Yeremiya 26 - Bible en Guidar

Iynama nawkohgən Israyel gəm əzəmsãhã na Yeremiya ( 26:1—45:5 ) Tay əkay əbaynən Yeremiya

¹ Aka ətəŋ əzəm məlĩ na Yoyakim wətən Yosiyas məlĩ na Yuda, əpeləŋ ade səza Yawe də wənah na:

² An Yawe anah yaŋka: Dok aziw a daŋgla na gəla na Yawe, kəpelgən əpeləŋ məs nəɗi suk wən nan nawnah sit ɗiy en dədazzoŋ uppu' addəv gəla na Yawe sə walaŋgəleɗe gugriɗ na Yuda pakə, kədawzlẽ səza əpel van ɓa.

³ Kuzuŋ waprəməni ka ɗəf pak dəmilgin səka tive nan mbəraynəŋka. Asna wanəppan an niynan nawki tatwãh aket vi wəza mambray neti.

⁴ Kənah sitgin na: An Yawe anah yaŋka: An kəprəmwən də ədaw va mahenziŋ naw məs nəɗi abokum ɓa,

⁵ ka kaprəm əpel net məɗɗaŋ wəza naw məskəleŋɗe məs nəslən sukum məza əppan gabban ɓa, məs nədawslən sukum kaprimnin ɓaŋka,

⁶ asna wanəkkpaŋgan gəlaŋ va təki nakkaman Maŋgəlva na Silo, wanəkkpaŋgan walaŋgəla-metiŋginəŋ va zəga naɗɗa mefɗeke amet ɗiy naka dələv pakə.

⁷ Məsdəlveŋge, məskəleŋɗe dit ɗiy pak aprəmənək va Yeremiya apel əpeləs addəv gəla na Yawe.

⁸ Səza Yeremiya agrak əpel an Yawe aɗi sən wən nan nawpel sit ɗiy pakə, ndəni məsdəlveŋge, məskəleŋɗe dit ɗiy pak armanəni dawnəh na əmta kədamta!

⁹ Vimi kəgəɗ kəleŋ də iya na Yawe dawnəh na, gəlaŋ wasan va təki nakkaman Maŋgəlva na Silo gəm walaŋgəla-metiŋgin warayə ɗəf tay nassan addəvən ɓaŋ di? Ndəni ɗiy pak akkalaŋ aka Yeremiya addəv gəla na Yawe.

¹⁰ Səza ɗiy gugriɗ na Yuda aprəmən əpeləska, apeŋgeŋgik səna məlĩ da addəv gəla na Yawe, assoŋ aka wən nan ama maddamba meleketen na Yawe.

¹¹ Yaŋ məsdəlveŋge dit məskəleŋɗe anah sitin ɗiy gugriɗ dit ɗiy pak dawnəh na: Ɗəfəŋ aslək nawbaya vi agəɗək kəleŋ aka walaŋgəla-metiŋginiŋ va kəprəmənək də sləmokum.

¹² Yaŋ Yeremiya anah sit ɗiy gugriɗ dit ɗiy pak dawnəh na: Əpel kəprəmaŋgəŋ pak na, Yawe dəslənu kaɗɗa kəleŋ aka gəlaŋka gəm aka walaŋgəla-metiŋginiŋka.

¹³ Ya kakaŋ na, məzaɓan tive nokum gəm wəza nokum, məprəm ma Yawe Maŋgəlva nokum, asna Yawe wappan əki tatwãh an apel nawki akokum.

¹⁴ Ya naw na, in yakəŋ ammba vokum, məgəɗ su an dəsan sukum lewi gəm an dəslə ama horokum.

¹⁵ Məsən hara na, an kəbaywənka, məsən na, mbel na ɗəf də mezlibezlibe na man kədaggbo'oŋ akokum, aka walaŋgəla-metiŋginiŋka gəm aket ɗiy nani, vi gesiŋ Yawe dəslənu azokum, ka kawpel əpeləŋ pak asləmokum.

¹⁶ Yaŋ ɗiy gugriɗ dit ɗiy pak anah sitin məsdəlveŋge gəm məskəleŋɗe na, ɗəfəŋ dəslə nawbay ɓa vi də iya na Yawe Maŋgəlva nam apel səmə.

¹⁷ Yaŋ ɗiy səret ɗiy məsɓet na dələv asilyoŋgu, anahaŋ sən ŋgboŋ net ɗiy pak də ənəh na:

¹⁸ Aka pay na Hizkiya məlĩ na Yuda, Mika, ɗəf na Moreset məgəɗ kəleŋ apel sitik ɗiy na Yuda baymet də wənah na: An Yawe Məzuɓappak anah yaŋka: Siyon wakkpaŋ guli minseni, Yerusalem kiməskiya, gəla nakkam məɓayən wakkpaŋ wəleŋɗe kpəŋgə.

¹⁹ Hizkiya məlĩ na Yuda dit ɗiy na Yuda pak abayənək sa? Nam na Yawe ageslne sən ɓa sa? Yas affeten makra Yawe, ndəni Yawe appan tatwãh an apel nawki aketi, ya nam na mənam tat əki tatwãh metiŋgin aka zəmə.

Yowakim tay əbay məskəleŋ Uriya

²⁰ Ya ɗəf mbərən tay əmpa dəgəɗ kəleŋ də iya na Yawe, ana Uriya wətən Semaya na Kiryat-Ye'arim, agəɗək kəleŋ aka walaŋgəla-metiŋginiŋka gəm aka wən na dəlvəŋka va Yeremiya apel pakə.

²¹ Məlĩ Yoyakim, ɗiy guromɗe nani gəm ɗiy gugriɗ nan pak aprəmənək əpel nan vani, yaŋ məlĩ akay tive nawbayən, səza Uriya asəna, ageslneke yaŋ anzani ambat a Eziptə.

²² Məlĩ Yoyakim aslən ɗiy a Eziptə, Elnatan wətən Akbor gəm ɗiy ammbani.

²³ Yas agilginin Uriya sə Eziptə, akasənən məlĩ Yoyakim, abay də masalam, azgan kigəbayən addəv magamas net kirtin dəlva.

²⁴ Ahikam wətən Safan kaka' dətər Yeremiya ka adappanən ammba vet ɗiy dəbaynəngən ɓa.