Yeremiya 47 - Bible en Guidar

Əpel aket mə Filistiɗe

¹ Əpel na Yawe an dəde sən Yeremiya məskəleŋ aka wən net mə Filistiɗe, tak Farawən əgul Gaza ɓa.

² Vaŋki Yawe anahə: Iŋkile əsəkəkaŋ sə kəla disiŋ, wakkpaŋgaŋ lolohõ məs man awrawra. Wasulupnən dəlva gəm an dəknəha, walaŋgəla-metiŋ dit ɗiy naddəvən. Ɗiy waŋzlaŋ vaŋvəla, ɗəf naka dələv van pak waɓuh mani,

³ sən ɓaɓəlma eperkeperke net məzəŋkoroŋ nani, sən ɓaɓəlmet mawteɗ nalpa nani. Efiŋgiɗit kirin awmulyoŋ azet kirin ɓa sən əddak neti,

⁴ Aka wən na pay an dədazzan nawzet mə filistiɗe pak ɗəf tay nabbah sən Tir gəm sən Sidon ɓa. Vi Yawe tay azet mə Filistiɗe, madambirgit naka mətəwura na Kaftor.

⁵ Slambər aɗiyək aka Gaza, Askelon mambərgən walaŋ net aɓətək gəkə. Hã gap Dəwɗe kədappan əbakan zuk di?

⁶ Haya əraya! Masalam na Yawe, hã gap dewɗe kədaffet di? Agul addəv gəloko, asok ɓatəɓatə, kədaɓla əmpa ɓa.

⁷ Mbambar adaffet di? Yawe yi dəɗi sən wən nan nadda aka Askelon gəm aka mabuzgum na pehe. Adaki aŋgəɗ sən va.