Yosuwa 1 - Bible en Guidar

Əmõh na kana'an ( 1:1—12:24 ) Yosuwa agəmək wəza a gəla Moyis

¹ Dərɓaga əmta na Moyis gawla na Yawe, Yawe van aɓsən Yosuwa wətən Nun məbbaha na Moyis dawnəh na:

² «Gawla naw Moyis amtəka. Yaŋ na, is dit ɗiyiŋ beymet asil aggar ki Yurden əŋka, dəka dələv məs nədapsit sit kirtin Israyel.

³ Təki məs gədəv təlkum andap pak, nəpsukumək va nənah sən Moyisi;

⁴ Təŋ sə kapta-muyã gəm dələv na Liban hã gap aza məlpa metiŋ Efrat, dələv net Hittiɗe baymani, dəlgən a pehe naddak təkiya, dəmmba pay na moskoyo, vas dələv nokum adawsani.

⁵ Ɗəf tay nawziw abok ɓa hã ma way nok gərakə. Va nəsaw də Moyisi, wanəsaw də isi; nəzgok na ɓa, nəppok na frik ɓa.

⁶ Ampa təlko, asok zuko, vi istə kədapsit dələv sit ɗiy məs nəsway sit efiŋgiɗit na, wanəpsit ka neti.

⁷ Ya kan na, asok gboŋgboŋ də zuk soksok diyɗa, azlək sləma əɗɗa zəga va mahenziŋ məs gawla naw Moyis aɗi suk gərakə. Kədamzləh səkan dəka zlaɓay may dəka dəzəŋ ɓa, vi an kədaɗɗa a təki kəmbat pak dədawgən ammboko.

⁸ Ɗerewel na mahenziŋ van adarsla səmok ɓa; kəsɗekengən dəfəɗ də kapaya, vi kəzlgəgən sləma nazban əɗɗa zəga va an məverin addəvən, vasna, tive nok wakolu, askan na, zəga pak wadaw ammboko.

⁹ Nəɗi suk wən nan na: asok gboŋgboŋ də zuk soksoku ɓa sa? Kədakker ɓa gəm kədaddakan zuk ɓa, vi Yawe Maŋgəlva nok wasan də is a təki kədaddok pakə.»

Yosuwa gəm əggar ki Yurden

¹⁰ Yosuwa aɗi sitik wən an naɗɗa sit ɗiy gugriɗ na dələv də ənah na:

¹¹ Məbbal azet ɗiy a dibirgidiki, də ənah sit na: «Məzaɓan zəga nawzəm nokum aka tive na malaka ammba vokum, vi əvoŋ hoku abe aŋ na, wakəggaraŋ ki Yurden əska, kawtoŋ aka dələv məs Yawe, Maŋgəlva nokum adapsukum ka nokuməŋka.»

¹² Siske na, Yosuwa apel sitik ɗiy na mahəlfa na Ruben, na Gad gəm wəɗak na mahəlfa na Manase; aɓsit na:

¹³ «Məɗɗumon əpel məs Moyis gawla na Yawe aɗi sukum də ənah na: “Yawe, Maŋgəlva nokum tay əpsukum əffete; wapsukum dəlvəŋka naka.”

¹⁴ Gil nokum, kirtukum dit gazlaŋɗe nokum wassoŋ aka dələv məs Moyis apsukum dəggar ki Yurden. Ya mənokum zel də mbel zukum baymokum hara na, kəggaraŋgən ammba zukum abet milmiŋgiɗkum, va ama əlpa, kəbbahaŋ sitingəni.

¹⁵ Hã gap pay an Yawe adapsit əffet sit milmiŋgiɗkum va apsukuməŋka, ka net van tam dəgəməngən dələv məs Yawe Maŋgəlva nokum adapsiti. Siske na, kəmulyoŋgən aka dələv nokum, dələv məs Moyis, gawla na Yawe apsukum dəgar ki Yurden, kəlammba pay nampum naka, dəsangən ka nokumə.»

¹⁶ Yaŋ Azlan sənən Yosuwa də ənah na: «An kəɗi səm naɗɗa pak waməɗɗa, də təki kəslənəm pak Wamələ.

¹⁷ Va məprəm ma Moyis aka an anah səm pakəŋka, vas mədaprəm moko. Kəta Yawe Maŋgəlva nok dəsan də is va asan də Moyisi.

¹⁸ Ɗəf awandi pak məs dəggbak moko, dəprəm an kədawɗi səm gərak ɓa, kawbayni yi zamə. Ampa təlko, asok zuko kaka'ə.»