Yosuwa 13 - Bible en Guidar

Uɗak na dəlva ( 13:1—22:34 ) Dələv nammba pay nampum na Yurden 13:1-33 Dəlveŋge en dəmbraŋ nawmõhõ

¹ Yosuwa agalək sawɓa, Yawe aɓsən na: «Yaŋ na, kəgalək diyɗa kana, ya, dəlveŋge ambraŋgək diyɗa nawmõhõ:

² Dəlveŋge en dəmbraŋ yeŋki: dələv net mə Filistiɗe gəm net mə Gesurɗe,

³ təŋ sə Sihor dəsan ama hara Eziptə hã aza dələv na Ekron kəla disiŋ, məs adawɗiyaŋ va net mə Kana'anɗe. Əsap net milyeŋge mə Filistiɗe sle' tay adaka: an na Gaza, an na Asdod, an na Askalon, an na Gat də an na Ekron, gem mə Avviɗe;

⁴ Sə dohoŋ na, dələv net mə Kana'anɗe bayman gəm Me'ara net mə Sidonɗe hã a Afek hã aket meŋge net mə Amorɗe,

⁵ gəm dələv na mə Gebal də Liban na kəlammba pay nampum bayman, təŋ sə Ba'al-Gad aba gərəm na Hermon hã gap a Lebo-Hamat;

⁶ ɗiy naggərəm beymet təŋ sə Liban hã a Misrefot-Mayim, beymet mə Sidonɗe. In nədarɓihit səbet mə Israyelɗe. Kuɗakgən dələv van sit mə Israyelɗe ka neti va nəɗi suk wən nan kaka'ə.

⁷ Yaŋkəŋ na, Awɗak dəlvəŋ dəsangən ka haran net mahəlfaɗe vaytak gəm na wəɗak na mahəlfa na Manase.»

Uɗak na dələv an dəgar ki Yurden

⁸ Wəɗak na mahəlfa na Manase, mahəlfa na Ruben, na Gad, arəhaŋgək haran net məs Moyis apsit dəggar ki Yurden, kəlammba pay nampum. Va Moyis Gawla na Yawe apsiti,

⁹ təŋ sə Arower ama məlpa na Arnon, gəm walaŋgəla məs dəsan addak miktik vanəska, sap də mossorgo na Madaba hã gap a Dibon,

¹⁰ gəm walaŋgəleɗe na Sihon məlĩ net mə Amorɗe məs dəzəm məlĩ təŋ sə Hesbon hã aket meŋge də dələv net kirtin Ammon.

¹¹ Gəm əmpa Galad də dələv net mə Gesurɗe dit mə Ma'akatɗe, gəm gərəm na Hermon bayman, də Basan bayman hã a Salka.

¹² Sə Basan tam na, dələv na məlĩ Og məs dəzəm məlĩ aka Astarot gəm Edrey. Ndəni dəmbər səmmbet madambərgit mə Rafayɗe. Ɗiyis pak na, Moyis askak wəleti, arɓehetike.

¹³ Ya də aspak na, mə Israyelɗe dərɓehetin mə Gesurɗe dit mə Ma'akatɗe ɓa, ndəni mə Gesurɗe dit mə Ma'akatɗe assoŋ də gəla aweleŋgit mə Israyelɗe hã pay dəpaŋkəŋka.

¹⁴ Mahəlfa na Levi yi kaka' məs dərah hara dələv nan ɓa. Haran net addəv əvəl nawzla kurmbuɗuk sən Yawe Maŋgəlva na Israyeli yi, va anah siti.

¹⁵ Moyis apsənək hara dələv na mahəlfa na Ruben aza məlma na ziti.

¹⁶ Dələv net na, təŋ sə Arower dəsan a ma məlpa na Arnon gəm walaŋgəla naddak miktik nadaka gəm bayma mossorgo an go'o aza Madaba,

¹⁷ Hesbon dit walaŋgəleɗe gugriɗ nan beymet məs dəssoŋ a təki ɗagarra, va: Dibon, Bamot-Ba'al gəm Bet-Ba'al-Me'on,

¹⁸ gəm Yasa, Kedemot, Mefat,

¹⁹ gəm Kiryatayim, Sibma, Seret-Sakar aka mossorgo na miktiki,

²⁰ gəm Bet-Pe'or, də kiva mossorgo na Pisga gəm Bet-Yesimot,

²¹ gəm walaŋgəleɗe gugriɗ na təki ɗagarra, bayma dələv na Sihon məlĩ net mə Amorɗe məs dəzəm məlĩ a Hesbon. Moyis askak wəlan sap dit deyeɗe na Madiyan adawyaŋ na Evi, Rekem, Sur, Hur gəm Reba məs dərmanən vet aza Sihon, dəssoŋ də gəla aka dələv adaka.

²² Məwəl helig Balam wətən Be'or pak tay eret ɗiy məs mə Israyelɗe abayaŋ də masalam.

²³ Meŋge na dələv net kirtin Ruben na, ndəni Yurden də kiyən tərwəslə. Aski hara dələv net kirtin Ruben aza məlma na ziti, walaŋgəleɗe gugriɗe gəm walaŋgəleɗe memeɗeŋɗe neti.

²⁴ Moyis apsənək hara dələv na mahəlfa na Gad aza məlma na ziti,

²⁵ an dəsan sit na, ndəni: Yazer dit walaŋgəleɗe gugriɗ naka dələv na Galad beymeti, gəm pəɗak na dələv net mə Ammonɗe hã gap a Aro'er go'o də Rabba;

²⁶ Gəm, təŋ sə Hesbon hã a Ramat-Mispe də Betonim, gəm əmpa sə Mahanayim hã aket meŋge na Lidbir;

²⁷ gəm a miktik na Bet-Haram, Bet-Nimra, Sukkot də Safon, mambərgən dələv na Sihon məlĩ na Hesbon, sap də Yurden gəm kiyən tərwəsl hã a metteɓ ma pehe na Kinneret dəgar ki Yurden ammba pay nampum.

²⁸ Aski hara dələv net kirtin Gad aza məlma na ziti, walaŋgəleɗe gugriɗe dit walaŋgəleɗe memeɗeŋɗe neti.

²⁹ Moyis apsənək hara dələv na wəɗak na mahəlfa na Manase, asan ka na wəɗak na mahəlfa net kirtin Manase aza məlma na ziti.

³⁰ Dələv net na, təŋ sə Mahanayim də Basan baymani, dələv na Og məlĩ na Basan, gəm walaŋgəleɗe memeɗeŋɗe na Yayir addəv Basan, aɗɗaŋgək walaŋgəleɗe gugriɗ kaklaw sləre.

³¹ Gəm wəɗak na dələv na Galad, də Astarot gəm Edrey walaŋgəleɗe gugriɗ na məlĩ Og na Basan. As pak net kirtin Makir wət Manase yi, sən wəɗak net kirtin Makir aza məlma na ziti.

³² Aski dələv məs Moyis awɗak a muyã na Mo'ab dəgar ki Yurden, dəmmba pay nampum kivan dakadaka də Yeriko.

³³ Ya sən mahəlfa na Levi na, Moyis dipsit hara dələv net ɓa; Yawe Maŋgəlva na Israyel, ndəni hara dələv net va anah sit wən nani.