Va'Atəŋ 38 - Bible en Guidar

Yuda dət Tamar

¹ Aka pay nan na, Yuda appetik milmiŋgiɗin, ambat a Adullam ana ɗəf adawyaŋ na Hira da.

² Adaki Yuda awlət waŋ wətən ɗəf mə Kana'an adawyaŋ na Suwa. Agəmət aɗiyta.

³ Təɗiyək daway, tuwək wiyna yaŋ alvan na Er.

⁴ Təɗiyək daway əmpa, tuwək wiyna yaŋ təlvan na Onan.

⁵ Təɗi daway maɓɓan əmpa, tuwək wiyina, təlvan na Sela. Gala tuwa Sela na, Yuda tay a Kezib.

⁶ Yuda agəmək guluk sən Er iya nat na Tamar.

⁷ Er, daya na Yuda tay lew ara Yawe ɓa, Yawe bay əbayni.

⁸ Yuda anah sən Onan na: «Agəmət ga məlmukəŋkə. Assok dəndət va məzəmgəla, kəɗi səngən zeŋve sən məlmuko.»

⁹ Adan Onan asən na, zeŋvin tədawwa ɓa, an tay əvoŋgəta, ndən əki zən afuŋ vi əɗi adawɗi zeŋve sən məlməni.

¹⁰ An adaɗɗa tay law a mahara Yawe ɓa yas abay əmpa.

¹¹ Yas Yuda anah sət, Tamar attən na: «Dok əssok ana afukda dawga Sela dəɓaygəni:» Anah vasna: «Vi Sela adamta va net milmiŋgiɗin əmpa ɓa yi!» Tamar tələk əsat ana afətda.

¹² Əvoŋ diyɗa səɓɓani, ga Yuda, wətən Suwa nak təmtəka. Adan Yuda makran affeti, ambatək a Timna də baynan Hira mə Adullam, azet məfiweŋ zeŋzeɗe net timeŋgiɗ nani.

¹³ Məprəman səti Tamar dawnəh na: «Duhuk yaŋ əmbat a Timna, əfiw zeŋze net timeŋgiɗ nani.»

¹⁴ Təggbuk lukut na gəlabay səzata, təsərət məzlara akata, ndət zət tərtərə, ɗew a meŋgle na walaŋgəla na Eynayim aka tive nawmbat a Timna. Tulak na, Sela aɓayəka, gala napsənəttə ka gon kəta ya məpsənti ɓa.

¹⁵ Yuda awlətəka, azan na, məpolkoyoktə, vi təsərətək harata.

¹⁶ Ndən tive nawmbat azat gəmə, amna: «Kamə ndamə nəsawgən dənduko! Vi dəsən na atəntə ɓa!» Təmna: «Miy kədawvay ka kəvoŋgən də in di?»

¹⁷ Amna: «Wanəslən suk porsok sə gazlaŋ anawda.» Təmna: «An wakəvay zəga tagay dawga pay kədawslənən.»

¹⁸ Amna: «Va miy nədapsuk kandi?» Təmna: «Ndama naka voko, maslapa kəlawəŋka gəm zleŋge navokəŋka.» Apsittəka, avoŋgətəka, ndət ta' daway dəndəni.

¹⁹ Ndət le' mbat zəgak nata, tek məzlzlara nakat nak tor, an na gəbay nak kulo'u.

²⁰ Yuda aslənək mə Adullam, baynan nak dət porsokuk, kawnde zəgeɗ nan səvat guluk nak kəta. Ya dərəhət ɓa.

²¹ Yaŋ assohẽt ɗiy nadaka: «Aŋgattə məpolkoyok naka tive na Eynayim tat di?» Aɓsənən na: «Məpolkoyok təsat ɗah aŋ ɓa.»

²² Amndan aza Yuda, amna: «Nərəhət ɓa, ɗiy nadak dayday aɓɗaŋ na məpolkoyok təsat ɗah adak ɓa.»

²³ Yuda amna: «Ndət tərdə dit zəgeɗ veti! Mədaɗɗa zəga nawmas akam ɓa, in məs nəslən sət porsoku, də is məs kərəhət ɓaŋka!»

²⁴ Sə dərɓaga təla hoku, məprəman sən Yuda də wənah sən na: «Atuk Tamar, təgəɗək polkoyo. An dəray day na, təɗiyək daway aka polkoyo nata!» Yuda amna: «Məgilgəta, kawzləta!»

²⁵ Məgilgəti appaka, təslən aza dəhət dawnəh na: «Daway na afit zəgeɗiŋki addəvwa.» Təmna kamə asəŋgləketi: «Ndama, maslapa gəm zleŋge na nawaŋ di!»

²⁶ Yuda asəŋgləketke, amna: «Ndəttə təstəs daykiywa, vi nəpsənət sən Sela, wətu ɓa yi.» Dəvoŋgət ɗah əmpa ɓa.

²⁷ Pay nawwa nat agap na, meseŋɗeŋ addəvta.

²⁸ Gala tədawwa na, taka səret vitgən van, məzuwət tərma tiynan sən gaɓmay pepreŋ aza van naka, təmna: «Aŋki dəgil daabəŋ.»

²⁹ Ndən van nak məndakgəni, məlmən viti. Təmna: «Awle kəŋgar təkiya!» Yaŋ məpsən iya na Peres, va wənəh na təki məŋgarən.

³⁰ Məlmən məs gaɓmay pepreŋ aka van nak viti; məlvan na Zera.