Yosuwa 10 - Bible en Guidar

Məskani wəlet milyeŋge mə Amorɗe

¹ Mbaraka Adoni-Sedek, məlĩ na Yerusalem, aprəmək na, Yosuwa azəmək Ay, abeyinik ɗiy pakə, aɗɗak an agəɗ sən Yeriko də məlĩ nan sən Ay van də məlĩ nani, may na, ɗiy na Gabawən aslereŋgik dit mə Israyelɗe, tahəŋ də gəla a weleŋti.

² Geslne armek sən wən van sawɓa, vi Gabawən van walaŋgəla-metiŋgin gba walaŋgəleɗe net milyeŋge gugriɗe yi, ɗiy nadak pak guromɗeŋgə, adayək ki Ay.

³ Ndəni kan, Adoni-Sedek məlĩ na Yerusalem aslən ənah sit may Hoham məlĩ na Hebron, Piram məlĩ na Yarmut, Yafiya məlĩ na Lakis gəm Debir məlĩ na Eglon na:

⁴ «Məde məbbahsu əwak sən Gabawən, vi aslerik də Yosuwa gəm mə Israyelɗe.»

⁵ Asapaŋ kan ndəɗaŋ milyeŋge mə Amorɗe sle', məlĩ na Yerusalem, məlĩ na Hebron, məlĩ na Yarmut, məlĩ na Lakis gəm məlĩ na Eglon, apeŋgeŋ dit vandayɗe net azinən dibirgidik net heret sek aka Gabawən, alpaŋ dəndəni.

⁶ Ɗiy na Gabawən aslənaŋ a dibirgidik a Gilgal ənah sən Yosuwa na: «Kəppan əbbah nok sit belemɗe nok ɓa, məgəm zukum əpeŋ azam kawkõhgəmə may kabbah səmə, vi Milyeŋge mə Amorɗe naggərəm də gəla beymet akkalaŋgək akamə.»

⁷ Yosuwa ləŋ apeŋ hã sə Gilgal, dit ɗiy nawɓapaŋ əlpa beymeti gəm məzəlpaŋ en guromɗe beymeti.

⁸ Yawe aɓsən Yosuwa na: «Geslne aduk ɓa! Vi nipsukuk ammba voko; ɗəf tay nawziw abok səmmbet ɓa.»

⁹ Yosuwa agap aket mədigirzike: avoŋ kim aka əpeŋ hã sə Gilgal.

¹⁰ Yawe attepətik mə Amorɗe sə bet mə Israyelɗe arbə sitik a Gabawən sawɓa; azbet kəla təki nawpeŋ a Bet-Horon, abeynin hã a Azeka hã a Makkeda.

¹¹ Aka adanzoŋ abet mə Israyelɗe, assoŋ a təki nawsereh a Bet-Horon na, Yawe andol gərmeŋge gugriɗ aket hã gap a Azeka, amtaŋgə. En dəmtaŋ sit gərmeŋge na ɓeɓrezle əŋgə diyɗa daykiyit en mə Israyelɗe abayaŋ də masalam.

¹² Yaŋ kan Yosuwa apel sən Yawe aka pay məs Yawe apsit mə Amorɗe sit mə Israyelɗe ammba veti, anah kara Israyel bayman na: «Is paya, aziw aka Gabawən! Is təla tam aka miktik na Ayalon!»

¹³ Yaŋ pay aziwi, təla tam məza əɓla ɓa, hã gap mə Israyelɗe askanən wəlet messeŋgitti. As van məverni addəv ɗerewel na ɗəf an təstəs ɓa sa? Pay aziwik aka wəɗak na disiŋ, dətəp ɓa gap wəsɓəta ŋgbuɓɓo.

¹⁴ Wəsɓəta nawsla də askəs tay dəgəɗ ɗah lahəŋ ɓa, tay dəgəɗ sə dərɓaga an Yawe aɓe' sən ɗəfəŋ ɓa, vi Yawe sən Israyel agay səni.

¹⁵ Siske na, Yosuwa dit mə Israyelɗe beymet amndoŋ a dibirgidik a Gilgal.

Yosuwa alewik milyeŋge məskawəlet sle'i

¹⁶ Milyeŋge sle' nek anzoŋko, aɗamaŋ a bətəŋ a Makkeda.

¹⁷ Məssak səni Yosuwa na: «Mərihti milyeŋge sle' nek məɗemit a bətəŋ a Makkeda.»

¹⁸ Yosuwa amna: «Məkəɗŋgəl gərmeŋge gugriɗ ama bətəŋ vani, kəɗiyaŋgən ɗiy a man nawgeti.

¹⁹ Ya nokum kədawziweŋ ɓa, məzbet meseŋgiɗkum, mərsle məzəlpaŋ net sə dərɓegeti; kədappetin dətoŋgoŋgən a walaŋgəleɗe gugriɗ net ɓa, vi Yawe Maŋgəlva nokum apsukumik ammba vokum.»

²⁰ Səza Yosuwa dit mə Israyelɗe abayən ma əska wəlet an mbat sən va hã gap nawzet kəkãh na, en dəkõhoŋ ɓak ənzoŋ faraɗa səzeti, yas atoŋgoŋ a walaŋgəleɗe na korgu.

²¹ Siske na, mə Israyelɗe amulyoŋguk zeŋge aza Yosuwa a dibirgidik a maŋgava Makkeda. Dərɓaga asna, ɗəf tay dədawhã' man ŋgbusl əpel aket mə Israyelɗe ɓa.

