Yeremiya 33 - Bible en Guidar

An napsən Yerusalem əmpa

¹ Əpel na Yawe ade sənək Yeremiya masula'ən aka mərman a fərsəna dawnəh na:

² Vaŋ Yawe məgəɗ zəga anahə, Yawe məzaɓ zəga vi dəziwgin a gəlani. Yawe yi iya nani.

³ Ayuwa, wanəzlan suko, wanərbet suk zəgeɗ gugriɗe, zəgeɗ en məɗemit məs kisin ɓa.

⁴ Vi vaŋki Yawe Maŋgəlva na Israyel anah aka wən net gəleɗe na walaŋgəla-metiŋ əŋka, aket gəleɗe net milyeŋge na Yuda miɓzliwti, aka wən net korguɗe na dəlva gəm aka wən na masalam.

⁵ Də əmbat əgay dit mə Kaldiyeɗ na, vi kaknəh təki də kigəbeyit ɗiy məs nəbay də ədagədəv naw gəm dit herɗe nawi, nəɗaman haraw səka walaŋgəlaŋka, sən mbərayən net gbaŋkəŋki.

⁶ Wanənzaɗa, əmbilgit nədawmbəlgiti, wanəkolsit tive na zəzay metiŋgin nassa fedeŋgi.

⁷ Wanəzaɓan wən na Yuda gəm wən na Israyel, wanərke va asan lahəŋka.

⁸ Wanəbbur heslepe net məs aɗɗaŋ mambray akaw pakə. Wanəvvuyon mambray məs aɗɗaŋ azaw pak, məs aɓoŋgoŋ akawəŋka.

⁹ Wakkpaŋ azaw iya na ənnek də əɗi kiya, ka zəga na gawla azet ɗiy naka dəlvafuŋ məs dədapprəmnən moggon an nəgəɗ sitiŋ pakə. Wakkereŋgi, wassoŋ gərəŋ aka wən na moggoni gəm aka wən na zazay məs nəgəɗ sit gbaŋkəŋka.

¹⁰ Vaŋki Yawe anahə: «A təkiyəŋ məs kədawnəhaŋ na: Aŋkəlka, ɗiy tahəŋ ɓa, zəgeɗ memeyẽɗ tahəŋ addivit walaŋgəleɗe gugriɗ na Yuda ɓa may tiveɗ na Yerusalem seŋseŋgəŋ məza ɗiy ɓa, ɗiy tahəŋ də gəla ɓa zəgeɗ memeyẽɗ tahəŋ ɓa əŋka, kaprəmi əmpa:

¹¹ gogoyo na əpepɗeke, gogoyo na ənneke, gəlya na məɓel gulku də əɗɗəla nat məɓelta, wəlet ɗiy məzunəhaŋ na: məɗi ki Yawe Məzuɓappakə, vi Yawe moggoni yi, vi moggon nan hã faɗi yi. Kaprəmi wəlet məkiyaŋ zəga nawfet addəv gəla na Yawe. Vi wanəzaɓan wən na dəlvəŋ va asan lahəŋka» Yawe anahə.

¹² An Yawe Məzuɓappak anah yaŋka: Əmpa na, a təkiyəŋ dəray hoŋhoŋ məza ɗiy ɓa hã dit zəgeɗ memeyẽɗiŋka, a walaŋgəleɗe gugriɗ nan pak təki nawtaɗ wasan sit məzuteɗeŋɗe nawvoŋgit gilew net dəfɗa.

¹³ A walaŋgəleɗe gugriɗ naggərma, walaŋgəleɗe na Bagərma, walaŋgəleɗe na dohoŋ, aka dələv na Benyamin gəm dəlveŋge dəssoŋ ki Yerusalem tərwəslə dit walaŋgəleɗe gugriɗ na Yuda, gəlew wadawaŋ kaɗkaɗ əmpa dəba məzəŋɗeti, Yawe anahə.

Maŋgəlva amsak ətaf məs aynan napsən ɗəf ɓa

¹⁴ Pay tay əzzani, Yawe anahə, wanəknahaŋ əpel moggon məs nəpel sit mə Israyelɗe gəm mə Yudeɗi.

¹⁵ Aka pay nani, dəpas na, wanəgilgin zeŋve na təstəs səza Davit, waɗɗa zəga də tiven təstəs aka dəlva.

¹⁶ Aka pay nanəska, kawkõhgəni Yuda, Yerusalem wasan fedeŋge. Va adawyanən yaŋka: «Yawe yi təstəs namə.»

¹⁷ Vi Yawe vaŋ anahə: Ɗəf zev Davit arslə na dawsan aka mazaŋga na məlĩ na Israyel ɓa.

¹⁸ Ɗiy məsdəlveŋge mə leviɗe arslaŋ na səbaw nawzla əvəl nawzla kurmbuɗuku, gəm nawzla tursan, gəm nawtaw wəlet zəgeɗ pay pak ɓa.

¹⁹ Əpel na Yawe ade sənək Yeremiya dawnəh na:

²⁰ Vaŋki Yawe anahə: An wakəɓapənən əŋzləw wənmiyna naw an nəɗi sən kapaya, gəm wənmiyna naw an nəɗi sən dəfəɗa, ka kapay də dəfəɗ adaɗɗaŋ aka pay net ɓa,

²¹ vaska'e wənmiyna naw də Davit gawla naw adaŋzla məza wətən əzəm məlĩ aka mazaŋga nan ɓa, vaska'e dit mə Leviɗe məsdəlveŋge məs dəssoŋ aka wəza nawa.

²² Va ŋgirzleɗ na disiŋ aŋɗaŋ ɓa, hoyoŋko na məlpa awsla ɓaŋka, vaski nədawan zev Davit gawla nawa gəm mə leviɗe məs dəssoŋ aka wəza nawa.

²³ Əpel na Yawe ade sənək Yeremiya də ənəh:

²⁴ Kula an ɗiyəŋ adawpeleŋ dawnəh na: Zevit ɗiy sula Yawe aweli, yaŋ andole. Vaski əmpa adawtekin ɗiy naw dassoŋ va ɗiy abeti.

²⁵ Vaŋki Yawe anahə: Va wənmiyna naw tay aka kapay ɓa, aka dəfəɗ ɓa, va nəɗi mahenziŋɗe aka disiŋ də dəlvafuŋ ɓa,

²⁶ asna wanəndol zev Yakub də Davit gawla nawa, məza əgəm ɗiy nassoŋ aka mahəlfa na Abraham, na Isak gəm yakob səddəv mahəlfa nan ɓa sa? Vi wanəzaɓan wən neti, wanəwəl sahã aketi.