Va'Atəŋ 37 - Bible en Guidar

Yosef ( 37:1—50:26 ) Wissine na Yosef

¹ Yakob asanək də gəla a təki afən asimi, aka dələv na Kana'an.

² Alabara na gəla na Yakob yaŋka. Yosef agəɗək wəzva kəlaw kiyən buhulu, timeŋgiɗ adawtaɗ dit milmiŋgiɗni. Yosef wiyin slawraŋga yi məzəzbet kirtət Bilha dit kirtət Zilpa, gil na afəni. Ndən əzza əppasan gebbet aza afit eŋgili.

³ Israyel aŋgluwək Yosef daykiyit milmiŋgiɗin pakə, vi nawgal nani yi awa. Armah sənək lukut na sləma məgbəŋtəŋga va zezeki,

⁴ milmiŋgiɗin awlanən na, afit anan aŋgəl daykiyit pakə; azelninke, awpeleŋ sənən də nenek ɓa.

⁵ Yosef assinke, yaŋ aboton sit milmiŋgiɗni, yaŋ azelnən day kiy lahəŋka.

⁶ Aɓsit na: «Kamə məprəm issine nissin yana.

⁷ Mənam tat awra iynet meŋgevɗe, yaŋ meŋgevɗe naw miynet nek asilyoŋ ziwi, meŋgevɗe nokum azzoŋ kiyit en naw nek sasahə̃, avoŋgoŋ kpor abet en nawa.»

⁸ Milmiŋgiɗin azlan sənən na: «Mok aka wəsok məlĩ akam gəm daya akam kan sa?» Azelnənək dayki lahəŋ əmpa, aka wissine nan də metteɓ mani.

⁹ Assinik əmpa, yaŋ anah sit milmiŋgiɗni amna: «Awle nissinik əmpa na: paya, təla gəm ŋgərzleɗ kəlaw kiyit taka tay əppu'on abawa.»

¹⁰ Ambatək əboton sən afən gəm sit milmiŋgiɗini; Afən hãyhãygəni, aɓsən na: «Mə issine miy kərah vaskəs di! Kəŋgəl kan na, iyna, moko, gəm milmiŋgiɗuk pak, mədegən əppu' abok kan sa?»

¹¹ Milmiŋgiɗin aɗɗaŋgək kotorok nani, afən armak wən nan akan hara.

Milmigiɗ Yosef avəlnənka

¹² Milmiŋgiɗin addoŋguk a Sikem ətaɗ timeŋgiɗ dit gilew na afiti.

¹³ Israyel anah sən Yosef na: «Kəsən na milmiŋguɗuk tahəŋ ətaɗ a Sikem ɓa sa? Nəslənuk dok azeti.» Aɓsən na: «In yakəŋkə.»

¹⁴ Aɓsən na: «Doko kamə awle mbar milmiŋgiɗuk vet gəm gilew assoŋ di, kəkiy səmgən wən nani.» Aslən sə təki məpəlayya na Hebron ade a Sikem.

¹⁵ Ɗəf gas ərəhən dabbal awra, yaŋ ɗəf van assohõn dawnəh na: «Miy kədawkayan di?»

¹⁶ Amna: «Milmiŋgiɗu nədawkayeti. Kamə arban su a təki adawtaɗaŋgə.»

¹⁷ Ɗəf nak azlan səni: «Addoŋguk səŋka, vi nəprəmək ənahaŋ na: Mədam a Dotan.» Yosef azbetik milmiŋgiɗin nek arih a Dotan.

¹⁸ Awlanək səka faraɗa. Aslereŋgik nawbayən gala dəɓəl əgap gapsa azet ɓa.

¹⁹ Anahaŋ aka walaŋ zit na: «Afən issine yaŋ əzzani.

²⁰ Kəkaŋ na! Məbay səmə, məzgangən addəv taka net vovɗeŋki. Mənahgən na, zəga darawən ampərka, mulagən va issine nan adakkpaŋga!»

²¹ Ruben aprəmək an apeleŋgi, yaŋ akõhgən səveti amna: «Mərəŋgən zeŋgilen ɓa.»

²² Ruben anah sit na: «Kəziyaŋ mbel ɓa, məzgan addəv vov na kapta-muyãska, kəgəmən vokum akan ɓa, vi kawkõhgən səveti, kawmilgin sən afəni.»

²³ Adan Yosef agap go'o azet milmiŋgiɗin, yaŋ amõhən lukut na sləma məgbəŋtəŋga va zezek nani, lukut na sləma va zezek nan naka.

²⁴ Ndəɗaŋ kãw ərmanən firik əzgan a vov naka; vov van iŋkile tahəŋ addəvən ɓa.

²⁵ Yaŋ assoŋ kawzəma. Heret le'gən na, awlenin mə ismayelɗe yeŋ əzzoŋ sə Galad, dit zlogomeɗ net məzukiyaŋ makarɓaɓay, telembe, gəm timbe məs məŋginit nek kawtoŋgit a Eziptə.

²⁶ Yuda aɓsit milmiŋgiɗin na: «Əbay məlməm, kawɗamet mbel nan na, miy adawtər səm di?

²⁷ Mədam əvələn sit mə Ismayelɗe ndeki, mədawgəm vam akan ɓa, vi məlməm yi, slu zəmə.» Milmiŋgiɗin aprəmənək mani.

²⁸ Adan Madiyanɗe adawtoŋgoŋgu, akdəhnən Yosef səddəv vov appaka, avəlnən sit mə Ismayelɗe, aka təbəz babar kaklaw sula, akanən Yosef a Eziptə.

²⁹ Adan Ruben amndak ama vov nak na, Yosef tay adak ɓa. Aŋgeretik lukutɗe nani,

³⁰ ndən buryok azet milmiŋgiɗin naka, amna: «Wiyin nak tay ɓa! Aŋga nədaddaw di?»

³¹ Agəmənək lukut na Yosef, atawaŋ wəla porsoku, ayopənək aret mbeli.

³² Aslənən lukut məza van ɓa sən afiti, aɓsənən na: «Aŋki mərahə. Asəŋgləkan ɗa, lukut na wutuki sa, nani ɓa?»

³³ Asəŋgləkanək lukut naka, amna: «Lukut məgbəŋtəŋga na wətuwi yi! Zəga darawən ampərəka, zəga nawra apuwenik Yosef piwpiwi!»

³⁴ Yakob aŋgeretik lukutɗe nani, aynanək gabal ɗar agzeni, asanək a gəlabay wətən pay ɓaɓayə.

³⁵ Adan kirtin mezeŋgleket dit muguluŋgit pak azzoŋ kaffeten sən makrani, ndən ɓoŋ amna: «Ha'aw də wəhəm ki wətu nədawpirke azan a təki net ɗiy mimtiti.» Afən ahəmək kini.

³⁶ Yaŋ mə Madiyanɗe avəlnən a Eziptə sən Potifar, daya naba Farawən, daya net məgaŋgə.