Va'Atəŋ 49 - Bible en Guidar

Yakob tay wəɓuh sit ma sit kirtin kəlaw kiyit sula

¹ Yakob ayek kirtini, aɓsit na: Məkkalə, vi nənah sukumgən an dədaɗɗa akokum laha.

² «Məkkalə, məprəma, kirtin Yakob, Məprəm Israyel afukum.

³ Ruben, istə Tiz nawa, gbogboŋ nawa, ətəŋ na gərom nawa, də offo kənani, də gbogboŋ kənani.

⁴ Kəputkur va iŋkile məzugəbəɗaŋ ɓa! Adan kəpeŋgik aka zəga nawvoŋ na afuko, kərnokonək zəga nawvoŋ an asan akani.

⁵ Simeyon də Levi məlməni, Əsap net ka zəga nawgay yi.

⁶ Nəŋger na əzzaw a təki ətawanwən net ɓa, megenegenew ade na addəv ətawanwən net ɓa; vi addəv makra net abayan ɗəfa ka nanneken zit abəlnən zlozloŋgboŋ medgeɗge.

⁷ Əray dəsan aka makra neti! Də wətem neti, vi adayka! Wanuɗeket addəv Yakob, Wanətəreygit a Israyel.

⁸ Yuda, anoki milmiŋgiɗuk adawɗiyaŋ kiyko. Vok wadoɗ kiyit məzuzelɗe noko, kirtin afuk wappu'oŋ aboko.

⁹ Yuda wət ɓoolu kənani, aw! Sə təki əbaket sluɗe! Kəmili wətuwa Aktəmək takprani, avoŋguk va ɓoolu, va ɓoolu mugolun, naway nawsilgən di?

¹⁰ Zleŋge na məlĩ azar na sə Yuda ɓa, may zleŋge na əssel sə walaŋ tələn ɓa, hã gap afən zleŋge adazzan sə Silo, anan ɗiy adaprəman mani.

¹¹ Ndən miynə koro nan aza megezlembirke, wət koro nan aza zluzluŋgburni, askoɓuk lukutɗe nan addəv mbazla na megezlembirke, lukutuk nan addəvit iŋkile na mokkoy na megezlemirke.

¹² Haran ɗiwɗiwi yi, day ki mbazla na megezlembirke, slayən babar dayki moŋvo.

¹³ Zabulon a met peheɗ adawsan də gəla. Ndən zəknan, bəlayɗe nan tahəŋ a mabuzgum, met meŋge nan go'oy də Sidon.

¹⁴ Isakar, koro mizilin də sleŋsleŋgin guriɗi yi, dəziw aweleŋgit mezeŋgeɗ nassa akani.

¹⁵ Awla na, əffet lewi, dələv neki yi. Aɗonzoŋguk kivan nawslan gabal, asanək sən wəza va balam.

¹⁶ Dan, watawwən net ɗiy nani va taka na zeŋvit mə Israyelɗe.

¹⁷ Dan dəsan dohõ aka tive, barway akat təvak laɓlaɓə, ndəni nawbəl motokpotokpo təl pəlsa, ɗəf nakan waskot medeŋgbile.

¹⁸ Aka wəkõh noki yi, makraw asani Yawe.

¹⁹ Gad, masapeɗ azzoŋ akan, nan, wakkpaŋ aket meddirɓe.

²⁰ Səna Aser da, səlhã adazzan, peŋ nani yi, dəndən adaɗɗa məpəpəla net milyeŋge.

²¹ Neftali, mune mugolun dəmani yi məzuwa kirtin lelewɗe.

²² Yosef wəska na wəlaŋga məzuway yi, wəska na wəlaŋga məzuwa a met iŋkile, wəska nan hã pakpak aka zlava na dəlva.

²³ Asilgin sənənək makrani, armaŋgək mama azani, Migil bəle alpaŋgək dəndəni,

²⁴ ya bəle nan asanək ŋgəreŋ ŋgəreŋgi van dit kirtin van tahəŋ əɗɗaŋ wəza petpeti. Də gbogboŋ na Maŋgəlva Məzuɓappak na Yakob, də iya na Məzutaɗa, Gərəm na Israyel,

²⁵ Də Maŋgəlva na afuk məzəbbah suko, Maŋgəlva Məzuɓappak, wazaɓok də wəzaɓɗe na disiŋ məsəɗəɗə, də wəzaɓɗe nammba dələvafuŋ məhədəkə, də wəzaɓ na met bide də an na gəla uwa,

²⁶ Wəzaɓ na afuk adayək kiyit wəzaɓɗe naket mossorgoɗe en na maguwa, Hã gap wəŋgla net mossorgoɗe en faɗə. Dəprikeŋ aka ki Yosef, aka muhur ki ɗəf muwelin səret milmiŋgiɗni.

²⁷ Benyamin, kəramuyã yi, ndən bayə, də pummo ndən həmpərə, də moskoyo, ndən uɗak zəgeɗ en amõhu.»

²⁸ Eskis pak mahəlfa na Israyeləŋ kəlaw kiyit sula. Zəgeɗis efit anah siti, naway pak, də wəzaɓ nan, gala adawɓuh sit ma.

Əmta na Yakob

²⁹ Yaŋ aɗi sit wəna, amna: «Naw an nəmtəka, kəndəkwəngən azet afiŋgiɗwa, addəv bətəŋ na guli ana Efron mə Hitti da,

³⁰ a bətəŋ naddəv guli a Makpela haran ta' aka Mamre aka dələv na Kana'an, məs Abraham albah səva Efron, mə Hitti, ka na magamasə.

³¹ Adaki məndik may Abraham dət Sara, guluk nani, adaki məndik may Isak dət Rebeka, guluk nani, adaki nəndəkət Le'a.

³² Guli də bətəŋ naddəvənəŋ səvet kirtin Het məlbəhən.»

³³ Yakob asəɓ sit kirtin gərakə, ndən tələn hãs aka zəga nawvoŋ nan seki, ndən zam, sap azet ɗiy nani.