²² Səɓɓani, Yosuwa amna: Məkol ma bətəŋ naka, məgilgit milyeŋge mə Amorɗe sle' neki, məki suwe.

²³ Aɗɗanənək vaska, agilgitinik milyeŋge sle' nek sə bətəŋ, akensənəni: məlĩ na Yerusalem, məlĩ na Hebron, məlĩ na Yarmut, məlĩ na Lakis gəm məlĩ na Eglon.

²⁴ Aka adawgilgitin milyeŋge sle' vet kawkesən Yosuwa, ndən dahdah iye mə Israyelɗe beymeti. Aɓsit deyeɗe net ɗiy nawgay nan məs dədawaŋ ammban na: «Mədder aŋka, məzlak təlkum ama wəlet milyeŋgeŋki.» Ndəɗaŋ dədereŋ azani, azlakən tilik ama wəlet milyeŋge veti.

²⁵ Yosuwa aɓsit na: «Geslne adəkum ɓa, kədaddakanən zukum ɓa! Məsok zukum, məmpa təlkum! Vaŋki Yawe adawgəɗ sit meseŋgiɗkum məs kədalpaŋ dəɗaŋ pakə.»

²⁶ Sə dərɓagan na, Yosuwa arge hã bay əbeyit zamə alaw kigəbay net aket wəleŋɗe temtem sle', asɓətaŋ adak hurruɓ lawlawə.

²⁷ Də pay priŋpriŋ na, Yosuwa anah sit ɗiyi, aprikginən gəbay net səket wəleŋɗe, azgetin a bətəŋ məs aɗamaŋ adak naka, agəslaŋ gərmeŋge gugriɗ ama bətəŋ vani, tahəŋ adak hã pay məsam avaməŋka.

Yosuwa tay əzban əgim walaŋgəleɗe gugriɗ na dohoŋ

²⁸ Pay dəpaska'a, Yosuwa azəm walaŋgəla-metiŋ na Makkeda, abey ɗiy nadak də məlĩ net pak də masalam; ɗəf titir tay ambər madaran ɓa dit zəgeɗ mederet nadak pakə. Aɗɗa sənək məlĩ na Makkeda va aɗɗa sən məlĩ na Yeriko.

²⁹ Yosuwa asilik sap dit mə Israyelɗe pak sə Makkeda, ambat a Libna, awaksən Libna van də wəlpa.

³⁰ Yawe apsitik walaŋgəla-metiŋ vanəska'e də məlĩ nan ammba vet mə Israyelɗe; yaŋ abeynin ɗiy nadak pəh də masalam; dəmbraŋ ɗəf madaran təttaka ɓa. Aɗɗaŋ sənənək məlĩ nadak va aɗɗaŋ sən məlĩ na Yeriko.

³¹ Yosuwa mbat sap dit mə Israyelɗe beymet sə Libna a Lakis; asərŋgəsla, awaksən də wəlpa.

³² Yawe apsitik Lakis van ammba vet mə Israyelɗe, amõhnən aka pay masula'ən; yas abeynin ɗiy nadak beymeti, va an agəɗ sən Libna.

³³ Yaŋ Horam, məlĩ na Gezer tam al əbbah sən Lakis, yaŋ Yosuwa abay sap dit ɗiy nan məza əppa ɗəf taka madaran ɓa.

³⁴ Siske Yosuwa ambat sap dit mə Israyelɗe beymet sə Lakis a Eglon, asərŋgəslnəni, awaksənən də wəlpa.

³⁵ Dəpaska'e amõhnəni, azanən də masalam. Abeynin ɗiy nadak dəpas pak va aɗɗaŋ sənən Lakis.

³⁶ Sə Eglon na, Yosuwa apeŋ sap dit mə Israyelɗe azan a Hebron, awakaŋ sənən də wəlpa.

³⁷ Amõhənən dit walaŋgəleɗe gugriɗ dətərwəslnəni, abaynən məlĩ nan də masalam dit ɗiy naddivit pakə. Dəmbraŋ ɗəf madaran adak təttaka ɓa, azetinik pak kakãh va aɗɗaŋ sənən Eglon.

³⁸ Siske na, Yosuwa amil a Debir sap dit mə Israyelɗe azani, alpə dəndəni.

³⁹ Amõh də məlĩ nani, gəm dit walaŋgəleɗe gugriɗ nan beymeti; azet ɗiy nadak pak də masalam. Dəmbər ɗəf madaran təttaka ɓa, va agəɗ sən Hebron vas aɗɗa sən Debir də məlĩ nani gəm va aɗɗa sən Libna də məlĩ nani.

⁴⁰ Yosuwa askak wəla dələv bayman: ki mossorgo, təki na kəla dohoŋ, dəlveŋge na miktiki, dit en na təki zəroho na mossorgo dit milyeŋge net pakə. Ɗəf tay ambər madaran ɓa, azetik zəgeɗ məzəmpəsaŋ beymet va Yawe Maŋgəlva na Israyel aɗi wən nani.

⁴¹ Yosuwa askak wəlet təŋ sə Kades-Barneya hã a Gaza, gəm dələv na Gosen bayman hã a Gabawən.

⁴² Milyeŋges dit dilveŋge net pak Yosuwa azimik də wəlpa təl təttaka, vi Yawe, Maŋgəlva na Israyel alpək a helɓe Israyel.

⁴³ Yaŋ kan, Yosuwa amndan a dibirgidik a Gilgal sap dit mə Israyelɗe beymeti.