Va'Atəŋ 35 - Bible en Guidar

Yakob azarək sə Sikem a Betel

¹ Maŋgəlva anah sən Yakob na: «Asili, dok a Betel asok də gəla adaka. Arkə təki nawzaɓ-Maŋgəlva adak sən Maŋgəlva dərban zən azok pay kədanzok səba məlmuk Esaw.»

² Yakob anah sitik ɗiy nani, gəm ɗiy en məzəddoŋ dəndən pak na: «Məndol meŋgilveɗ net ɗiy-ɗar na walaŋkumiŋki. Məbbur zukum, məddəɗet lukutɗe nokumu.

³ Misilgən məlgən a Betel nərkəgən təki nawzaɓ-Maŋgəlva adak sən Maŋgəlva məs dəzlan su gala nəsaw addəv wəɗəka nawa. Asanək də in aka tive də təki nəmbat pakə.»

⁴ Apsininik meŋgilveɗ net ɗiy-ɗar nek pak sən Yakob, en naveti dit metendeŋɗe na sləmeti; Yakob andik ammba wəlaŋga metiŋgin adawyaŋ na Ela, go'o də Sikem.

⁵ Azaraŋgək sədaka, Maŋgəlva agbo'uk geslne aket walaŋgəleɗe dəsuləkini: ɗəf tay dəzbet kirtin Yakob ɓa.

⁶ Yakob agapək a Luz, aka dələv na Kana'an va wənəh na a Betel, ndən dit ɗiy namban pakə.

⁷ Arkək təki nawzaɓ-Maŋgəlva adaka, alvan na, «El-Betel» vi sədaki Maŋgəlva arban zən azan, gala adanzan sən məlməni.

⁸ Debora, məs təzgələt Rebeka təmtəka, məndəkti dohoŋ ki Betel ammba wəlaŋga metiŋgin adawyaŋ na Elon məs Yakob alvan na: «Alon nawhəma.»

⁹ Maŋgəlva arbanək zən aza Yakob əmpa, gala adamndan sə Paddan-Aram, yaŋ aɗi əzaɓ nan akani.

¹⁰ Maŋgəlva aɓsən na: «Iya nok Yakob iyi. Kawyuki Yakob əmpa ɓa, iya nok na Israyel adawsani.» Yaŋ aya na Israyel.

¹¹ Maŋgəlva aɓsən na: «Maŋgəlva Məzuɓappak nani. Awan kiyuk kuɗiskuɗisi: gebbet ɗiy temtem səzok adawgilyoŋgu, milyeŋge səddəvuk adawgilyoŋgu.

¹² Dələv nəpsən Abraham gəm sən Isak, nəpsukuko; wanəpsit dələv nan sit kirtuk dərɓogoko.»

¹³ Maŋgəlva azlahək səzan sə təki məs apel dəndəni.

¹⁴ Yakob ampək serek a təki məs Maŋgəlva apel dəndəni, serek na gərəm məs apesl də mbazla gəm aman mẽl akani.

¹⁵ Yakob alvan təki məs Maŋgəlva apel dəndənəŋ na Betel.

Uwa na Benyamin gəm əmta nat Rakel

¹⁶ Asilyoŋguk sə Betel. Ɓuhhoy səza Efrat gala Rakel tuwə; də tatwãh tuwə.

¹⁷ Aka tədawwa də tatwãha, muwə-gil təpsət na: «Kəgeslne' ɓa, vi aŋkəŋ wiyni əmpa.»

¹⁸ Adan əmpəs nat adawgilyen dəmta nata, yaŋ təlvan na, Ben-Oni va wənəh na wətən əhəma, na afən na Benyamin va wənəh na wətən dəzəŋ.

¹⁹ Rakel təmtəka, məndəkət aka tive na Efrat, ndəni Bet-Lehem.

²⁰ Yakob ampək serek aka magamas nata: serek na magamas nat Rakel, adawyanən dəpaŋka'e.

²¹ Israyel azarək sə təki nan, alək əmpa gizlirke balsən Migdal-Eder.

²² Gala Yakob asan aka va nani, Ruben tek ɗufgət Bilha, gəra afəni, Israyel aprəmək wən nani. Kirtin Yakob tahəŋ kəlaw kiyit sula:

²³ Kirtət Le'a: Ruben, daya na Yakob, Simeyon, Levi, Yuda, Isakar gəm Zabulon.

²⁴ Kirtət Rakel: Yosef, də Benyamin.

²⁵ Kirtət Bilha, balamək nat Rakel: Dan, Neftali.

²⁶ Kirtət Zilpa, balamək nat Le'a: Gad də Aser. Ndəɗaŋgə kirtin Yakob awə a təki məpəlayya na Paddan-Aram.

²⁷ Yakob agapək ana Isak afənda, a Mamre na Kiryat-Arba, va wənəh na Hebron, adaki may Abraham də Isak assoŋgu.

²⁸ Wəzva na Isak agəɗək səkat də kaklaw dodopoɗo;

²⁹ Isak amtəka, asapək azet migilni, abək wəzva. May Esaw də Yakob kirtin andəkənka.