Va'Atəŋ 33 - Bible en Guidar

Yakob aləmək də Esaw

¹ Yakob aslan haran, awla Esaw əzzani, ɗiy tahəŋ dəndən səkat poɗo. Ndən wəɗekgit kirin a weleŋgit may Le'a dət Rakel gəm belemɗe sula neki.

² Belemɗe atoŋgit abe dit kirtiti, sissiŋ Le'a dit kirtita, gəm Rakel də Yosef.

³ Ndən dəvan dətoŋ abeti, agduk afuŋ gap təl buhulu, ka dəgapgən go'o aza məlməni.

⁴ Esaw anzanək ələmsəni, arma kərrəmə, azlah ama wəlan dəllamən a makrani; ahəmaŋgə.

⁵ Sissiŋ Esaw asilgən haran awle gil dit kirni. Aɓsən na: «May nawaŋ azokiŋ di?» Yaŋ amna: «Kirin məs Maŋgəlva avay də mbəlembəle nan in balam nokəŋgə.»

⁶ Belemɗe dit kirtit adereŋgək go'o, yas appu'oŋgu.

⁷ Le'a dit kirtət təderik go'o tamə, appu'oŋgu. Sissiŋ Yosef dət Rakel adereŋgək go'o, Appu'oŋ tamə.

⁸ Esaw amna: «Miy kədaɗɗa dit gazlaŋɗe nələmsit pakiŋ di?» Yakob amna: «Maw aka kulagən sasãhwa daya nawa.»

⁹ Esaw amna: «An naw kaka' məkguwi məlmuwa; an nok dəsan suko!»

¹⁰ Yakob azlan sən na: «Awwo, kamə! Va kuluwək sãh na, ataf əvəl an nədapsuko. Adan nulak horok va adawlaŋ hara Maŋgəlva, kətafwək lewlewi,

¹¹ ataf wəzaɓ naw an nəki suko, kamə vi Maŋgəlva yi dəboru apsuwa; vi an na wərayu pak tay.» Yakob ampak tələn azan təkə, Esaw atafəka.

¹² Esaw amna: «Damə, agəm səm tive wanəlhõko.»

¹³ Yakob azlan sən na: «Kəsənək wən net kirin tuwãhi daya nawa, in tat dit timeŋgiɗ gəm wasliɗe muhuriti, aɓapaŋ na, kawket pay taka ləŋ ɓa, kirtit wamtaŋgə.

¹⁴ Va wagəɗ na, ɗəf daya naw dətoŋ aba balam nani. Naw na, nəmbatgən telle va wədaw net zəgeɗ nabawa, va wədaw net kirni, hã nəgapgən aza ɗəf daya naw a Se'ir.»

¹⁵ Esaw aɓsən na: «Maw aka əppa ɗiy meɓɓet məs dəlhãwən azoko.» Yakob amna: «Kawtər miy sam di? Naw nəŋgəl na, daya naw dəboru kaka'ə.»

¹⁶ Dəpaska'e ləŋ Esaw agəm tive namndan a Se'ir,

¹⁷ na Yakob ambat a Sukkot, yas arkə gəla nan adak dit guɗukɗe sən zəga mamayã nani; vini aya təki van na Sukkot, va wənəh na guɗukɗe.

Yakob asanək go'o də Sikem

¹⁸ Yakob ade zeŋleŋge a walaŋgəla-metiŋ na Sikem aka dələv na Kana'an, ya nan sə təki məpəlayya na Paddan-Aram ade yaŋ ampa gizlirke nan a mahara gəla metiŋ.

¹⁹ Albahək təki nampa gizlirke nan səvet kirtin Hamor afən Sikem dit koɓeɗ na təbəz babar səkatə.

²⁰ Arkək təki nawzaɓ-Maŋgəlva adaka, aya na «El, Maŋgəlva na Israyel.»