Wəza net Masləŋɗe 2 - Bible en Guidar

Əpel na alabara nenek a Yerusalem ( 2:1—8:3 ) Əzza na Zeŋgile Salala

¹ Adan pay na Paŋtekot agapə, akkalaŋgək baymet a təki taka.

² Yaŋ geŋgere va ɓaɓəlmet barkataŋ ade sə disiŋ ləŋgə. Aknəh gəla məs assoŋ ɗewɗew addəvən.

³ Yaŋ zəga arban zən azet va hərzlum offo ətəray aketi, asan aket taka taka pakə.

⁴ Ndəɗaŋ pak aknahaŋgək də Zeŋgile Salala, atəŋgaŋgək əpel də ma temtemi, va Zeŋgile Salala apsit tive nani.

⁵ Mə Yudeɗi məgeslne'eŋ sənən Maŋgəlva tahəŋ a Yerusalem dəzzoŋ səket dəlveŋge nammba dəlva.

⁶ Adan gogoyo vanəs agəɗə, ɗiy diyɗa akkalaŋka. Agəɗ sitik gərəŋgə, vi naway pak tay əprəmit əpel də ma nani.

⁷ Ndəɗaŋ met hã' kpuɓ, agətaŋgək sawɓa, aɓɗaŋ na: Məzupeleŋgiŋ pak mə Galileɗiŋ ɓa sa?

⁸ Ya mbar agəɗ naway pak sə walaŋgəm əprəmit də ma an awaɗ di?

⁹ Mənam mə Partəɗe, mə Mediɗi, mə Elamɗe, gəm ɗiy na Mesopotami na Yude na Kappados, na Pon gəm na Asiya,

¹⁰ na Firigiya, na Pamfili, na Eziptə, na Siren kivadələv na Libi gəm mə Romeɗ məs dəssoŋ aŋka.

¹¹ Mə Yudeɗi gəm mə Yudeɗ məkkpaŋga, mə Keretɗe gəm Arabɗe, mənam tat əprəmit əpel aket wəzeɗe gugriɗ na Maŋgəlva də ma namə.

¹² Ndəɗaŋ met hã' kpuɓ, mbagit gərəŋgə, aɓɗaŋ a walaŋ zit na: Aŋ va ənah mbar di?

¹³ Yaŋ ɗiy meɓɓet adawmasaŋ aket aɓɗaŋ na: Mbazla nenek abaŋgə.

Əpel na Piyer

¹⁴ Piyer kan le ziw dit gewleɗ kəlaw kiyit taka neki, aslan wəlan apel abet na: Mənokum mə Yudeɗi gəm ɗiy na Yerusalem pakə, məpak sləmokum ammba əpel nawa məsən na:

¹⁵ Ɗiyəŋ mbazla dəbey va kədaɗɗumoŋ ɓa, vi pay dohõy tagay ɓa.

¹⁶ Ya aŋ yaŋkəŋ zəga an məskəleŋ Yo'el apeli anah na:

¹⁷ Maŋgəlva amna əvoŋɗe meddirɓe na: Wanuksu' Əmpəs naw aket ɗiy pakə. Kirtukum mezeŋleket dit muguluŋgit waɗɗaŋ kəleŋ. Gewleɗ nokum warahaŋ ula, mezzeɗ nokum wassineŋgi.

¹⁸ Aket belemɗe naw mezeŋleketi dit belemɗe məguluŋgit dayday wanuksu' Əmpəs naw aketi, pay nani, waɗɗaŋ kəleŋgi.

¹⁹ Wanəgəɗ sekeneɗ a disiŋ, gəm zəgeɗ narba aka dəlvafuŋ ahəŋka, mbeli, offo gəm enene turliŋturliŋgi.

²⁰ Pay wakkpaŋ guzliyo, təla tam ka mbeli tak əzza na pay na Daya, pay metiŋgin gəm də gagdaka.

²¹ Vasna, ɗəf an dədawya iya na Daya pak na wakõhũ.

²² Munokum zel mə Israyelɗe, məprəm əpeləŋka: Yesu mə Nazaret, ɗəf məs Maŋgəlva aslən vikumi yi, də gagdak naɗɗa sekeneɗi, teteleɗe gəm zəgeɗ narba məs Maŋgəlva agəɗ dəndən a walaŋkum va kəsənnən sən kikum.

