Yeremiya 34 - Bible en Guidar

Kəleŋ aka an nawrəh Sedekiya

¹ Əpel na Yawe yaŋ dəde sən Yeremiya aka pay na Nabukodonozor məlĩ na Babilon dit məzəlpaŋ nani gəm milyeŋge naka dələv məs asan daya aketi dit ɗiy pak tahəŋ əlpaŋ də Yerusalem gəm dit walaŋgəleɗe gugriɗ na Yuda meɓɓet dawnah na:

² An Yawe Maŋgəlva na Israyel anah yaŋka: Doko, anah sən Sedekiya məlĩ na Yuda, kənah səngən na: An Yawe anah yaŋka, wanəpsən walaŋgəla-metiŋginiŋ ammba va məlĩ na Babilon, waɗi sən offo.

³ Ya noko, kəkõh na səvan ɓa vi ərma adarmukuni, kapsukki ammba vani, horok wawla məlĩ na Babilon, wakəpeleŋ man də moko, ya a Babilon kədoddoko.

⁴ Aprəm əpel na Yawe kaka' Sedekiya məlĩ na Yuda, vaŋki Yawe anah aka wən noko, kəmtə na ama masalam ɓa.

⁵ Na zazay kədamta, va məgəɗ sit efiŋgiɗuk milyeŋge en dəssoŋ daabəŋ kiyko vaska'e adawzlaŋ sukun tursan, wahəmaŋ ammbok dawnəh na: Aw daya! Vi an nənah yaska, Yawe aɗiymani.

⁶ Məskəleŋ Yeremiya amanək əpeləs pak sən Sedekiya məlĩ na Yuda a Yerusalem,

⁷ gala məzəlpaŋ na məlĩ na Babilon awaksənən Yerusalem də əlpa gəm dit walaŋgəleɗe gugriɗ na Yuda en dəppaŋ əgay dənɗaŋ pakə: Lakis gəm Azeka, vi ndəɗaŋgə dəppaŋ səret walaŋgəleɗe gugriɗ na Yuda en na korgu.

Belemɗe en məppet məs daya net adawtafa

⁸ Əpel na Yawe ade sənək Yeremiya sədərɓaga məlĩ Sedekiya aziwgin wənmiyna dit ɗiy en na Yerusalem pak vi kawtəl sit ma nappeti.

⁹ Ɗəf pak dəppan balam nan gəm balamək nan mə Ibriɗe dəssoŋgən na kiyti, vi ɗəf adawzəmgən sãhã na mə Yuda məlmən ɓa.

¹⁰ Ɗiy gugriɗe dit ɗiy en dəzzoŋ akki əziwgin wənmiyna ka ɗəf pak dəppangən balam nan dət balamək nan dəssoŋgən na kiyti, ka adawzəmgitin sãhã net ɗiy əmpa ɓa, aprəmənka appetinik əmmbataŋgə.

¹¹ Sədərɓagani, addəɗanənək əɗɗum neti, amilgitinik belemɗe mezeŋgleket dit muguluŋgit məs appaŋ dəssoŋgən na kiyit naka, aɗɗiyinik va belemɗe mezeŋgleket dit muguluŋgiti.

¹² Əpel na Yawe səma Yawe ade sənək Yeremiya dawnəh na:

¹³ An Yawe Maŋgəlva na Israyel anah yaŋka: Naw nəziwginik wənmiyna dit efiŋgiɗkum gala nəgilgit səka dələv na Eziptə səka balam dawnəh na:

¹⁴ dərɓaga əzva buhulu, ɗəf pak dəppaŋgən məlmən mə Ibrid məs dəvəl kiyzən suko gəm dəgəɗ suk wəza əzva sləre, kəppangən dəssangən na kiyən sənok da. Ya efiŋgiɗkum dəprəmwən ɓa, dəpakən sləmet ɓa.

¹⁵ Nokum na, kəmilyoŋguk dəpaŋka, kəɗɗaŋgək zəga təs ama haraw də ətəlma na, ɗəf pak dəppan məlmən dəssangən na kiyən, kiziwgininik wənmiyna abaw addəv gəla məs iya naw adawya adaka.

¹⁶ Yaŋ kəkkpaŋgaŋ kəraygənən iya nawa, ɗəf pak amilgin balam awaniɓa balamək nan məs kəppaŋ dəssoŋgən na kiyit naka, kəkkpeŋgetin dəssoŋgən balam awaniɓa balamək nokum.

¹⁷ Vini Yawe anah vaŋka: Nokum kəprəmwən ka nawtəlma na, ɗəf pak dəppangən balam nan məs dəsan məlmən may meggen ɓa. Yawe aɗiyman na: inyakəŋ ətəlma nappokum ama masalam, ama gəbaymərma, ama mayã. Wanəkkpoŋgokum ka zəga narban gəslne', zəga narban geslne' sit milyeŋge naka dələv pakə.

¹⁸ Wanəkkpeŋget ɗiy məs dəmzlahaŋ səka wənmiyna nawa, məs dəknahanən əpel na wənmiyna məs aziwginin abaw də əprasl wət wasli pərasl sula atoŋgoŋ də walaŋnəŋ ɓa.

¹⁹ Ɗiy gugriɗ na Yuda, ɗiy gugriɗ na Yerusalem, məɗɗaŋ wəza aba məlyã, məsdəlvenge dit ɗiy naka dələv məs dətoŋgoŋ də walaŋ wət wasli məpraslən sula na wənmiyna nak pak na,

²⁰ wanəppet ammba vet məzuzelɗe neti gəm ammba vet məkayanən zəŋgilet kawzani, kiygəbeyit wakkpaŋ zəga nawzəm net biŋgeɗi gəm net zəgeɗ nawra.

²¹ Vaska'e nədappan Sedekiya məlĩ na Yuda dit ɗiy gugriɗ nan ammba vet məzuzelɗe neti, ammba vet məkayanən zəŋgilet kawzani, ammba vet məzəlpaŋ na məlĩ na Babilon məs dəppanən əgay də mənokuməŋka,

²² wanəɗi sit wən nani, wanəki aka walaŋgəla-metiŋginiŋka, wagayan dəndəni, wamõhuni gəm waɗisənən offo, wanəkkpaŋget walaŋgəleɗe gugriɗ na Yuda va kapta məs ɗəf awsan adak ɓa Yawe aɗiymani.