Wəza net Masləŋɗe 9 - Bible en Guidar

Əkkpaŋ na Sawlu

¹ Ya Sawlu tay əzban əzəmgit sahã gəm əbey gewleɗ na Daya, yaŋ ambat aza daya net məsdəlveŋge.

² Assoh ɗerewelɗe nawtoŋ addivit gəlaɗe nakkal net mə Yudeɗ an na Damas. Vi an arahək zel awaniɓa gil naka tive na Daya na, kawkiyit məɓrukit a Yerusalem.

³ Aka adaddan, agap go'o də Damas, əkeɗeɗe adek sə disiŋ ləŋ əwiɗ kiyən tərwəslə.

⁴ Azbərək afuŋ, aprəmək əpel dawnah sən na: Sawlu, Sawlu, vimi kədawsər maw di?

⁵ Yaŋ amna: Nawa kənan di Daya? Ya nan amna: Naw intə Yesu məs nok kədawsər mani.

⁶ Ya asili, atoŋ a walaŋgəla-metiŋ. Kawnah suk an kədaɗɗa.

⁷ Ɗiy en dədaɗɗaŋ malaka dəndən aziweŋke assoŋguk ɓata'ə, tay əprəmaŋ əpele, awlaŋ ɗəf ɓa.

⁸ Sawlu asilik sə fuŋgu, akoluk harani, ya awɓap ula təki ɓa. Ndəni kan armanən van atoŋgunən a Damas.

⁹ Asanək əvoŋ hoku məza ula ɓa, məza əzəm ɓa, məza əsa ɓa.

¹⁰ Məzutaf tay a Damas vani, iya nan na Ananiyas. Yaŋ Daya aya addəv ula, Ananiyas, nan azlan na: In yakəŋkə Daya.

¹¹ Daya aɓsən na: Asili, dok dəka tive adawyaŋ na Sarara, akayan ɗəf adawyaŋ na Sawlu na Tarsis eŋgil ana Yudas da, yas tay əkkama.

¹² Awələk ɗəf məs adawyaŋ na Ananiyas dawtoŋ azan addəv ula nani, aɗiyək van akani, vi dəmsakgən ula əmpa.

¹³ Ananiyas azlanəka: Daya, nəprəmək əpel diyɗa səmet ɗiy aka wən na ɗəfəska, mbərayən agəɗ sit ɗiy salala nok gbaŋ a Yerusalem əŋka.

¹⁴ Ya aŋ van kpak arahək tive səvet deyeɗe net məsdəlveŋge vi kaɓruk məzuyanən iya nok pakə.

¹⁵ Daya aɓsən na: Doko, vi zəga an nəwel dərbangən iya naw azet ɗiy-ɗarə, azet milyeŋge gəm azet mə Israyelɗe yi.

¹⁶ Vi naw wanərbet sin zəgeɗ məs adawzəm sahã aket vi iya naw pakə.

¹⁷ Yaŋ Ananiyas ambatə, atoŋguk eŋgil naka, aɗiyək van akani. Amna: Sawlu məlmuwa, Daya dəslənwa, Yesu məs dərban zən azok aka tive dazzoko, ka kəmsakgən ula, kəssokgən məknahuk də Zeŋgile Salala.

¹⁸ Yas zəga agil səra Sawlu ləŋ va kosloproko na kilfi, haran akolko. Asilke, arahək baptem.

¹⁹ Səza azəm waya, amsakək ərəh gbogboŋgo. Sawlu asanək əvoŋ siɗikke dit ɗiy na Maŋgəlva a Damas.

Sawlu tay ərba wən na Maŋgəlva a Damas

²⁰ Ndən ləŋ mbat addəvit gəlaɗe nakkal net Yudeɗi, ətəlma na: Yesu əŋka Wətən Maŋgəlva yi.

²¹ Ɗiy məs dəprəmən pak aggətaŋgək akani, aɓɗaŋ na: Ɗəfəŋki məs dədawzet ɗiy məzuyanən iyaŋ a Yerusalem nak ɓa sa? Ade aŋ na vi karmeti, kawket məɓrukit sit deyeɗe net məsdəlveŋge yi ɓa sa?

