Wəza net Masləŋɗe 7 - Bible en Guidar

Əpel na Etiyen

¹ Daya net məsdəlveŋge assohõnək na: Vaski gesiŋ sa?

² Etiyen azlanəka: Milmiŋgiɗu dit efiŋgiɗwa, məprəma, Maŋgəlva məs də gagdak arbanək zən aza afəm Abraham aka asan a Mesopotami tak əssa nan a Karan də gəla.

³ Yaŋ anah sən na: Agil səka dələv noko, səret hilfiŋgiɗko, dok aka dələv məs nədarban suko.

⁴ Ndəni kan ambat səka dələv net mə Kaldiyeɗi, asan də gəla a Karan. Dərɓaga afən amtə, Maŋgəlva asimginik sədak aka dəlvəŋ məs kəssoŋ akan kakaŋkəŋka.

⁵ Dəpas na, təki tay apsən aka dələvəŋ ka nan gba gəla təl ɗəf dayday ɓa, ya aynanək man napsən ka nani gəm ka net kirtin dərɓagani, də tay də muzliya ɓa zlaŋgə.

⁶ Maŋgəlva apelik vaŋka: Kirtin wassoŋ aka dələv maɓɓani, kakkpaŋgeti belemɗe, kawzəmgiti sahã əzva səkat poɗo.

⁷ Ya Maŋgəlva amna: Naw, wanətaw wən aket ɗiy məs adassoŋ belemɗe neti, dərɓaga as na, wagilyoŋgu, waɗiynən kiyu a təkiyəŋka.

⁸ Yaŋ kan Maŋgəlva apsən wənmiyna də əskəl awra. Vaski kan səza awa Isak, askəlgən awra də əvoŋ madodopoɗoni, Isak tam Yakob, Yakob tam dəhiŋgiɗim kəlaw kiyit sula.

⁹ Dihigiɗim aɗɗaŋgək kotorok na Yosef, avəlnən sən Eziptə, ya Maŋgəlva tay dəndəni.

¹⁰ Amohuk səma əzəm sahã nan pakə, apsənək mbəlembəle gəm maɗɗula aba Farawən məlĩ na Eziptə, yas aɗi daya nadawgən zəga pak aka Eziptə gəm aka gəla nan pakə.

¹¹ Yaŋ mãy agəɗ a Eziptə baymani gəm a Kanana, əzəm sahã metiŋgini, hã efiŋgiɗim awrahaŋ zəga nawzəm ɓa.

¹² Adan Yakob aprəm na haykəmari tay a Eziptə, aslənik efiŋgiɗmə əslən an maddaabəŋ.

¹³ Aka masula'ən na, Yosef arbanək zən azet milmiŋgiɗni. Vaski suwer Yosef arbə aza Farawən.

¹⁴ Yaŋ Yosef aslən ədda əgəm Yakob afən dit ɗiy nan pakə, ɗiy kaklaw buhul kiyit sle'.

¹⁵ Yaŋ Yakob aprik a Eziptə, adak amtə gəm efiŋgiɗmə.

¹⁶ Yaŋ məket a Sikem, məndikit addəv magamas an Abraham albah də təbəz babar səvet kirtin Hemmor a Sikem.

¹⁷ Adan pay na iynama məs Maŋgəlva aziwgin sən Abraham nak adawgapa, ɗiy anzləraŋka, awanənək zit a Eziptə,

¹⁸ hã gap məɗi məlĩ maɓɓan aka Eziptə, məs dəsən Yosef ɓa.

¹⁹ Ya nani, asmayanək mahəlfa namə; azəmgitik sahã net efiŋgiɗmə, də əɗɗa ka dəppetingin mipriŋgeɗ net dəmtaŋgəni.

²⁰ Pay nani yi muwa Moyis, lelewi a mahara Maŋgəlva, məzgəlni təla hoku eŋgil ana afən da.

