Wəza net Masləŋɗe 1 - Bible en Guidar

Əzaɓan an nawpele ( 1:1-26 ) An Yesu aɗi wən nani gəm man an aynə dərɓe faɗə

¹ Baynaw Teyofil, addəv ɗerewel naw maddaabəŋ na, nəverik an Yesu atəŋ əɗɗa gəm an arban baymani

² hã gap pay an ateŋ a disiŋ dərɓaga asəɓ sit maslənɗe en məs awel də gbogboŋ na Zeŋgile Salala.

³ Azeti'e arban zən madaran də tive temtem diyɗa dərɓaga əzəm sahã nani, agəɗək əvoŋ kaklaw poɗo aka ərban zən azet də əpel sit wən na məlĩ na Maŋgəlva.

⁴ Aka assan dənɗaŋ, anah sitik na adawzaraŋ sə Yerusalem ɓa, dəganən an məs Afən aynan napsiti, an anah na: «Məs kəprəmaŋ sə mawa.

⁵ Yohanna dit iŋkile aɗɗa baptem, ya nokum əvoŋ siɗikke abe aŋ na akərəhaŋ baptem də Zeŋgile Salala.»

Yesu tay əteŋ a disiŋ

⁶ En məs dəkkalaŋ də Yesu attokonənək na: Daya kakaŋki kədawzaɓan məlĩ na Israyel sa?

⁷ Yas azlan sit na, wən nokum tay aza əsən əvoŋ nan də pay nan məs Afən aɗi də gagdak nan ɓa.

⁸ Ya wakərəhaŋ gagdaka, an Zeŋgile Salala adek akokum, wakəssoŋ məpeleŋ wən naw a Yerusalem gəm a Yude baymani, a Samari gəm hã aket meŋge na dəlva.

⁹ Adan anah sit vaska, apeŋgik a disiŋ, aka adawlanəni, yas slaybuwən azan sə ma hereti.

¹⁰ Aka adawlaŋ a disiŋ pay adawpeŋge, ɗiy yeŋ sula ziwziw dit lukutɗe babarɗe a maŋgeveti.

¹¹ Aɓsitin na: Mə Galileɗi, vimi kəssoŋ ziwziw aŋ ula a disiŋ di? Yesu məs dəteŋ a disiŋ sə zokumuŋka, vaski adawmilyeni, məstaka va kulanən əddan a disiŋ.

Ɗəf məs dəgəm gəla Yuda

¹² Yaŋ maslənɗe amilyoŋ a Yerusalem səka mossorgo an adawyaŋ na mossorgo net heremeɗi go'oy də Yerusalem, ɓaɓa' nan gba ədaw na pay naffete.

¹³ Adan amilyoŋgu, ateŋgeŋgək addəv giziŋ an na disiŋ a təki adakkalaŋ ɗayɗayə. Ndəɗaŋgə mãy Piyer, Yohanna, Yakob, Andre, Filip, Tomas, Bartelemi gəm Matiye də Yakob wətən Alfe, gəm Simoŋ məs dəŋglu dələv nani, gəm Yuda wətən Yakob.

¹⁴ Ndəɗaŋ pak tahəŋ məslerit addəv əkkam pay pakə, dit gil meɓɓeti gəm Miryam ma Yesu dit milmiŋgiɗni.

Ɗəf an nawgəm gəla Yudas

¹⁵ Pay dəpaska Piyer le aweleŋgit milmiŋgiɗin, ɗiy waɗɗaŋ gap səkat də kaklaw sula adaka yas amna:

¹⁶ Milmiŋgiɗwa, adahək an Zeŋgile Salala anah də ma Davit addəv Ɗerewel aka wən na Yudas məs dəkkpaŋ mədaw abet ɗiy dərmanən Yesu dəknahgəni.

¹⁷ Vi məŋɗani aramə, ya arahək haran nan səddəv wəza namə.

¹⁸ Yudas vanəs albahək guli dit deleɗ en arah də wəza mambray nani, askotuk də ma gədəvən, aɓahə, herɗen afuŋ zoɗoɗu.

¹⁹ Ɗiy na Yerusalem pak aprəmənək wən nani, ndəni ayanən guli van də ma net na: Hakeldama va ənəh na: Guli net mbeli.

²⁰ Vi məverni addəv ɗerewel na Gəlya na: Gəla nan dəsan kiməskiya, ɗəf adawsan də gəla adak ɓa. Ya gəla wəza nan na, ɗəf mbərən dəgəma.

²¹ Adahək məwelgən ɗəf taka səret ɗiy en dəssoŋ də mənam aka pay Daya Yesu adawzləwəran dələv də mənamə.

²² Təŋ səza bapteme na Yohanna hã gap pay an məgəmən sə walaŋgəm, vi dəkkpaŋgən miziwe sap də mənam aka əsilye nan səka əmta.

²³ Yaŋ aziyaŋ ɗiy sula: Yosef məs adawyaŋ na Barsabas məlvan na Yustus, gəm Matiyas.

²⁴ Yaŋ akkamaŋ anahaŋ na: Daya istə kəsən mekret ɗiy pakə, arban an kəwel taka səret ɗiy suleŋki.

²⁵ Vi dəgəmgən gəla wəzaŋ gəm əslən məs Yudas apəl kaddan a təki an nanəŋka.

²⁶ Yaŋ aɗɗaŋ vẽpəlwa aketi, yas vẽpəlwa abət aka Matiyas, yaŋ məŋɗan aret maslənɗe kəlaw kiyit taka neki.