Yo'el 4 - Bible en Guidar

Wən an Maŋgəlva adawtaw aket ɗiy-ɗarə

¹ Vi aka pay nan na, wanəzaɓan wən na Yuda də Yerusalem,

² wanəkkelet dəlveŋge pak gəm waniprikgit a walaŋ na Yosafat adawyaŋ na: «Yawe mətawwəna.» Wanətaw wən aket adak aka batam Israyel, ɗiy naw nawray vawa məs atəraygitin aret ɗiyi, gəm awɗakanənək dələv nawa.

³ Awɗeketinik ɗiy naw də əɗɗa vẽpəlu aketi; avilinik kirin mezeŋgleket vi kawfaɗ sit məkuwaŋ a gizbe; kirin muguluŋgit tam vi kalbəh mbazla, asanəni.

⁴ Mənokum may Tir də Sidon də kiyva net mə Filistiɗe dəwənnani: Mi kəŋglaŋ də in di? Mokum aka əmpəlkiya akaw sa? Ya an əmndagan suwən kədaŋglaŋ na, asna, wanəmndagan akokum də kakara gu'u.

⁵ Mənokum məs kəgəmnən təbəz babar də meleŋge nawa, gəm zəgeɗ naw na sləma lelewɗe kəkenin addəv gəla net meŋgilveɗ nokum,

⁶ gəm kəvilin ɗiy na Yuda dit ɗiy na Yerusalem sit mə Yawanɗe, vi kawzergit səka dələv neti.

⁷ Ya wanəki sə təki an kəviliniŋka, wanəmndagan mbərayən nokum akokum.

⁸ Wanəvil kirtukum mezeŋgleket dit muguluŋgit sit ɗiy na Yuda, wavilnin tam sit mə Sabeɗ faraɗa a guwa. Vi Yawe yi dəpeli!

Əlpa an bayma faɗə gəm wətawwəna

⁹ Mətəlma na wənəŋ aweleŋgit ɗiy: məzaɓan zukum nawgaya, məhheɗet məs mekreti; məzəlpaŋ pak dəddoŋgu, dəpeŋgeŋgi.

¹⁰ Məvot bardawɗe ka masalam nokum, məvot tulhẽŋɗe dit məsseɗeɗe nokum. Ɗəf məddakən dənah na: «Məs makraw nani!»

¹¹ Mənokum dəlveŋge tərwəslə, məkkal mide; məkkal adaka! Yawe, aprikgit məs mekret noko!

¹² Dəlveŋge dəɓlanən ziti; dəmbataŋ a walaŋ adawyaŋ na: «Yawe mətawwəna.» Adak nədawsaw kawtaw wən net dəlveŋge na maŋgaveŋ pakə.

¹³ Məɓlan slogoy, əbəl agapka; mide, məndapani, mozgoy nawɗot zəga aknahka; mozgoyɗe tafyõhoŋgu. Ha'aw, daraw net adayka.

¹⁴ Vanday aka vanday addəv walaŋ na ətawwəna: pay na Yawe go'o yi addəv walaŋ na ətawwəna.

¹⁵ Pay də təla aɗɗaŋgək kiriti, əkekeɓe' net ŋgərzleɗ tay ɓa.

¹⁶ Yawe tay əbay gagay sə Siyon, tay ərban wəlan sə Yerusalem: yaŋ disiŋ də dəlvafuŋ aɓlaŋgə, ya Yawe, nan təki nawɗam net ɗiy nani yi, təki nawɗam net mə Israyelɗe yi.

¹⁷ Vasna wakəsən na intə Yawe Maŋgəlva nokum, məs dəsan a Siyon, mossorgo naw metiŋ salala. Yerusalem wakkpaŋ təki salala molhõyẽɗ atoŋgoŋ na adak ɗah əmpa ɓa.

Maŋgəlva tay əmsak əzeɓet ɗiy nani

¹⁸ Pay dəpas na, mossorgoɗe gugriɗ waymuwən mbazla genegene, moŋvo wadaw koɗkoɗ aket mossorgoɗe; lolohẽɗ na Yuda pak iŋkile wadawaŋgə. Heret iŋkile wagil səddəv Gəla na Yawe walɓanən walaŋ net duvurnohõɗe.

¹⁹ Eziptə wakkpaŋ dələv məpiweni, Edom kapta-muyã kəɗalkəɗalə vi aɗɗaŋ gagay aket mə Yudeɗi: aggbo'inik mbel net ɗiy məs met bartata aka dələv neti.

²⁰ Ya ɗiy wassoŋ a Yuda hã faɗə gəm Yerusalem va sayit ɗiy adawsan pakə.

²¹ In tat əɗi maw na, bartataŋgə, ndəɗaŋ məs nəɗi ka bartata lahəŋ ɓaŋka. Yawe wasan də gəla a Siyon.