Yeremiya 7 - Bible en Guidar

Makra ɗəf haɗak ga'ə

¹ Əpel an sən Yeremiya səza Yawe yaŋ dawnəh na:

² Aziw a ma gəla na Yawe, apel əpeliŋ adaka, kənahgən na: Məprəm əpel na Yawe mənokum ɗiy na Yuda baymokum, məzutoŋgoŋ də maddambeɗeŋ vi kappu' aba Yawe əŋka.

³ Aŋki an Yawe Məzuɓappak, Maŋgəlva net mə Israyel anahə: Məzaɓan tive nokum də zəga naɗɗa nokum; asna wanəppokum kəssoŋgən a təkiyəŋka.

⁴ Nokum kədawmbəɗanən zukum də əpel na uwawən də wənəh na: Aŋ gəla na Yawe yi, aŋ gəla na Yawe yi, aŋ gəla na Yawe yi ɓa.

⁵ Vi an əɗɗa moggoni na məɗɗa ka ədaw nokum də wəza nokum dəsangən moggoni, an əɗɗa təstəsi na, mətawwən təstəs a waleŋgit ɗiyi,

⁶ kədawzəmgənən sahã na molhoyõ ɓa, na mitiwe ɓa, nat gagəbay ɓa, kədawbayaŋ ɗəf də mezlibezlibe na man a təkiyəŋ ɓa. Kədazbetin meŋgilveɗ meɓɓet kawki əray akokum ɓa.

⁷ Asna wanəppokum kəssoŋgən a təkiyəŋka, dələv məs nəpsit efiŋgiɗkum na sete hã faɗəŋka.

⁸ Ya mənokum tat əmbəɗan zukum də əpel na uwawən məs atər na ɓa.

⁹ Mənokum tat əhala, əbay gəbaya, əɗɗa polkoyo, əsway ɗarə, əzaɓ-Maŋgəlva sən Ba'al, əzbet meŋgilveɗ məs kisinnin ɓa, məs tay dəsopokum dənɗaŋ ɓa.

¹⁰ Yaŋ kədazzoŋ əziw abawa, addəv gəla nawa, yaŋ kədawnahaŋ na: Məkõhko! Vi kazban əɗɗa zəga ɗarə!

¹¹ Gəla naw məs adayanən iya naw adakəŋ akkpaŋgək təki nawɗam net məvoŋgoŋ tive ama horokum sa? Naw pak nulaka, Yawe aɗiymani.

¹² Əŋga məddoŋ a təki naw a Silo ɗa, təki məs nəɗi iya naw adak daabəŋ, mula an nəgəɗ dəndən aka wən na daraw net ɗiy naw mə Israyelɗe.

¹³ Ya kakaŋ na, Yawe aɗiymani, adan kəɗɗetin wəzeɗes pakə, də nəpel sukum pay pakə zlaŋ na, kəprəmnən ɓa; də nəyukum zlaŋ na, kəzlanən ɓa.

¹⁴ Wanəgəɗ sən gəla məs iya naw adawya akani, məs kəɗiyən əɗɗum nokum akanəŋka, təki məs nəpsukum gəm sit efiŋgiɗkumuŋ va nəgəɗ sən Silo.

¹⁵ Wanəzgokum səbaw va nəzget milmiŋgiɗkum, ɗiy na Efrayim pakə.

Əkkam məs Maŋgəlva aprəm na ɓa

¹⁶ Isi Yeremiya, kədakkamaw vi ɗiyis ɓa, kədayan zuk uppu' may əkkam ɓa, kəyan zuk əkkamaw tataŋ tataŋ ɓa, vi nəprəmuk na ɓa.

¹⁷ Nok kawla an adaɗɗaŋ addivit walaŋgəleɗe na Yuda gəm aket tive na Yerusalem ɓa sa?

¹⁸ Kirin tahəŋ əkraw seseme, efiŋgiɗit tahəŋ əsɗa offo, gil tamə tahəŋ əllaɓ gəpa kawda gato sət tuyaŋgək adawyaŋ na məlyaŋgək na disiŋ; an tahəŋ əpesl meŋgilveɗ na tay ədan su gədəvwa.