²¹ Adan məppan a mapoho, wətən Farawən təslanəka, təsgələk ka wətəta.

²² Məɓaygəni Moyis addəv maɗɗula net mə Eziptəɗe, tay də gagdak addəv əpel gəm addəv wəza nan temtemi.

²³ Adan agap əzva kaklaw poɗo, əɗɗum adek a makran nadda ule milmiŋgiɗin mə Israyelɗe.

²⁴ Adan awla ɗəf maɓɓan səmmbet əzəm sahã, yaŋ abbah səni, atər ɗəf məzuzəm sahã naka. Abay mə Eziptə.

²⁵ Aza əɗɗum nan na, tay vi karban sit milmiŋgiɗin na, dəndəni Maŋgəlva adapsit əska wəla, ya net dəprəmən gabban ɓa.

²⁶ Ya vit pumpum nani, ade azet na tay əgayaŋgə, yaŋ adawslereti, amna: Ɗiyi, məlma kənanaŋgə, vimi kədaɗɗaŋ mbərayən aza zukum di?

²⁷ Ya məzuzəmgən sahã na məlmən nak arɓahanək dawnah sən na: Naway dəɗiyuk daya gəm nawtawwən akam di?

²⁸ Kəŋgəl kawbayu va kəbay mə Eziptə nadəfɗaŋga nak sa?

²⁹ Adan Moyis aprəm vaska, anzanəka, asan aka dələv na Madiyan. Awək kirin mezeŋgleket sula adaka.

³⁰ Dərɓaga əzva kaklaw poɗo, maslay na Maŋgəlva arbanək zən azan a kapta-muyã na Sinay addəv hərzləm offo addivit gaslambeɗi.

³¹ Səza Moyis awla, aggətək aka ula nani, adan azar kawsəŋgləkani. Wəla Daya adeke:

³² Intə Maŋgəlva net efiŋgiɗko, Maŋgəlva na Abraham, na Isak, na Yakob. Geslne adak Moyis, tay əkkere, awɓap ula əmpa ɓa.

³³ Yaŋ Daya anah sən na: Akgbuk hensek səka təlko, vi təki məs kəziwiŋka, dələv salala yi.

³⁴ Ula nula əzəm sahã net ɗiy naw a Eziptə, nəprəmək ənɗəs neti, nəprik na vi kawkõhgiti. Kakaŋ na ade, nəslənuk a Eziptə.

³⁵ Moyis əŋka, ndəni məs arɓahaŋ dawnəh na, naway dəɗiyuk daya gəm mətawwən akam di? Anani Maŋgəlva aslən ka daya gəm məbit ɗiyi də va maslay məs dərban zən azan addəv gaslamba naka.

³⁶ Ndəni dəgilgit də əɗɗa sekeneɗ gəm zəgeɗ naggət aket aka dələv na Eziptə, aka pehe Pepreŋge gəm a kapta-muyã addəv əzva kaklaw poɗo.

³⁷ Moyis vani dənah sit mə Israyelɗe na: Maŋgəlva waslən sukum, məskəleŋ va in sə weleŋgit milmiŋgiɗkum.

³⁸ Ndəni pay əkkal a kapta-muyã dəziw də maslay məs dədawpelsən aka mossorgo metiŋ na Sinay gəm efiŋgiɗmə, ndəni dətaf əpel na zeŋgile kapsəmə.

³⁹ Ya efiŋgiɗim dəŋgəm əɓe'eŋ sənən ɓa, aɓoŋgoŋguk akani, akkpaŋganən əɗɗum net a Eziptə.

⁴⁰ Vini anah sənən Aron na: Agəɗ səm meŋgilveɗ məs nawdawaŋ abamə vi Moyis məs dəgilgəm səka dələv na Eziptə əŋka, məsən an dəgəɗ akan ɓa.

⁴¹ Aɗɗaŋgək wət wasli pay dəpaska, azaɓaŋgək-maŋgəlva sən zəgakamaŋgəlva aɗɗaŋgək əzləra gəm sən wəza na veti.