²³ Ndəni məs Maŋgəlva aynan də əsən nan far nappan avet ɗiy məza mahenziŋ ɓa, kəzanən də əppan sit ɗiy məza maheŋziŋ ɓa akkpa'nən aka məzliwrihe.

²⁴ Yaŋ Maŋgəlva asilgin də əpələn səka əzəmsãhã na əmta. Vi əmta aɓap na ərman ɓa.

²⁵ Vi Davit tay ənəh akan na: In tat əɗi Daya ɗayɗay ama harawa, vi tay aka va dəzəŋ nawa, ka nədakker ɓa.

²⁶ Sən aski makraw adanneke, hərzləmu asan talyãktalyãkə. Gəɓa zu tam adawsan kutuk əffet addəv əɗɗum nawga zəga.

²⁷ Vi kəppaw na firik a təki net ɗiy mimtit ɓa, kəppan na gawla nok salala əŋgəna ɓa.

²⁸ Kərbə suwək tiveɗ na zeŋgile, əssa nok də in waknəhu də ənneke.

²⁹ Milmiŋgiɗwa, nəŋgəl kawnah sukum kotak aka wən na dəhəm Davit, amtəka, məndəkni. Ha kakaŋka magamas nan tay a walaŋmə.

³⁰ Məskəleŋgi asənək na Maŋgəlva aynanək də əsway ammban nawɗi mazlalwãn aka mazaŋga na məlĩ nani.

³¹ Davit awlak dafsəni, ndəni apel aka əsilye na Kristu səka əmta na: Dəppan firik a təki net ɗiy mimtit ɓa, gəɓa zən dəŋgən ɓa.

³² Yesu vanəŋka Maŋgəlva asilgənək səka əmta, mənam tat pak miziwe nani.

³³ Maŋgəlva aslanək kan də va dəzən nani, arahək Zeŋgile Salala səva afən va aynan napsəni. Appasanəka, ndəni kədawlaŋ gəm kədaprəmaŋgə.

³⁴ Vi Davit sən kiyən dəpeŋ a disiŋ ɓa, də as pak amna: Daya, anah sən Daya naw na: Asok aka dəzəŋ nawa,

³⁵ hã gap an nəvoŋgitik məzuzelɗe nok ammba təlko.

³⁶ Vi vaski, mə Israyelɗe pak dəsənən gesiŋ na, Yesu vanəŋ məs kəkkpa'aŋ aka məzliwriheŋka, Maŋgəlva aɗiyək ka Daya gəm ka Kristu.

³⁷ Adan ɗiy aprəmən vaska, makret azlahka, yaŋ aɓsənən Piyer dit maslənɗe meɓɓet na: Mi mədaɗɗa kandi milmiŋgiɗmə?

³⁸ Piyer azlan sitike: Məɗiy marava, mətaf baptem də iya na Yesu Kristu navvuyon mambray nokum, asna wakərahaŋ Zeŋgile Salala.

³⁹ Vi an miynan van sukumi, sit kirtukum gəm sit ɗiy en faraɗa pakə, gba va Daya Maŋgəlva adawyet pakə.

⁴⁰ Piyer apelke, asɓetik də əpel temtem diyɗa, dawnəh na: Məkõhgən kiykum səddəv sayit ɗiy məzlzleɓtiŋki.

⁴¹ Ndəni ɗiy en dətafən əpel nan arahaŋgək baptem, ɗiy ammba gabal hoku asapaŋgək azet pay dəpaska.

Ənziya net məzutafaŋgə

⁴² Assoŋguk pay pak aba əyak net maslənɗe, addəv əsap a walaŋ ziti, addəv uɗakan waya gəm addəv əkkama.

⁴³ Ɗiy pak əggətaŋgə vi maslənɗe adaɗɗaŋ sekeneɗi gəm zəgeɗ narba diyɗa.

⁴⁴ Ɗiy en də ətaf pak assoŋguk a təki taka, zəgeɗ net pak sapə.

⁴⁵ Ndəɗaŋ əvəlin zəgeɗ net dit aryeɗ neti, ndəɗaŋ uɗaknən naway pak aza wəray nani.

⁴⁶ Pay pak awbeweŋ səddəv gəla na Maŋgəlva ɓa va aslereŋgi, ndəɗaŋ ərɗaŋ way sap anetda, əzəmaŋ də zit neki, mekret taka.

⁴⁷ Tay əgagdakanən Maŋgəlva, tahəŋ də ki nenek avet ɗiy pakə. Pay pak Daya tay əki ɗiy en dərahaŋ əkõh sap azeti.