Wəza net Masləŋɗe 3 - Bible en Guidar

Məmbəlgəni maŋgalɓaya

¹ Pay maɓɓani Piyer də Yohanna tay əpeŋgeŋ addəv Gəla na Maŋgəlva vi kakkam na pay vuroku.

² Ɗəf tay adak muwan maŋgalɓaya, adawkiyaŋ əɗiyən pay pak a maddamba na Gəla na Maŋgəlva məs adawyaŋ na maddamba moggoni, vi dəŋgəlgən zəga avet ɗiy dədawtoŋgoŋ addəv Gəla na Maŋgəlva.

³ Adan awle mãy Piyer də Yohanna ədda ətoŋgoŋ addəv Gəla na Maŋgəlva, aŋgələk zəga aveti.

⁴ Piyer də Yohanna aziyənək heret akani, Piyer aɓsən na: Awləm ɗa.

⁵ Maŋgalɓaya awlek lewlewi, azan na wapsənən zəga.

⁶ Piyer aɓsən na: təbəz babara mãy meleŋge tay avaw ɓa, an navaw na, ndən nədapsuko, də iya na Yesu Kristu mə Nazaret asil adawə.

⁷ Yaŋ arma van dəzəŋ, ndən le'gəni, tələn də hara tələn arahək gbogboŋ ləŋgə.

⁸ Ndən hõs ziw, ədawa, yaŋ atoŋ dənɗaŋ addəv Gəla na Maŋgəlva, də ədawa, də əpepɗeke gəm əgagdakan Maŋgəlva.

⁹ Ɗiy pak awlanənək də ədawa gəm əgagdakan Maŋgəlva.

¹⁰ Asənənək na ndəni məzəŋgla məzusan a maddamba moggon na Gəla na Maŋgəlva naka, aggətaŋka, attapaŋgək aka an dəgəɗ akani.

Əpel na Piyer addəv Gəla na Maŋgəlva

¹¹ Ɗəf nak dəŋgəm əzar səza Piyer də Yohanna ɓa, ɗiy pak anzoŋguk gidigidi əzza azeti ammba balak məs adawyaŋ na balak na Salmoŋ, aggətaŋgək sawɓa.

¹² Adan Piyer awla vaska, apelik abet ɗiyi: Munokum mə Israyel, vimi kədaggətaŋ aka an dəgəɗəŋ di? Vimi kədawləmən vakəmna mənamtə də gbogboŋ namə awaniɓa də geslne' nam sən Maŋgəlva mədawgəni di?

¹³ Maŋgəlva na Abraham, na Isak, na Yakob, Maŋgəlva net efiŋgiɗim agagdakanək gawla nan Yesu məs nokum kəppanəni, kəɓoŋgoŋ dawsənən aba Pilat, də aŋgəl nappan zlaŋ.

¹⁴ Nokum kəzganənək ɗəf an salala məs təstəsə, yaŋ kəssohoŋ mbəlembəle sən ɗəf məbay gəbaya.

¹⁵ Məs dətəŋ zeŋgile kəbayaŋgəŋka Maŋgəlva asilgənək səka əmta, miziweɗe nan mənani.

¹⁶ Dəka ətaf iya nani, iya vanəs asɓan ɗəfəŋ məs kədawlaŋgə, kəsənaŋgəŋka, ətaf məs dəde səza Yesu apsənək pepet na gəɓa zən va lahəŋ ama horokum pakgukum.

¹⁷ Kakaŋ na, milmiŋgiɗwa, nəsənək na, dəka kəsənən ɓay kəɗɗaŋ va net deyeɗe nokum'e.

¹⁸ Vaski Maŋgəlva aɗɗa an məs arban far də met məskəleŋɗe na, Kristu nan wazəm sahã.

¹⁹ Məɗi marava kana məkkpaŋgə, vi mambrayɗe nokum dəvvuyoŋgəni.

²⁰ Ka pay nalhəɗan mokrokum dədegin səza Daya gəm dəslən sukumgən məs məwelin farə, ana Yesu Kristu.

²¹ Ndəni məs disiŋ adawtaf hã gap pay nawzaɓan zəga pak məs Maŋgəlva apel də met məskəleŋɗe salala nan lahəŋka.

²² Moyis anahək na: Daya Maŋgəlva nokum waslən sukum, məskəleŋ va in sə weleŋgit milmiŋgiɗkum. Kəprəməngən mani aka an məs adawnah sukum pakə.

²³ Ɗəf an məs dəprəm ma məskəleŋgəs ɓa pak, kawzani səret ɗiyi.

²⁴ Məskəleŋɗe pak təŋ səza Samiyel dit en dəgəmnən gəlan apeleŋke, arbanənək pay an məs məsam kakaŋka.

²⁵ Nokum, mənokumtə kirtit məskəleŋɗe gəm kirtin wənmiyna an Maŋgəlva aziwgin dit efiŋgiɗkum gala anah sən Abraham na: Də mazlalwok ɗiy naka dələv pak adawrahaŋ əzaɓa.

²⁶ Sukumi daabəŋ Maŋgəlva asilgin gawla nani, aslən vi kawzaɓokum də ətak ma naway di sərokum pak səka əɗɗum mbərayəŋ.