¹⁹ Yawe aɗiyman na, anaw adawdan suwən gədəvu sa? Ana ki zit tusso adarbaŋ sənən wil dərəŋ ɓa sa?

²⁰ Vini kana, vaŋ Yawe Maŋgəlva anahə: Ədagədəv naw dit herɗe naw yeŋ əgbo'oŋ aka təkiyəŋka, aket ɗiyi, zəgeɗ memeyẽɗi, wəleŋɗe nawra gəm uwa na zəga na mabardaw. Wazlə, amtə na ɓa.

Ɗiy məs aprəmən ma Maŋgəlva net ɓa

²¹ Aŋki an Yawe Məzuɓappak, Maŋgəlva na Israyel anahə: Məsapan əvəl nawzla kurmbuɗuk nokum aza əzaɓ-Maŋgəlva nokumu, məmpər slu nani.

²² Gegesiŋ gala nəgilgit efiŋgiɗkum sə Eziptə, tay nəpel sit aka wən na əvəl nawzla kurmbuɗuk gəm aka əzaɓ-Maŋgəlva ɓa.

²³ An nəpel sit dərəŋ na, dəprəməngən mawa, asna wanəsaw Maŋgəlva nokum ya wakəssoŋ ɗiy nawa. Nəɗi sukumuk wən nan kəzbanəngən tive nawa, ka zazay dəsan sukumgəni.

²⁴ Ya dəprəmən ɓa, dəpakən sləmet ɓa. Azbanənək əɗɗum na makra ɓəɓəl net mbərayən, aktuhunək dəɓet suwa məza heret aziyaŋ akaw ɓa.

²⁵ Təŋ səza efiŋgiɗit agilyoŋ sə Eziptə hã gap dəpaŋka, nəbew dawslin məskəleŋɗe gewleɗ naw ɓa.

²⁶ Ya dəprəmwən ɓa, dəpakən sləmet ɓa, aɓɓəlanənək kiyti. Aɗɗaŋgək mbərayən day ki an net efiŋgiɗti.

²⁷ An kəpel sitik əpelɗes pakə; waprəmkun ɓa; an kiyeke, wazlanaŋ sukun ɓa.

²⁸ Kəneh sitgin na: Ɗiy məs aprəmən ma Yawe Maŋgəlva net ɓa gəm məzuɓoŋ sən əzga' nani. Təstəs tay azet ɓa, agilik sə meti.

Walaŋ na Əŋgroɓo

²⁹ Afiw muhur kiyuk na iynama, azgani. Aya gəlya nawɓuh mok aka mossorgo məɓayən pəɗal pəɗalə. Vi Yawe azelik gəm azganək sayit ɗiy məs dəsilginin ədagədəv nani.

³⁰ Yawe aɗiyman na, ɗiy na Yuda aɗɗaŋgək mbərayən ama harawa, aɗiyənən tuya net zəga daryaw addəv gəla məs adayanən iya naw adaka yaŋ arga'anəni.

³¹ A walaŋ na Ben-Hinnom, arkaŋgək gəleɗe-nettuyeŋge Tofet, ka kawzla kirtit mezeŋgleket dit muguluŋgit adak akoffo. An məs nəɗi wən nan ɓa, əɗɗum nan dəde a makraw ɓa.

³² Yawe aɗiyman na, pay wade kawyani na Tofet ɓa may walaŋ na Ben-Hinnom ɓa, kawyani na walaŋ na əŋgroɓo. A Tofet adawndikin ɗiy mimtiti, vi təki tay ɓa.

³³ Gəbay net ɗiyis wasan zəga nawzəm net biŋgeɗ na disiŋ gəm net zəgeɗ darewti, ɗəf tay nawfẽyet ɓa.

³⁴ Wanəɓətgən gəlya nanneke gəm nawbabyakan zə ɗəf sə waleŋgit gəleɗe gugriɗ na Yuda gəm səket tiveɗ na Yerusalem gəm gəlya net kirin dəgəmən ziti, vi dələv wasan kiməskiya.