⁴² Yaŋ Maŋgəlva aktuh gəɓan siti, appet dəgagdaketingin məzəlpaŋ na disiŋ va məverin addəv ɗerewel net məskəleŋɗe na: Suwi kətawaŋ wəla zəga, gəm kəzaɓaŋ-maŋgəlva addəv əzva kaklaw poɗo a kapta-muyã sa ɗiy na Israyel?

⁴³ Kəslanənək gizlirke na Molok, gəm ŋgərzla na maŋgəlva nokum Rayfan, zeŋgilet zəgeɗ məs kəzaɓaŋ vi kappu' abeti, ya wanəsimgukum bal sən Babilon.

⁴⁴ Efiŋgiɗəm tahəŋ də gizlirke nalma də Maŋgəlva a kapta-muyã, va məs dəpel sən Moyis aɗi wən nan dəɗɗagən səɗek va an awələ.

⁴⁵ Ndəni'e efiŋgiɗim sap də Yosuwa atoŋgənən aka dələv net ɗiy-ɗar məs Maŋgəlva arɓah səbet efiŋgiɗmə, asanək adak hã gap pay na Davit.

⁴⁶ Məs dərah mbəlembəle aba Maŋgəlva, yaŋ akkaman nawrəh təki nassa sən zev Yakob.

⁴⁷ Ya Salmoŋ iyi dərka sən gəla.

⁴⁸ Ya Məsəɗəɗə awsan addivit zəgeɗ məɗɗet də vet ɗiy ɓa, va məskəleŋ anah na:

⁴⁹ Disiŋgi mazaŋga na məlĩ nawa, dəlvafuŋ, təki nawɗi təlwa. Gəla mi kədarkaŋ suwən di, Daya anahə, Awaniɓa təki naffet naw mawani di?

⁵⁰ Namna vaw diɗɗe zəgeɗis pak ɓa sa?

⁵¹ Mə ɓəɓəl kiyti, makra ɓəɓəl gəm məsuk sləmeti, kəɓoŋgoŋguk daprəm ma Zeŋgile Salala vanet efiŋgiɗkum aɓoŋgoŋ daprəm mani.

⁵² Məskəleŋ awani məs efiŋgiɗkum dəzəmgənən sahã ɓa di? Abeyinik en dəpeleŋ dafsən aka əzza na ɗəf təstəsə. Kakaŋ kan na məzəmaŋ kiyən gəm məbayaŋ gəbay kənanaŋgə.

⁵³ Kətafənək mahenziŋ na Maŋgəlva məs maslayɗe akiyaŋ, ya kərmanən ɓa.

Əmta na Etiyen

⁵⁴ Adan aprəmən wənəska, gədivit adək diyɗa, apəranənək slayit akani.

⁵⁵ Etiyen məknahən də Zeŋgile Salalayi, haran daŋ a disiŋ, awlak gagdak na Maŋgəlva gəm Yesu ziwwe aka va dəzəŋ na Maŋgəlva.

⁵⁶ Yaŋ amna: Intat ula disiŋ yaŋ kollo gəm Wətən ɗəf ziwwe aka va dəzəŋ na Maŋgəlva.

⁵⁷ Anzlaŋgək vaŋvəl diyɗa, asukunək sləmeti, arɓəzlaŋgək akan sapə.

⁵⁸ Akdəhənək sə walaŋgəla-metiŋ, askanənək dit gərmeŋge. Miziweɗe azinin lukutɗe net aza ɗəf məs adawyaŋ na Sawlu.

⁵⁹ Net tay əskanəni, Etiyen nan tay əkkaman dawnah na: Daya Yesu ataf əmpəs nawa.

⁶⁰ Akdukuk takprani, anahək də wəlan dayadaya na: Daya kədaŋɗan sit mambrayəŋ ɓa, səza anah vaska, ndən leŋgi.