɗi wən nani.

⁵ Ndəni Manase arah haran nan təɓələn kəlaw mbəksa dələv na Galad də Basan dəssoŋ dəgar ki Yurden.

⁶ Vasna, kirtin Manase muguluŋgit arəhaŋgək hara dələv net a weleŋgit kirtin en mezeŋgleketi, dələv na Galad tam asanək ka net kirtin en mambirgiti.

⁷ Meŋge na Manase asilyoŋguk sə Aser gap a Mikmetat dəsan ama hara Sikem, addoŋ də dohoŋ na En-Tappuwa.

⁸ Dələv na Tappuwa van na Manase yi, ya Tappuwa naket meŋge na Manase van na, net kirtin Efrayimi yi.

⁹ Siske na, meŋge esliweŋgik akat lolohõk na Kana də dohoŋ nata. Walaŋgəleɗe gugriɗ vetis, na Efrayim əŋgə addekit walaŋgəleɗe gugriɗ na Manase. Məŋge na Manase də disiŋ ki lolohõŋgə, abayən met a pehe naddak təkiya.

¹⁰ Vasna, dohoŋ asanək na Efrayim, disiŋ tam na Manase; pehe naddak təkiyə kan meŋge neti. Aser dəsleret kəla disiŋ, Isakar tam dəsleret kəlammba pay nampum.

¹¹ Aka dələv na Isakar gəm na Aser na, Manase arəhək Bet-Se'an dit walaŋgəleɗe nani, gəm ɗiy na Yible'am dit walaŋgəleɗe nani, gəm ɗiy na Dor dit walaŋgəleɗe nani, gəm ɗiy na En-Dor dit walaŋgəleɗe nani, ɗiy na Ta'anak dit walaŋgəleɗe nani, ɗiy na Megiddo dit walaŋgəleɗe nani, aɗɗaŋgək kivadələv gugriɗe hoku.

¹² Ya kirtin Manase dəɓapən əmõh walaŋgəleɗe gugriɗes ka net ɓa, mə Kana'anɗe assoŋguk hərək hərək aka dələv van də gəla.

¹³ Adan mə Israyelɗe akkpaŋgaŋ gboŋgboŋ na, akkpeŋgetinik mə Kana'anɗe ka belemɗe ya dərɓehetin dərɓəh ɓa.

¹⁴ Kirtin Yosef apeleŋ sənənək Yosuwa, aɓɗaŋ na: «Mə dəray kəpsəm dələv gəlan taka kaka' ka nam di? Gəsa mənan ɓa, vi Yawe aɗɗak əzaɓ nan akamə.»

¹⁵ Yosuwa aɓsit na: «An ɗiy diyɗa kənanən na, məpeŋ addivit wəleŋɗe rəɓə, kərslaŋgən təki səzan net mə Perziɗe dit mə Rafayɗe adan mossorgo na Efrayim hurɗukkoy azokuməŋka.»

¹⁶ Kirtin Yosef aɓɗaŋ na: «Ki mossorgo atafəm na ɓa, əmpa na, mə Kana'anɗe beymet məs dəssoŋ də gəla a təki məpəlayya nan tahəŋ dit mawteŋɗe net pilseŋge nawgay na təbza: ndəɗaŋ yes may ɗiy na Bet-Se'an dit walaŋgəleɗe məzuzlanən a meti gəm en na təki məpəlayya na Yizrel pakə.»

¹⁷ Yas kan Yosuwa apel sit kirtin Yosef, anet may Efrayim gəm wəɗak na zev Manase, amna: «Gesiŋ, ɗiy diyɗa kənanaŋ sawɓa, guromɗe van kənanaŋgə'e. Vini kan, hara dələv nokum asan na taka ɓa.

¹⁸ Ki mossorgo dədawsan suko, də asan wəleŋɗe rəɓ zlaŋ na, kəbəlangəni, kəzəmgən mani. Vi mə Kana'anɗe assoŋ dit mawteŋɗe na təbəz nawgay dit pilseŋge may assoŋ gurom zlaŋgə, wakəgəm ma gebbeti.»