Wəza net Masləŋɗe 4 - Bible en Guidar

Piyer gəm Yohanna aba əkkal net ɗiy gugriɗe

¹ Aka Piyer də Yohanna adawpeleŋ sitin ɗiy, məsdəlveŋge də daya net məgaŋ Gəla na Maŋgəlva gəm Sadukiɗe gboŋgboyõ azeti.

² Gədivit adək diyɗa, vi adawyegetin ɗiyi gəm adarbanən əsilye səka əmta də Yesu.

³ Vini armenini azgetin a fərsəna hã vit mazayən vi moskoy agəɗək səkayə.

⁴ Ɗiy diyɗa səret məs dəprəmən əpel van atafaŋka, əŋɗa net wagəɗ zel gabal sle'i.

⁵ Vit pumpum nani, deyeɗe, ɗiy məsɓeti gəm mərbaŋ-mahenziŋ akkalaŋgək a Yerusalem.

⁶ Ndəɗaŋgə: Hanna daya net məsdəlveŋge, Kayafas, Yohanna, Alekzaŋdər dit ɗiy na mazlalwa daya net məsdəlveŋge pakə.

⁷ Adan aziwgitin addak təkiya, assohetinke: Də əɓap mawani awaniɓa də iya na naway nokum kəɗɗanən zəgaŋ di?

⁸ Piyer aknahək də Zeŋgile Salala aɓsit na: deyeɗe net diyi gəm ɗiy məsɓeti,

⁹ adassohomən dəpaŋ na vi wəza moggon an məgəɗ sən məs gbəgba'i, də tive mi məmbəlgən di.

¹⁰ Məsən baymokum dit mə Israyelɗe pak na: Addəv iya na Yesu Kristu mə Nazaret məs kəkkpa'aŋgə, məs Maŋgəlva asilgin səka əmta, mbəlembəle nani ɗəfəŋ asan abokum aŋ məmbələn.

¹¹ Ndəni: Gərəm məs mənokum məzərkaŋ gəla kəzelenəni, ndən dəkkpaŋ gərəm kiwən naka bezler.

¹² Əkõh tay aza ɗəf maɓɓan ɓa, vi iya maɓɓan tay məpsa ammba disiŋ a walaŋgit ɗiy məs mədawkõh dəndən ɓa.

¹³ Adan awlanən Piyer də Yohanna tahəŋ ɓəlɓələ, arəhən na ɗiyəŋ də əsən ɓa, ɗiy-ɗarəŋgə na, agəɗ sitik gərəŋgə, asənnənək na adawaŋgək də Yesu,

¹⁴ tay ulanən ɗəf məs dəmbəl nak a maŋgevet mãy Piyer ziwwe, dərahaŋ nawzlan ɓa.

¹⁵ Aɗi sitinik wən nan dəgulyoŋgən sə təki nakkal neti, yaŋ atawanən wən nan a walaŋ ziti.

¹⁶ Aɓɗaŋ na, mbar mədawgəɗ sit ɗiyiŋ di? Vi gesiŋ, ɗiy na Yerusalem pak asənənək sekene məs aɗɗaŋ appaka ta'ə, aməɓap ənəh na dəgəɗ ɓa ɓa.

¹⁷ Ya vi wən nan adawan zən a waleŋgit ɗiy ɓa na, mətek sim adawpeleŋ də iyaŋ aza ɗəf taka dayday ɓa.

¹⁸ Yaŋ ayenin əmpa, aɗi sitin wən nan tataŋtataŋ adawpeleŋ mãy adaɗɗaŋ əyak də iya na Yesu ɓa.

¹⁹ Yaŋ Piyer də Yohanna azlanəni aɓsitin na: Moggoni aba Maŋgəlva məprəmgən mokum day ki Maŋgəlva sa? Mətaw wən nani.

²⁰ Vi nam məɓap na əmsan mam məpel na aket zəgeɗ məwələ dit en məprəm ɓa ɓa.

²¹ Adan apeleŋ sitin tataŋtataŋ, ndəɗaŋ mbegiti. Zəga tay arahaŋ azet nawtaw wən aket ɓa, vi ɗiy pak tay əgagdakanən Maŋgəlva aka zəga məs dəgəɗə.

²² Vi əzva na ɗəf van tay day ki kaklaw poɗo məs sekene nawmbəlgən agəɗ akan vani.

Əkkam net məzutafaŋgə

²³ Səza məppeti, mãy Piyer də Yohanna pay azet ɗiy neti. Anah sitinik an deyeɗe net məsdəlveŋge dit ɗiy məsɓet anahaŋgə.

²⁴ Adan net aprəmən vaska, ndəɗaŋ pak akkamanənək Maŋgəlva də makret taka, aɓɗaŋ na: Daya, istə kəɗɗa disiŋ də dəlvafuŋ gəm pehe dit zəgeɗ naddəvit pakə.

²⁵ Istə kəpel də ma afəm Davit gawla nok də Zeŋgile Salala, kəmnah: Vimi ɗiy-ɗar adaɗɗaŋ gogoyo mãy ɗiy əhãyaŋ ɗar di?

²⁶ Milyẽŋge naka dələv wasilyoŋgu, ɗiy gugriɗ tahəŋ əsapən met aka Daya gəm aka mesiya nani.

²⁷ Vi Herodə, Pontiyus Pilat dit ɗiy-ɗarə gəm ɗiy na Israyel akkalaŋgək addəv walaŋgəla-metiŋgiŋ gesiŋ aka Yesu gawla nok Salala məs kəppay sən mẽlẽ.

²⁸ Vi kaɗɗe zəgeɗ məs voko gəm əŋgla nok aziwgitin dafsən dəɗɗaŋgəni.

²⁹ Kakaŋ na Daya, azi horok aka əhãy neti. Apsit ɓəɓəl sit belemɗe nok nawpel əpel nok gərakə.

³⁰ Appar vok kana, vi məs gbəgbaɗe dəmbaŋgəni, sekeneɗi gəm zəgeɗ naggət aket dəɗɗaŋgən də iya na Yesu gawla nok Salala.

³¹ Adan akkamaŋgə, təki məs akkalaŋ aɓəlka. Ndəɗaŋ pak aknəhaŋgək də Zeŋgile Salala, tay əpelnən wən na Maŋgəlva məza də geslne ɓa.

Məzutafaŋ tay uɗakanən ərəh net a walaŋ ziti

³² Məzutafaŋ addəv əsap net pak tahəŋ mekret taka, megenegenet taka, ɗəf taka tay dədawnəh na arya nani ɓa, zəgeɗ net pak tahəŋ sapə.

³³ Də əɓap metiŋgin maslənɗe adawpeleŋ aka əsilye na Daya Yesu səka əmta. Mbəlembəle metiŋgin tay aket pakə.

³⁴ Ɗəf tay məzuray a weleŋgit ɓa. Ɗəf məs dit gulyeŋge awaniɓa dit gəleɗe əvilini, əkinin koɓeɗ net zəgeɗ məs avəlaŋ vani.

³⁵ Tay əkitin avet maslənɗe, ndəɗaŋ əpsən ɗəf pak aza wəray nani.

³⁶ Yaŋ Yosef məs maslənɗe alvaŋ na Barnabas va ənəh na ɗəf məzəsɓet ɗiyi, mə Levi muwa a Kiprus,

³⁷ tay də gulyo, səza avəla, aki koɓeɗ nani, aɗi abet maslənɗe.