²² Ya Sawlu asokuk zən əmbat abe abe, agəɗ sitik gərəŋ sit mə Yudeɗ məs dəssoŋ də gəla a Damas də ərban sit na, Yesu ndəni Kristu.

²³ Əvoŋ diyɗa dərɓagani, mə Yudeɗ aslerinik met vi kawzani.

²⁴ Ya Sawlu asənək wən mətuvuro neti, tay əgenin memeŋgleɗe na walaŋgəla-metiŋ dəfəɗ də kapay pak vi kawzani.

²⁵ Yaŋ gewleɗ nan aslanən də dəfɗa, aktuknən addəv keŋkele, aprikginin dəka zlava.

Sawlu a Yerusalem

²⁶ Səza agap a Yerusalem, akayək tive nasap dit məzəzbaŋgə. Ya pakgit ageslne'eŋ sənənka, dətafən na akkpaŋgək məzəzba ɓa.

²⁷ Yaŋ Barnabas agəma, aka azet maslənɗe aboton sit va awla Daya aka tive gəm va apel səni gəm va Sawlu apel a Damas də iya na Yesu məza geslne ɓa.

²⁸ Yaŋ asan dənɗaŋ əbbal a Yerusalem, tay əpel də iya na Daya məza geslne ɓa.

²⁹ Tay əpele gəm əbay ma dit mə Yudeɗ məpeleŋ ma Gərek, ya net akayaŋgək tive nawzani.

³⁰ Adan məzutafaŋ asənən wən nani, aprikgənən Sawlu a Kaysariya, aslənən a Tarsis.

³¹ Ndəni kan məzutafaŋ naka dələv na Yude na Galile dit na Samari pak assoŋ addəv zazaya. Asɓanən ziti, adawdawaŋ addəv geslne na Daya, adawanən zit də əbbah na Zeŋgile Salala.

Əmbla na Ayne'as

³² Piyer tay əbbal aka dələv awandi pakə, pay maɓɓani ambatək tam anet ɗiy na Maŋgəlva na Lidda da.

³³ Yaŋ arəh ɗəf adaka, iya nan na Ayne'as, zən məmtəni, tay ɗuffo aka ɓərzləma nan zəga na əzva dodopoɗo.

³⁴ Yaŋ Piyer aɓsən na: Ayne'as, Yesu Kristu tay əmbəlguko. Asili, aktəm zəga nawvoŋ noko. Yaŋ asil ləŋgə.

³⁵ Ɗiy na Lidda də Saron pak awlanənka, yas akkpaŋgaŋ aza Daya.

Məmbəlgəti Tabita

³⁶ A Yoppe, məzutafək tatə, iya nat na Tabita, va ənəh na, Mune; tat əɗɗa wəzeɗe mogget diyɗa gəm məwəl sahã tə.

³⁷ Təzgək gbəgba' aka əvoŋ nani, ndət zamə, adan aslaytəni, ndəɗaŋ ɗufgutən addəv gəla an na disiŋ.

³⁸ Adan Lidda go'oy də Yoppe, məzutafaŋ aprəmənək na Piyer tay adaka, aslənaŋ zel sula əkkaman na: Agəm zuko, ade anamda ɗa.

³⁹ Piyer hõs ləŋ pay dənɗaŋgə, adan agapə, akanənək addəv gəla an na disiŋ naka. Gil net gəbayɗe pak aziweŋgik a maŋgavani, tay əhəmaŋgə gəm tay ərbetin lukutɗe gəm zəgeɗ nawgul məs Dorkas təgəɗ aka təsat dənɗaŋ.

⁴⁰ Piyer agilgitik ɗiy pak appaka, akdukuk afuŋ, akkamka. Yaŋ akkpaŋ aza gəbay nata, amna: Tabita asili. Yaŋ təkol harata, tulak Piyer, ndən ɗewi.

⁴¹ Piyer armak vata, asilgətəka. Yaŋ aye ɗiy na Maŋgəlva gəm gil net gəbayɗe neki, arbatəka, madarattə.

⁴² Alabara nan atrayək a Yoppe pakə, ɗiy diyɗa atafənək Daya.

⁴³ Piyer avoŋguk diyɗa a Yoppe a na Simoŋ milmis gəba da.